ပြီးခဲ့သည့်တစ်ပတ်က ဘုမ်းမောက်နှင့်ပွဲတွင် အာဆင်နယ်အသင်းက အနိုင်ဂိုးသွင်းနိုင်ပြိးနောက် အကြီးအကျယ်အောင်ပွဲခံခြင်းကို ဝေဖန်ခဲ့သူများအား ထိုသို့အောင်ပွဲခံသည့် အပြုအမူမျိုးကို မမြင်လိုပါက ဘောလုံးပွဲကို လာမကြည့်ဘဲ ဘုရားကျောင်းသို့သာသွားသင့်ကြောင်း အာဆင်နယ် အသင်းမန်နေဂျာအာတီတာက ဝေဖန်ပြောကြားလိုက်သည်။
ပွဲချိန် ၉၇ မိနစ်တွင် နယ်လ်ဆင်က အနိုင်ဂိုးသွင်းလိုက်ပြီးနောက် အာဆင်နယ်ကစားသမားများနှင့် ဝန်ထမ်းများက အကြီးအကျယ်အောင်ပွဲခံခဲ့ကြသည်။ နှစ်ဂိုးအရှုံးဖြင့်နောက်မှ လိုက်ကစားပြီးမှ အာတီတာတို့အသင်းက ၃-၂ ဖြင့် အီးမရိတ်တွင် အနိုင်ရခဲ့ခြင်းဖြစ်သည်။
ဂယ်ရီနဗီးအပါအဝင် အချို့က အာဆင်နယ်အသင်း၏ အောင်ပွဲခံမှုကို ဝေဖန်ခဲ့သည်။ သို့ရာတွင် အာတီတာက အာဆင်နယ်အသင်းဝင်များ၏ အောင်ပွဲခံမှုအတွက် ၎င်းအနေဖြင့် မည်သို့မျှ ပြဿနာမရှိကြောင်း ထုတ်ဖော်ပြောဆိုလိုက်သည်။
“ဘောလုံးကစားနေတာပါ။ အနိုင်ရရင် အောင်ပွဲခံမှာဘဲ ဖြစ်ပါတယ်။ စိတ်ရောကိုယ်ပါ အားပေးမှု တက်ကြွမှု အောင်ပွဲခံမှုတွေကို မြင်ချင်ရင်တော့ ဘောလုံးပွဲတစ်ပွဲကို ကြည့်ရှုပြီး ဂိုးသွင်းတဲ့အချိန်မှာ ဒါတွေခံစားရမှာဖြစ်ပါတယ်။ ဒါတွေကို မမြင်ချင်ဘူးဆိုရင်တော့ ဘုရားကျောင်းကိုပဲ သွားသင့်ပါတယ်။ တနင်္ဂနွေနေ့မှာ ကစားတဲ့ပွဲမှာလည်း အာဆင်နယ်အသင်းသားတွေ အောင်ပွဲခံမှုကို ထိန်းချုပ်ဖို့ ကျွန်တော့်မှာ ဘာအစီအစဉ်မှာမရှိပါဘူး”ဟု အာတီတာက ပြောဆိုလိုက်သည်။
အာဆင်နယ်အသင်းသည် ယနေ့ညတွင် လန်ဒန်မြို့ခံပြိုင်ဘက် ဖူလ်ဟမ်အသင်းနှင့်ကစားရမည်ဖြစ်သည်။ အာဆင်နယ်အသင်းသည် အမှတ်ပေးပွဲ ၄ ပွဲဆက်တိုက်အနိုင်ရရှိထားပြီး ကာလရှည်အနားယူနေရသော ဂျေဇုလည်း ယနေ့ညတွင် ပွဲချိန်မိနစ်အနည်းငယ်ပါဝင်ကစားဖွယ်ရှိနေသည်။
