ဘာစီလိုနာအသင်းသည် မန်စီးတီးအသင်းမှ ဂျာမနီလက်ရွေးစင်ကွင်းလယ်လူ ဂွန်ဒိုဂန်အား အလွတ်ပြောင်းရွှေ့ကြေးဖြင့်ခေါ်ယူရန် သဘောတူညီမှုရရှိခဲ့ပြီး ကစားသမားအနေဖြင့် လာမည့်ဇူလိုင်လတွင် အသင်းနှင့်လာရောက် ပူးပေါင်းမည်ဖြစ်ကြောင်း နာမည်ကျော်အားကစားသတင်းထောက် ဖာဘရီဇီယိုရိုမာနိုကဖော်ပြခဲ့သည်။
အသက် (၃၂)နှစ်အရွယ်ရှိ ဂျာမနီလက်ရွေးစင်ကွင်းလယ်လူ ဂွန်ဒိုဂန်သည် မန်စီးတီးအသင်းနှင့် ယခုနွေရာသီတွင် စာချုပ်သက်တမ်းကုန်ဆုံးခဲ့ပြီးနောက် အသင်း၏ စာချုပ်သစ်ကမ်းလှမ်းမှုကို ငြင်းဆန်ကာ ဘာစီလိုနာအသင်းသို့ပြောင်းရွှေ့ရန် ဆုံးဖြတ်ခဲ့ခြင်းဖြစ်သည်။
ဘာစီလိုနာအသင်းအနေဖြင့် ဂွန်ဒိုဂန်အားခေါ်ယူရန် အစောပိုင်းကတည်းက သတင်းများထွက်ပေါ်ခဲ့ပြီး ပြီးခဲ့သည့် ဇွန်(၂၁)ရက်နေ့က ဘာစီလိုနာအသင်းဥက္ကဋ္ဌလာပေါ်တာနှင့် ကစားသမား၏တာဝန်ရှိသူများတွေ့ဆုံခဲ့ပြီးနောက် အပြောင်းအရွှေ့အတွက်သဘောတူညီမှုရရှိခဲ့ခြင်းဖြစ်ကြောင်းသိရသည်။
ဘာစီလိုနာအသင်းသည် ဂွန်ဒိုဂန်အား ၂၀၂၅ ခုနှစ် ဇွန်လအထိသက်တမ်းရှိမည့် (၂)နှစ်စာချုပ် ချုပ်မည်ဖြစ်ပြီး စွမ်းဆောင်ရည်အပေါ်မူတည်ကာ နောက်ထပ်တစ်နှစ်ထပ်မံသက်တမ်းတိုးနိုင်မည့်အချက်ပါဝင်ကြောင်းနှင့် အပြောင်းအရွှေ့အားမကြာမီအချိန်အတွင်း အတည်ပြုထုတ်ပြန်သွားမည်ဖြစ်ကြောင်း စပိန်အားကစားသတင်းစာ Football Espana ကဖော်ပြခဲ့သည်။
ဘာစီလိုနာအသင်းသည် ဂွန်ဒိုဂန်အား ယူရိုသန်း (၅၀၀)တန်လျော် ကြေးစာချုပ် ချုပ်ဆိုမည်ဖြစ်ပြီး ကစားသမားအနေဖြင့် ပြီးခဲ့သည့် အင်္ဂါနေ့ကတည်းက မြူးနစ်မြို့တွင် ဆေးစစ်မှုများပြုလုပ်ခဲ့ပြီးဖြစ်ကြောင်းလည်းသိရသည်။
မန်စီးတီးအသင်း၏ စာချုပ်သစ်ကမ်းလှမ်းမှုအားငြင်းပယ်ခဲ့ပြီးနောက် ဂွန်ဒိုဂန်အားခေါ်ယူရန် အာဆင်နယ်နှင့် ဘိုင်ယန်မြူးနစ်တို့အပါအဝင် ဥရောပထိပ်တန်းကလပ်အသင်းအချို့မှာ အပြိုင်ကြိုးပမ်းခဲ့သော်လည်း အတွေ့အကြုံသစ်များ ရှာဖွေနိုင်ရန်အတွက် စပိန်မြေနှင့် ဘာစီလိုနာအသင်းကို ရွေးချယ်ခဲ့ခြင်းဖြစ်ကြောင်းလည်း စပိန်မီဒီယာများကဖော်ပြခဲ့ကြသည်။
ဘာစီလိုနာအသင်းအနေဖြင့် ယခုနွေရာသီအပြောင်းအရွှေ့ကာလအတွင်း ဘီလ်ဘာအိုအသင်းမှ စပိန်လက်ရွေးစင်နောက်ခံလူ အီနီဂိုမာတီနက်ဇ် (၃၂ နှစ်)၊ ၊ ပါရာနန်စီအသင်းမှ ဘရာဇီးလ်ကြယ်ပွင့်တိုက်စစ်မှူးဗစ်တာရိုကေး (၁၈ နှစ်)နှင့် ဂွန်ဒိုဂန်တို့အား ခေါ်ယူရန်သဘောတူညီမှုရရှိထားပြီးဖြစ်သော်လည်း အသင်း၏ယခုနွေရာသီကစားသမားသစ်ခေါ်ယူမှုများ ပြီးဆုံးဦးမည်မဟုတ်ကြောင်း၊ နည်းပြဇာဗီအနေဖြင့် နောက်ခံလူတစ်ဦး၊ ကွင်းလယ်လူတစ်ဦးနှင့် တိုက်စစ်မှူးတစ်ဦးတို့ကို ထပ်မံခေါ်ယူရန် ဆန္ဒရှိနေကြောင်း စပိန်အားကစားသတင်းစာ Football Espana ကဖော်ပြခဲ့သည်။
