PSG အသင်းသည် အသင်း၏ရာသီကြိုခရီးစဉ်သို့ ခေါ်ယူလိုခြင်းမရှိသည့် ကစားသမား (၉) ဦးကို ရောင်းချသွားမည်ဖြစ်ကြောင်း ပြင်သစ်သတင်းစာ L’Equipte က ဖော်ပြခဲ့သည်။
PSG အသင်းသည် ၂၀၂၂-၂၃ ရာသီကြိုခရီးစဉ်အဖြစ် ဂျပန်နိုင်ငံသို့ ထွက်ခွာမည်ဖြစ်ပြီး ဇူလိုင် (၂၀) တွင် ကာဝါဆာကီ၊ ဇူလိုင် (၂၃) တွင် အူရာဝါရက်ဒ်၊ ဇူလိုင် (၂၅) တွင် ဂမ်မာအိုဆာကာအသင်းတို့နှင့် ခြေစမ်းပွဲများကစားမည်ဖြစ်သည်။
PSG အသင်းသည် ယင်းရာသီကြိုခရီးစဉ်အတွက် ကစားသမား (၉)ဦး ခေါ်ယူသွားမည်မဟုတ်ဘဲ ၎င်းတို့ကို ယခုနွေတွင် ရောင်းထုတ်သွားရန် စီစဉ်နေကြောင်း သိရသည်။
L’Equipe ၏ ဖော်ပြချက်အရ PSG အသင်းအနေဖြင့် အသင်းကစားသမား ဝိုင်နယ်လ်ဒမ်း၊ အီကာဒီ၊ ကာဇာဝါ၊ ဒရက်ဇ်လာ၊ ဟာရဲရား၊ ဂေးယီ၊ အီဘင်ဘီ၊ ရာဖင်ညာနှင့် ရီကိုတို့ကို အသင်း၏ ဂျပန်ရာသီကြိုခရီးစဉ်ကို ခေါ်ယူသွားမည်မဟုတ်ဘဲ အရောင်းစာရင်းတင်သွားမည်ဖြစ်ကြောင်း သိရှိရသည်။
PSG အသင်းသည် ဘဏ္ဍာရေးစည်းမျဉ်းအရ အသင်းကစားသမားအချို့ကို ရောင်းထုတ်လိုနေပြီး ယင်းထဲတွင် နေမာပါ ပါဝင်သည်ဟု သတင်းများထွက်နေသည်။
