ဇန်နဝါရီလ ၁၇ ရက်က ကျင်းပခဲ့သည့် ၂၀၂၁ The Best FIFA အကောင်းဆုံးဆုပေးပွဲတွင် အမျိုးသားအကောင်းဆုံးဆု ဆွတ်ခူးရရှိခဲ့သည့် ဘိုင်ယန်မြူးနစ်နှင့် ပိုလန်လက်ရွေးစင်အသင်းတိုက်စစ်မှူး လီဝန်ဒေါစကီးက ဂျာမန်ဂန္ထဝင်တိုက်စစ်မှူး ဂတ်မူလာကို ကျေးဇူးတင်စကားဆိုခဲ့ကြောင်း သိရသည်။
ဆုပေးပွဲအခမ်းအနားကို FIFA ရုံးစိုက်ရာ ဆွစ်ဇာလန်နိုင်ငံ၊ ဇူးရစ်မြို့တွင် ပြုလုပ်ခဲ့သော်လည်း ကိုဗစ်ကပ်ဘေးကာလဖြစ်သောကြောင့် Video Conferencing စနစ်ဖြင့်သာ ပြုလုပ်ခဲ့သည်။ The Best ဆုများကို ၂၀၁၆ ခုနှစ်တွင် စတင်ရွေးချယ်ချီးမြှင့်ခဲ့ခြင်းဖြစ်ပြီး အဓိကဆုများအား ရွေးချယ်ရာတွင် လက်ရွေးစင်အသင်းနည်းပြများ၊ လက်ရွေးစင်အသင်း ခေါင်းဆောင်များ၊ နိုင်ငံအလိုက်ကိုယ်စားပြု ဂျာနယ်လစ်များနှင့် ပရိသတ်များ၏ ဆန္ဒမဲအပေါ် အခြေပြုရွေးချယ်ခြင်းဖြစ်သည်။
လီဝန်ဒေါစကီးသည် မဲပေးမှုတွင် ၄၅ မှတ်ရရှိပြီး မက်ဆီက ၄၄ မှတ်ဖြင့် ဒုတိယ၊ ဆာလာက ၃၉ မှတ်ဖြင့် တတိယ အသီးသီးရရှိခဲ့သည်။ FIFA အကောင်းဆုံးဆုကို နှစ်နှစ်ဆက်တိုက် ဆွတ်ခူးရရှိသည့် လီဝန်ဒေါစကီး(၃၃ နှစ်)သည် ယခုနှစ်အတွင်း ၆၉ ဂိုးအထိ သွင်းယူနိုင်ခဲ့ပြီး ၄၉ နှစ်ကြာ ဂတ်မူလာ တင်ရှိထားသော နှစ်တစ်နှစ်အတွင်း ဘွန်ဒစ်လီဂါ သွင်းဂိုးအများဆုံးစံချိန်ကို ၃၄ ပွဲကစားပြီး ၄၃ ဂိုးအထိ သွင်းယူကာ ကျော်ဖြတ်နိုင်ခဲ့သည်။
“ဒီဆုချီးမြှင့်ခံရလို့ ပျော်ရွှင်ပြီး အလွန်ဂုဏ်ယူမိပါတယ်။ နှစ်အနည်းငယ်လောက်က ဒီစံချိန်ကို ချိုးနိုင်သလားလို့ ကျွန်တော့်ကို လာမေးခဲ့ရင် မဖြစ်နိုင်ဘူးလို့ ပြန်ဖြေဖြစ်လိမ့်မယ်။ အခုချိန်မှာတော့ သူ(ဂတ်မူလာ)ဟာ ကျွန်တော်တို့နဲ့ အတူမရှိတော့ပါဘူး။ ဒီစံချိန်အတွက် သူ့ကို ကျွန်တော် ကျေးဇူးတင်စကား ပြောလိုပါတယ်။ သူက စံချိန်များစွာ တင်ရှိခဲ့သူပါ။ လာမယ့်မျိုးဆက်သစ်တွေကလည်း ဒါကို ချိုးဖျက်နိုင်ဖို့ ကြိုးစားရမယ်” ဟု လီဝန်ဒေါစကီးက ပြောကြားခဲ့သည်။
