ဂျာမနီနှင့် ကစားမည့်ပွဲတွင် ကော်စတာရီကာအား ဂိုးပြတ်အနိုင်ရခဲ့သည့်ပွဲမှ လူစာရင်းကို အပြောင်းအလဲပြုလုပ်သွားမည်ဟု စပိန်လက်ရွေးစင်အသင်းနည်းပြ အင်းနရစ် ပြောကြား

စပိန်လက်ရွေးစင်အသင်းနည်းပြ အင်းနရစ်က မိမိအနေဖြင့် ဂျာမနီအသင်းနှင့် ကစားမည့် ကမ္ဘာ့ဖလားအုပ်စုပွဲစဉ်တွင် ကော်စတာရီကာအသင်းကို ဂိုးပြတ်အနိုင်ရသည့်ပွဲမှ အသင်းလူစာရင်းကို အပြောင်းအလဲပြုလုပ်သွားမည်ဖြစ်ကြောင်း ပြောကြားသည်။ 

စပိန်အသင်းသည် နိုဝင်ဘာ ၂၃ ရက်က  ကစားခဲ့သည့် ၂၀၂၂ ကမ္ဘာ့ဖလား အုပ်စု (E) အဖွင့်ပွဲတွင် ကော်စတာရီကာအသင်းကို (၇-၀) ဂိုးဖြင့် ဂိုးပြတ်အနိုင်ရခဲ့သည်။ ယင်းနိုင်ပွဲမှာ စပိန်အသင်းအတွက် ကမ္ဘာ့ဖလားပြိုင်ပွဲသမိုင်းတွင် ဂိုးအပြတ်ဆုံးနိုင်ပွဲအဖြစ် မှတ်တမ်းဝင်ခဲ့သည်။ 

စပိန်နည်းပြ အင်းနရစ်သည် ကော်စတာရီကာအား အနိုင်ရသည့် ပွဲတွင် ၄-၃-၃ ကစားကွက်ကို အသုံးပြုခဲ့ပြီး ဂိုးသမားအဖြစ် အူနိုင်းဆိုင်မွန်၊ နောက်တန်းတွင် အက်ဇ်ပီလီကွယ်တာ၊ ရိုဒရီ၊ လာပေါ့တ် နှင့် ယော်ဒီအယ်လ်ဘာ၊ ကွင်းလယ်တွင် ဂါဗီ၊ ဘူးစကွက်စ်နှင့် ပတ်ဒရီ၊ တိုက်စစ်တွင် ဖယ်ရန်တောရက်စ်၊ အဆန်စီယိုနှင့် အော်လ်မိုတို့ ကို ပွဲထွက်ကစားစေခဲ့သည်။ 

စပိန်အသင်းသည် အဆိုပါပွဲထွက်လူစာရင်းဖြင့် ကော်စတာရီကာအသင်းကို ဂိုး ပြတ်အနိုင်ခဲ့ရသော်လည်း နည်းပြ အင်းနရစ် က ဂျာမနီနှင့်ကစားမည့် အသင်းလူစာရင်းကို အပြောင်းအလဲ ပြုလုပ်သွားမည်ဖြစ်ကြောင်း ပြောကြားခဲ့ခြင်းဖြစ်သည်။ အင်းနရစ်က “ဂျာမနီနဲ့ပွဲမှာ ဘယ်ကစားသမားတွေ ပွဲထွက်ခွင့်ရမလဲ ကျွန်တော် မသိသေးပါဘူူး။ ကျွန်တော်တို့ရဲ့ရည်မှန်းချက်က ကမ္ဘာ့ဖလားပြိုင်ပွဲမှာ ခုနစ်ပွဲ ကစားဖို့ဖြစ်ပြီး အဲဒီပွဲတွေမှာ ရွေးချယ်ထားတဲ့ကစားသမားတိုင်း ကစားကြမှာပါ။ ကစားသမား ၁၁ ယောက်ပဲ ပွဲတိုင်းကို ကစားစေမှာ မဟုတ်ပါဘူး။ ကျွန်တော့်အနေနဲ့ ပွဲထွက်လူစာရင်းကို မပြောင်းမလဲသုံးတာမျိုး မရှိပါဘူး။ သုံးပြီးသားလူစာရင်းကို ကျွန်တော် ထပ်သုံးမှာမဟုတ်ပါဘူး” ဟု ပြောကြားခဲ့သည်။ 

စပိန်အသင်းသည် ၂၀၂၂ ကမ္ဘာ့ဖလား ဒုတိယပွဲစဉ်အဖြစ် နိုဝင်ဘာ ၂၈ ရက်တွင် ဂျာမနီအသင်းနှင့် ကစားရမည်ဖြစ်သည်။ ဂျာမနီအသင်းမှာ အုပ်စုအဖွင့်ပွဲတွင် ဂျပန်အသင်းကို (၁-၂) ဂိုးဖြင့် ရှုံးနိမ့်ထားသဖြင့် ဝေဖန်မှုများနှင့်ရင်ဆိုင်နေပြီး စပိန်အ သင်းမှာ အုပ်စုအဖွင့်ပွဲမှ ခြေစွမ်းကြောင့် ချီးကျူးခံနေရသည်။ 

သို့သော် အင်းနရစ်က စပိန်ကစားသမားများအနေဖြင့် ယင်းချီးကျူးမှုများကို သာယာနေမည်မဟုတ်ဟု ယုံကြည်ကြောင်းလည်း ပြောကြားခဲ့သည်။ “ကျွန်တော်တို့အနေနဲ့ ချီးကျူးမှုတွေကြောင့် ဘဝမမြင့်ဘဲ နှိမ့်ချထားဖို့က အရမ်းကိုအရေးကြီးပါတယ်။ ကျွန်တော်တို့အသင်းမှာ စိတ်ပညာရှင်တွေရှိတာက ဂြိုဟ်သားတွေ ရှိသလိုပါပဲ။ သူတို့ ကစားသမားတွေကို အလွန်အမင်းစိတ်မလှုပ်ရှားအောင် ကူညီနိုင်ပါတယ်။ ဒါက အရမ်းကို အရေးကြီးပါတယ်”ဟု အင်းနရစ်က ပြောကြားခဲ့သည်။