ဘုမ်းမောက်ကို အဝေးကွင်းတွင် ၁-၄ ဖြင့်အနိုင်ရရှိသည့်ပွဲအပြီးတွင် အသင်းမှ တိုက်စစ်ကစားသမားများ ဖြစ်ကြသော ဖိုဒန်နှင့် ဟာလန်းကို မန်စီးတီးအသင်းမန်နေဂျာ ဂွာဒီယိုလာက ချီးမွမ်းပြောဆိုလိုက်သည်။ မန်စီးတီးသည် အယ်လ်ဗာရက်ဇ် ဖိုဒန် ဟာလန်းတို့၏သွင်းဂိုးများအပါအဝင် ဘုမ်းမောက်က မက်ပ်ဟမ် တို့၏ ကိုယ့်ဂိုးကိုယ်သွင်းခြင်းများကြောင့် လေးဂိုးရရှိခဲ့ခြင်းဖြစ်သည်။
“ကစားရတဲ့ပွဲအရေအတွက်နဲ့ ပင်ပန်းတကြီးခရီးသွားပြီး ကစားရတာတွေကိုပါထည့်တွက်ရင် မန်စီးတီးအသင်းက အရမ်းကို တက်တက်ကြွကြွကစားခဲ့တယ်လို့ ဆိုရမှာ ဖြစ်ပါတယ်။ တိုက်စစ်က ပိုပြိး ပေါက်ကွဲအားကောင်းလာပြီး ဂိုးလည်း ပိုရလာပါတယ်။ ဟာလန်းက အသင်းအတွက် ကစားတာ အရမ်းကို ထိရောက်မှု ရှိနေသလို အကျိုးလည်း ပြုနိုင်ပါတယ်။ ဟာလန်းက ဒီနေ့မှာ ပြိုင်ဘက်အသင်းအတွက် ကြီးမားတဲ့ ခြိမ်းခြောက်မှုတစ်ခုဖြစ်ပါတယ်”ဟု ပြောဆိုလိုက်သည်။
ဘုမ်းမောက်နှင့်ပွဲသည် ဖိုဒန်အတွက် လက်ရှိဘောလုံးရာသီတွင် ၁၅ ကြိမ်မြောက်ပွဲထွက် ကစားခွင့်ရရှိခြင်း ဖြစ်သည်။ ဖိုဒန်သည် ခြေစွမ်းပြနိုင်ခဲ့ပြီး ဂိုးသွင်းရန် အခွင့်အရေး ၇ ကြိမ်ဖန်တီးပေးနိုင်ခဲ့သည်။ ၂၀၁၄ ဗီလာနှင့်ပွဲတွင် အခွင့်အရေး ၈ ကြိမ်ဖန်တီးသည့် မီလ်နာနောက်ပိုင်းတွင် မန်စီးတီးအတွက် အဝေးကွင်းတွင် ဂိုးသွင်းခွင့်အများဆုံး ဖန်တီးသူအဖြစ်လည်း မှတ်တမ်းဝင်ခဲ့သည်။
