ဂျာမနီလက်ရွေးစင်အသင်း၏ ဂန္ထဝင်ကစားသမား လိုသာမာသီးယပ်စ်က လက်ရှိနည်းပြ ဟန်ဆီ ဖလစ်ခ်သည် ဂျပန်နှင့်ပွဲတွင် ပြိုင်ဘက်အသင်းကို တိုက်စစ်ဆင်ရန် အ ခွင့်အရေးပေးခဲ့သောကြောင့် ရှုံးနိမ့်ခဲ့ခြင်းဖြစ်ကြောင်း ဝေဖန်ခဲ့သည်။
ယင်းပွဲတွင် ဂျာမနီအသင်းသည် ပထမပိုင်း၌ (၁-၀)ဂိုးဖြင့် ဦးဆောင်နိုင်ခဲ့သော်လည်း ဒုတိယပိုင်း (၇၅)နှင့် (၈၃)မိနစ်များတွင် နှစ်ဂိုး ပြန်ပေးရပြီး ရှုံးနိမ့်ခဲ့ခြင်းဖြစ်သည်။
ယင်းသို့ရှုံးနိမ့်ခဲ့ခြင်းမှာ ၀ါရင့်ကစားသမားနှစ်ဦးဖြစ်သည့် သောမတ်စ်မူလာနှင့် ဂွန်ဒိုဂန်တို့ကို တစ်ပြိုင်နက် လူစားလဲခဲ့ခြင်းကြောင့် အသင်း၏ ရစ်သမ်ပျက်ခဲ့ပြီး ပြိုင်ဘက်ကို အခွင့်အရေးပေးသလိုဖြစ်ခဲ့ရသည်ဟု လိုသာမားသီးယပ်စ်က သုံးသပ်ခဲ့သည်။
ထို့ပြင် ယင်းအခြေအနေမှာ ဘိုင်ယန်မြူးနစ်အသင်း မန်ယူကို အရှုံးပေးခဲ့ရသည့် ၁၉၉၉ ချန်ပီယံလိဂ်ဗိုလ်လုပွဲမှ လူစားလဲပုံများနှင့် တူညီခဲ့ကြောင်းလည်း နှိုင်းယှဉ်ပြောကြားခဲ့သည်။
ဘိုင်ယန်မြူးနစ်အသင်းသည် ၁၉၉၈-၉၉ ရာသီက ချန်ပီယံလိဂ်ဗိုလ်လုပွဲ၌ မန်ယူအသင်းကို မိနစ် (၉၀)ပြည့်သည်အထိ (၁-၀)ဂိုးဖြင့် ဦးဆောင်နိုင်ခဲ့သော်လည်း နာကျင်အချိန်ပိုတွင် နှစ်ဂိုးပြန်ပေးရကာ ရှုံးနိမ့်ခဲ့ခြင်းဖြစ်သည်။
လိုသာမားသီယပ်စ်သည် ယင်းပွဲတွင် မိနစ်(၈၀)၌ လူစားလဲခံခဲ့ရသူလည်းဖြစ်သည်။ ၎င်းက “၁၉၉၉ ချန်ပီယံလိဂ်ဗိုလ်လုပွဲမှာ ဟစ်ဇ်ဖဲလ်က ကျွန်တော့်ကို ပွဲမပြီးခင် မိနစ်အနည်းငယ်အလိုမှာ လူစားလဲခဲ့တာ အမှတ်ရမိပါတယ်။ ဒါဟာ ပြိုင်ဘက်ကို တိုက်စစ်ဆင်ဖို့ အခွင့်အရေးပေးသလိုဖြစ်ခဲ့ပြီး အခုပွဲမှာလည်း အဲဒီလိုဖြစ်ခဲ့ပါတယ်။ အတွေ့အကြုံရင့်ကျက်တဲ့ မူလာနဲ့ ဂွန်ဒိုဂန်တို့ကို တစ်ပြိုင်နက် လူစားလဲလိုက်တာက အသင်းရဲ့ ရစ်သမ်ကို ပျက်စီးစေခဲ့ပါတယ်”ဟု ပြောကြားခဲ့သည်။
