ယူရို ၂၀၂၄ ခြေစစ်ပွဲအဖြစ် အီတလီနှင့်ကစားရသည့်ပွဲတွင် အင်္ဂလန်သည် အီတလီကို အဝေးကွင်းတွင် ၁-၂ ဖြင့်အနိုင်ရရှိခဲ့သည်။ ထိုပွဲတွင် အင်္ဂလန်အတွက် ဂိုးများကို ပွဲချိန် ၁၃ မိနစ်တွင် ရိုက်စ်နှင့် ပွဲချိန် ၄၃ မိနစ်တို့တွင် ဟယ်ရီကိန်းတို့က သွင်းယူလိုက်ခြင်းဖြစ်သည် အီတလီအတွက်ဂိုးကိုမူ ပွဲချိန် ၅၆ မိနစ်တွင် ရီတက်ဂူက သွင်းယူပေးနိုင်ခဲ့သည်။
လွန်ခဲ့သည့် ၁၀၃ ရက်က ဟယ်ရီကိန်းသည် ပြင်သစ်နှင့်ပွဲစဉ်တွင် အင်္ဂလန်အတွက်ပင်နယ်တီမှ တစ်ဆင့် တစ်ဂိုးသွင်းပြီး အင်္ဂလန်လက်ရွေးစင်အသင်းအတွက် ဂိုးအများဆုံးသွင်းသူအဖြစ်စံချိန်တင်ထားသော ရွန်နေးနှင့်သွင်းဂိုးအရေအတွက်တူဖြစ်ခဲ့သည်။ သို့သော် ထိုညတွင်ပင် ကိန်းသည် နောက်ထပ်ပင်နယ်တီ တစ်လုံးကန်ရာတွင်လွဲချော်ပြီး အင်္ဂလန်သည် ကမ္ဘာ့ဖလား ကွာတားဖိုင်နယ်မှ ထွက်ခဲ့ရသည်။
နေပယ်တွင်ကစားသော ယနေ့ညပွဲစဉ်တွင် ထိုစဉ်က အသည်းကွဲခဲ့ရသည်များကို ကိန်းက ကျော်ဖြတ်နိုင်ပြီဟု သက်သေ ပြနိုင်ခဲ့ကြောင်း မီဒီယာများက ဖော်ပြသည်။ ပွဲချိန် ၄၃ မိနစ်တွင် အင်္ဂလန်အသင်းရရှိသော ပင်နယ်တီကို ကိန်းက တည်ငြိမ်စွာဖြင့် ဂိုးအဖြစ် အသွင်ပြောင်းပေးနိုင်ခဲ့သည်။
ကိန်းသည် ယခုအခါတွင် အင်္ဂလန်အတွက် ၈၁ ပွဲကစားပြီး ၅၄ ဂိုးသွင်းကာ အင်္ဂလန်လက်ရွေးစင်အသင်းအတွက် ဂိုးအများဆုံးသွင်းသူအဖြစ် စံချိန်သစ်တင်နိုင်ခဲ့ခြင်းဖြစ်သည်။ ယခင်စံချိန်ကို ရွန်နေးက တင်ထားခဲ့ခြင်းဖြစ်သည်။ ရွန်နေးသည် အင်္ဂလန်အတွက် ပွဲပေါင်း ၁၂၀ ကစားပြီး ၅၃ ဂိုးသွင်းယူနိုင်ခဲ့ခြင်းဖြစ်သည်။
ထိုသို့စံချိန်သစ်တင်လိုက်နိုင်ပြီးနောက် အင်္ဂလန်ဂန္ထဝင်တိုက်စစ်မှူးဟောင်းများဖြစ်ကြသော လိုင်နီကာ၊ ရွန်နေး၊ ရှီးယားရားတို့နှင့်အတူ ကွင်းလယ်လူဂျရတ် ကပါ ကိန်းကို ချီးမွမ်းခဲ့ကြသည်။
