ဂျူဗင်တပ်စ်အသင်း၏ တိုက်စစ်မှူး စီရော်နယ်လ်ဒိုက အသင်းနှင့်အတူ စီးရီးအေချန်ပီယံဆု ထပ်မံရယူသွားဦးမည်ဟု Instagram တွင် ရေးသားကာ အပြောင်းအရွှေ့ကောလာဟလသတင်းများကို အဆုံးသတ်စေခဲ့သည်။
စီရော်နယ်လ်ဒိုသည် ရီးယဲလ်အသင်းမှ ဂျူဗင်တပ်စ်သို့ ပြောင်းရွှေ့ကြေးယူရိုသန်း(၁၀၀)ဖြင့် ရောက်ရှိလာခဲ့သူဖြစ်သော်လည်း အသင်းနှင့်လမ်းခွဲရန် ဆန္ဒရှိနေကြောင်း သတင်းထွက်ပေါ်ခဲ့ဖူးသည်။
စီရော်နယ်လ်ဒိုသည် အသင်းဟောင်း မန်ယူ သို့မဟုတ် PSG အသင်းသို့ ပြောင်းရွှေ့ရန် လိုလားနေခြင်းဖြစ်ကြောင်း စပိန်မီဒီယာအချို့က ဖော်ပြခဲ့ခြင်းဖြစ်သည်။
သို့သော် ဂျူဗင်တပ်စ်အသင်းနှင့် စီးရီးအေချန်ပီယံဆုကို ဒုတိယအကြိမ် ရယူနိုင်ခဲ့အပြီးတွင် စီရော်နယ်လ်ဒိုက Instagram ၌ အောင်ပွဲခံဓာတ်ပုံနှင့်အတူ ”ဂျူဗင်တပ်စ်အတွက် စီးရီးအေချန်ပီယံဆု(၂)ကြိမ် ရယူပေးနိုင် တဲ့အတွက် ပျော်ရွှင်မိပါတယ်။ လွယ်တယ်လို့ ထင်ရပေမယ့် မလွယ်ပါဘူး။ မျှော်မှန်းထားတဲ့ ပန်းတိုင်ကိုရောက်ဖို့ တစ်နှစ်ထက်တစ်နှစ် ပိုကောင်းအောင် ကြိုးစားနေရပါတယ်။ တတိယမြောက်ချန်ပီယံဆုအတွက် ရှေ့ဆက်စို့”ဟု ရေးသားကာ ၎င်း၏အနာဂတ်အစီအစဉ်ကို ပရိသတ်များအား အသိပေးခဲ့ခြင်းဖြစ်သည်။
