ဂျူဗင်တပ်စ်အသင်းသို့ ပြောင်းရွှေ့ရန်နီးစပ်နေသည့် တိုက်စစ်မှူး ဗလာဟိုဗစ်ကို ဖီအိုရင်တီးနားအသင်းပရိသတ်များက အသက်အန္တရာယ်ခြိမ်းခြောက်နေကြကြောင်း သိရသည်။
ဗလာဟိုဗစ်သည် ဖီအိုရင်တီးနားအသင်းမှ ဂျူဗင်တပ်စ်အသင်းသို့ ပြောင်းရွှေ့ကြေး ယူရို(၇၅)သန်းဖြင့် ပြောင်းရွှေ့တော့မည်ဖြစ်ကြောင်း ဇန်နဝါရီလ (၂၅)ရက်တွင် သတင်းများ ကျယ်ကျယ်ပြန့်ပြန့် ထွက်ပေါ်လာခဲ့ခြင်း ဖြစ်သည်။
အဆိုပါသတင်းများထွက်ပေါ်လာပြီးနောက် ဖီအိုရင်တီးနားအသင်းပရိသတ်များစွာသည် ဖလောရင့်မြို့အနှံ့တွင် ဗလာဟိုဗစ်ကို ခြိမ်းခြောက်သည့်စာတန်းများဖြင့် ဒေါသတကြီးဆန္ဒပြခဲ့ကြောင်း သိရသည်။
ဖီအိုရင်တီးနားအသင်းပရိသတ်များ၏ စာတန်းတစ်ခုတွင် “မင်းရဲ့ အစောင့်အရှောက်တွေက မင်းအသက်ကို ကာကွယ်နိုင်မှာ မဟုတ်ဘူး ဂျစ်ပစီကောင်ရေ။ မင်းဘဝတော့ ဆုံးပြီသာမှတ်” ဟု အဓိပ္ပာယ်ရသည့်စာသား ဖော်ပြထားကြောင်း သိရသည်။
ထို့ပြင် ဗလာဟိုဗစ်၏နေအိမ်အနီးတွင်လည်း အထူးစုံစမ်းစစ်ဆေးရေးနှင့် ရဲတပ်ဖွဲ့ဝင်များ ဖြန့်ကျက်တာဝန်ယူနေကြောင်း La Repubblica က ဖော်ပြခဲ့သည်။ လက်ရှိအချိန်တွင် ဗလာဟိုဗစ်သည် ရဲတပ်ဖွဲ့အစောင့်အရှောက်ဖြင့်မနေထိုင်သေးသော်လည်း ဖီအိုရင်တီးနားပရိသတ်များ၏ အမျက်ဒေါသအပေါ် စိုးရိမ်ပူပန်နေကြောင်း သိရသည်။
ဂျူဗင်တပ်စ်အသင်းအမှုဆောင်အရာရှိချုပ် မော်ရီဇီယိုအာရီဗာဘီနီးက သူတို့အသင်း၏ ပြောင်းရွှေ့ကြေး အသုံးစရိတ်သည် အကန့်အသတ်များရှိနေပြီး လစာငွေ လျှော့ချရမည့်အရေးလည်း ရှိနေကြောင်း ပြောကြားခဲ့ဖူးသဖြင့် ဗလာဟိုဗစ်သာ အမှန်တကယ်ရောက်ရှိလာပါက အသင်းမှ တိုက်စစ်မှူး ဒီဘားလား၏အနာဂတ် ပိုမိုလှုပ်ခတ်လာလိမ့်မည်ဟု အီတလီမီဒီယာများက ဖော်ပြနေသည်။
ဂျူဗင်တပ်စ်အသင်းသည် ဒီဘားလားနှင့် စာချုပ်သစ်ချုပ်ဆိုပြီးပါက တစ်နှစ်လစာ ယူရို(၁၀)သန်းအထိပေး ချေရဖွယ်ရှိနေသဖြင့် ဒီဘားလားမှာ ဂျူဗင်တပ်စ်အသင်းမှ ထွက်ခွာရဖွယ်ရှိကြောင်း သိရသည်။ လက်ရှိအချိန်တွင် တစ်နှစ်လစာ ယူရို (၇)သန်းပေးချေနေရသည့် ရမ်ဆေးကိုလည်း ရောင်းထုတ်ရန် ဂျူဗင်တပ်စ်အသင်း စီစဉ်နေသည်။
