ဂျူဗင်တပ်စ်အသင်းအရှုပ်တော်ပုံတွင် ဆက်စပ်ပါဝင်နေသည့် အီတလီကလပ်အသင်း (၆)သင်းကို အီတလီ အစိုးရရှေ့နေများဦးဆောင်သောအဖွဲ့ က စုံစမ်းစစ်ဆေးနေကြောင်း Corriere della Sera က ဖော်ပြခဲ့သည်။
အဆိုပါ အားကစားသတင်းစာ၏ ဖော်ပြချက်အရ စုံစမ်းစစ်ဆေးခံနေရသည့်အသင်း (၆)သင်းမှာ အတ္တလန်တာ၊ အူဒီးနီးစ်၊ ဆမ်ဒိုးရီးယား၊ ဆာဆူအိုလို၊ ဘိုလော့ဂ်နာစသည့် စီးရီးအေအသင်း (၅)သင်းနှင့်အတူ စီးရီးဘီကလပ်ကာဂလီယာ ရီအသင်းတို့ဖြစ်ကြောင်း သိရသည်။
အတ္တလန်တာအသင်းသည် ကယ်လ်ဒါရာ၊ ရိုမဲရိုးတို့နှစ်ဦးအပါအဝင် ကစားသမား (၄)ဦးအပြောင်းအရွှေ့ကိစ္စတွင် ဂျူဗင်တပ်စ်အသင်းနှင့် ငွေကြေးအရှုပ်အထွေးများ ပြုလုပ်ခဲ့ပြီး အခြားအသင်းများသည်လည်း အလားတူဖြစ်ရပ်များ ကျူးလွန်ခဲ့ခြင်းဖြစ်သည်။
ကစားသမားအပြောင်းအရွှေ့ များမှတစ်ဆင့် ဘဏ္ဍာရေးရှင်းတမ်းအတွက် မသမာမှုပြုလုပ်ခြင်းကြောင့် (၁၅) မှတ်လျှော့ပြစ်ဒဏ်နှင့် ဘုတ်ဒါရိုက်တာအဖွဲ့ဝင် (၁၁) ဦးကိုလည်း ဘောလုံးနှင့် ပတ်သက်ခွင့်ပိတ်ပင် သည့်ပြစ်ဒဏ်များ ချမှတ်ထားခြင်း ဖြစ်သည်။
ဂျူဗင်တပ်စ်အသင်းသည် ပြီးခဲ့သည့်နှစ်၊ ဧပြီတွင် အပြစ်မရှိကြောင်း ဆုံးဖြတ်ခံရသော်လည်း တူရင်မြို့ရှိ အစိုးရရှေ့နေများက သီးခြားစုံစမ်းစစ်ဆေးပြီး အထောက်အထားအသစ်များနှင့်အတူ ယခုလို ပြစ်ဒဏ်ချမှတ်ခဲ့ခြင်းလည်းဖြစ်သည်။
ဂျူဗင်တပ်စ်အသင်းသည် အဆိုပါပြစ်ဒဏ်များအတွက် အယူခံဝင်ရန် စီစဉ်ခဲ့သော်လည်း အယူခံမအောင်မြင်ပါက ပြစ်ဒဏ်ထပ်တိုးချမှတ်ခံရ ဖွယ်ရှိနေကြောင်း သိရသည်။
ဂျူဗင်တပ်စ်အသင်းအရှုပ်တော်ပုံအတွက် အခြေခံအဆင့်ကြားနာစစ်ဆေးမှုကိုလာမည့် မတ်လ (၂၇)ရက်တွင် ပြုလုပ်သွားဖွယ်ရှိနေသည်။
