အာဆင်နယ် အသင်း ရဲ့ကြယ်ပွင့် ဘူကာရို ဆာကာ က သူဟာ ဘယ်သူ့ကိုမျှ ကြောက်လန့် နေမှာ မဟုတ်ကြောင်း ဂျာမနီ နဲ့ ၁၆ သင်း ရှုံးထွက်အဆင့် ပွဲမတိုင်မှီ ကြွေးကြော် လိုက်ပါတယ် ။
ချက် အသင်း နဲ့ ကစားခဲ့ရတဲ့ အုပ်စု နောက်ဆုံး ပွဲစဉ်မှာ ဆာကာ ဟာ ခြေစွမ်း ပြနိုင်ခဲ့ပြီး Star of the Match အဖြစ် ရွေးချယ် ခံခဲ့ရပါတယ် ။ ဒါကြောင့် ဆာကာ ဟာ ဂျာမနီ နဲ့ ပွဲကြီးပွဲကောင်းမှာလည်း ဆက်လက် ပွဲထွက်ခွင့်ရဖို့ မျှော်လင့်လျက် ရှိနေပါတယ် ။
အသက် ၁၉ နှစ် အရွယ်သာ ရှိသေးတဲ့ ဘူကာရိုဆာကာ က ဂျာမနီ နဲ့ ပွဲမှာသာ ပါဝင် ကစားခွင့် ရရင် သူ့ကစားသမား ဘဝ အကြီးမားဆုံးပွဲ ဖြစ်လိမ့်မယ်လို့လည်း ပြောကြား သွားခဲ့ပါတယ် ။
ဆာကာ က BBC Sports နဲ့ အင်တာဗျူးမှာ ” ဂျာမနီ နဲ့ ပွဲမှာသာ ကစားခွင့်ရရင် ကျနော့် ကစားသမား ဘဝ အကြီးကျယ်ဆုံးပွဲ ဖြစ်ပါလိမ့်မယ် ။ အဲ့ဒီနေ့မှာ ကျနော် ဘယ်လို ခံစားရမလဲ ဆိုတာတော့ မသိပါဘူး ၊ ဒါပေမယ့် အခု အချိန်မှာ ကျနော် ဘယ်သူ့ကိုမှ မကြောက်ပါဘူး ။ ” လို့ ပြောကြား သွားခဲ့ပါတယ် ။
ဆာကာ ဟာ မနှစ်ကတည်းက ဘယ်နောက်ခံလူ ၊ ဘယ်တောင်ပံ ခံစစ် ၊ ဘယ်ညာ တောင်ပံ နှစ်ဖက် စတဲ့ နေရာမျိုးစုံ မှာ ကစားကာ သူ့ရဲ့ အရည်အသွေးကို ပရိသတ်တွေသိအောင် ပြသထားနိုင်တဲ့ လူငယ် တစ်ဦးပါ ။
ဒါကြောင့်လည်း ဆာကာ ဟာ အာဆင်နယ် အသင်း ပရိသတ်တွေ မဲပေးရွေးချယ်တဲ့ တစ်နှစ်တာ အကောင်းဆုံး ကစားသမား ဖြစ်ခဲ့ပြီး ယူရို ပြိုင်ပွဲဝင် အင်္ဂလန် အသင်းရဲ့အပြီးသတ် လူစာရင်းမှာပါ ရွေးချယ် ခံခဲ့ရပါတယ် ။
ချက်နဲ့ ပွဲအပြီးမှာတော့ ဆာကာ ဟာ အင်္ဂလန် အသင်းအတွက် ၅ ပွဲ ကစားရာမှာ သုံးပွဲအထိ MOTM ရရှိသူ ဖြစ်လာခဲ့ပါတယ် ။ဆာကာ ဟာ ပြီးခဲ့တဲ့ ဘောလုံးရာသီမှာ အာဆင်နယ် အတွက် ပြိုင်ပွဲစုံ ၄၆ ပွဲ ကစားပြီး ၇ ဂိုး သွင်းယူကာ ၁၀ဂိုး ဖန်တီး ပေးနိုင်ခဲ့ပါတယ် ။
