ပြီးခဲ့တဲ့ နွေရာသီ အပြောင်းအရွှေ့ ဈေးကွက် အတွင်း ရက်ဒ်ဘူးလ် လစ်ပ်ဇစ် အသင်း ကနေ ချဲလ်ဆီး အသင်း ကို ယူရိုသန်း ၅၀ နဲ့ ပြောင်းရွှေ့လာခဲ့တဲ့ ဂျာမန် လက်ရွေးစင် တိုက်စစ်မှူး တီမို ဗာနာ ဟာ အခုအခါမှာ ဂျာမန်မြေမှာ ရခဲ့ဖူးတဲ့ ဂိုးသွင်းခြေမျိုး ပြန်ရဖို့ အထူး ရုန်းကန်နေရပါတယ် ။
ချဲလ်ဆီး သို့ မပြောင်းလာခင် က လစ်ပ်ဇစ် အသင်း ရဲ့ ကလပ် သမိုင်း တလျှောက် ဂိုးသွင်း အများဆုံး မှတ်တမ်း ကို ရိုက်ချိုးနိုင်ခဲ့တဲ့ ဗာနာ ဟာ လက်ရှိ အင်္ဂလန်မြေမှာတော့ ပြိုင်ပွဲစုံ နောက်ဆုံး ၁၄ပွဲမှာ သွင်းဂိုး တဂိုးသာ သွင်းယူထားနိုင်ခဲ့ပါတယ် ။
ပုံမှန်အားဖြင့် ချဲလ်ဆီး အသင်း ဟာ တိုက်စစ်မှူးတွေနဲ့ အစေးမကပ်တဲ့ ထိပ်တန်း ကလပ် တသင်း ဖြစ်တာနဲ့အညီ ၊ တီမို ဗာနာ မတိုင်ခင် ကတည်းက တိုက်စစ်မှူး သင်္ချိုင်း ကလပ် လို့ တင်စားရလောက်အောင် အထိ ကြေးကြီးပေး ခေါ်ယူခဲ့တဲ့ နံပါတ် ၉ နေရာ တိုက်စစ်မှူးတွေ ခြေစွမ်းမပြနိုင်ခဲ့တဲ့ သာဓကတွေ ရှိခဲ့ဖူးပါတယ် ။
တချိန် က ကလပ် စံချိန်တင် ပြောင်းရွှေ့ကြေးတွေနဲ့ ရောက်လာခဲ့ဖူးတဲ့ အန်ဒရေ ရှက်ဗ်ချန်ကို ၊ ဖာနန်ဒို တောရက်စ် ၊ အယ်လ်ဗာရို မိုရာတာ တို့ဟာ ဆိုးရွားလှတဲ့ ဂိုးသွင်းနှုန်း ကို ချဲလ်ဆီး အသင်းမှာ ရရှိခဲ့ပါတယ် ။ ဒီအထဲမှာ တောရက်စ် ကတော့ အထင်ကရ အဖြစ်ဆုံးလို့ ဆိုရမှာပါ ။
အောင်မြင်မှု အနေနဲ့ ချန်ပီယံလိဂ် ၊ ယူရိုပါလိဂ် ဖလား တွေကို တောရက်စ် တယောက် ချဲလ်ဆီး မှာ ရရှိခဲ့ပေမယ့် ၊ တဦးချင်း မှတ်တမ်းကတော့ စိတ်ပျက်စရာ ကောင်းခဲ့ပါတယ် ။ အနည်းဆုံးတော့ ပြင်းထန်တဲ့ ဒဏ်ရာကြောင့် တောရက်စ် ရဲ့ ချဲလ်ဆီး ကစားသမား ဘဝ ဟာ အကျည်းတန်ခဲ့ရတယ် လို့ နားလည်ပေးလို့ ရပါတယ် ။
လောလောဆယ် မှာ ပြိုင်ဖက် အသင်း ပရိသတ်တွေဟာ ဗာနာ ကို တောရက်စ် ၊ မိုရာတာ တို့လို အစွမ်းမပြနိုင်တဲ့ ချဲလ်ဆီး တိုက်စစ်မှူးတွေနဲ့ ခိုင်းနှိုင်းပြက်ရယ်ပြုနေကြပါတယ် ။ ချဲလ်ဆီး နည်းပြ ဖရန့် လမ်းပတ် ကတော့ ဗာနာ ကို သူနဲ့ တချိန်က အတူ တွဲကစားခဲ့ဖူးတဲ့ ဖာနန်ဒို တောရက်စ် နဲ့ ခိုင်းနှိုင်းဖို့ ငြင်းဆန်ခဲ့ပါတယ် ။
မနေ့ည က ပွဲကြို သတင်းစာ ရှင်းလင်းပွဲမှာ လမ်းပတ် က ” တီမို ကို ကျွန်တော် ဘယ်သူနဲ့မှ မနှိုင်းယှဉ်လိုပါဘူး ။ လူတိုင်းမှာ သူ့ဘဝ ဇာတ်ကြောင်းနဲ့ သူရှိပါတယ် ။ ဖာနန်ဒို ဟာ ချဲလ်ဆီး မှာ ခက်ခဲတဲ့ အချိန် ကာလ တရပ် ကို ကျော်ဖြတ်ခဲ့ရပေမယ့် ၊ ချန်ပီယံလိဂ် အောင်မြင်မှု ရခဲ့ပါတယ် ။ ဒီတော့ သူတို့ ၂ယောက် ကို ကျွန်တော်တို့ အလွန်အကျွံ ခိုင်းနှိုင်းလို့ မရပါဘူး ။ ”
” ကျွန်တော် အပါအဝင် ချဲလ်ဆီး အသင်း နဲ့ သက်ဆိုင်တဲ့သူတွေ အားလုံး လောလောဆယ် မှာ တီမို ကို စိတ်သက်သာရာ ရစေမယ့် ၊ ယုံကြည်မှု ပိုမို မြင့်တက်စေမယ့် အကောင်းဆုံး ပတ်ဝန်းကျင် ကို ဖန်တီးပေးဖို့ ကြိုးစားရမှာ ဖြစ်ပါတယ် ။ ဒါဟာ သူကိုယ်တိုင် ပြင်းပြင်းထန်ထန် ကြိုးစားရမယ့် အရေးနဲ့လည်း သက်ဆိုင်ပါတယ် ။ ”
” တိုက်စစ်မှူးတိုင်း ဒီလို အခိုက်အတန့်မျိုး ကို သိကြပါတယ် ။ ပွဲတပွဲမှာ အခွင့်အရေးကောင်း တခု ကို အဆုံးမသတ်နိုင်ခဲ့ရင် ၊ နောက်ပွဲအတွက် လေ့ကျင့်ရေးကွင်းမှာ အကြိမ်ကြိမ် ထပ်မံ လေ့ကျင့်ရမှာ ဖြစ်ပါတယ် ။ အကြိမ် ထောင်သောင်းမက ခင်ဗျား အနေနဲ့ လေ့ကျင့်ပါစေ ၊ ဒီလို ရုန်းကန်ရတဲ့ အခိုက်အတန့်မျိုး လူတိုင်း ကျော်ဖြတ်ရတတ်ပါတယ် ။ ”
” ဒါပေမယ့် ဒီလို ရုန်းကန်နေရစဉ် အတွင်း ခင်ဗျား အနေနဲ့ ထပ်ခါတလဲလဲ ပြင်းပြင်းထန်ထန် ကြိုးစားနေရပါမယ် ။ နောက်ပြီး ခင်ဗျား ရဲ့ ဘေးနားမှာ ထောက်ခံမှု ၊ ပံ့ပိုးမှုတွေ ပေးမယ့် မိတ်ဆွေတွေ လိုပါတယ် ။ လောလောဆယ် မှာ တီမို အနေနဲ့ ခေါင်းမော့ရင်ကော့ပြီး ၊ ကိုယ့်ရဲ့ လေ့ကျင့်မှု မှာပဲ အာရုံဆက်စိုက်ဖို့ လိုပါတယ် ။ ”
” ကျွန်တော့ အလုပ် က သူ့ကို ဆက်လက် အားပေး ထောက်ခံပေးဖို့ နဲ့ အပေါင်း လက္ခဏာ ဆောင်တဲ့ တိုက်တွန်းမှုတွေ နဲ့ ယုံကြည်မှု တက်လာအောင် ကြံဆောင်ပေးဖို့ ဖြစ်ပါတယ် ။ တီမို ဟာ ပြီးခဲ့တဲ့ ဘောလုံး ရာသီ အနည်းငယ် အတွင်း ဂျာမန်မြေမှာ ရခဲ့တဲ့ သွင်းဂိုးတွေ ကို ကံတရား ရဲ့ ဖေးမမှု နဲ့ သွင်းခဲ့တာ မဟုတ်ပါဘူူး ။ သူ့မှာ ကိုယ်ပိုင် အရည်အချင်း ရှိလို့ ဒီလို ဂိုးတွေ ဖြစ်လာခဲ့တာပါ ။ ”
” လောလောဆယ် သူ ကျော်ဖြတ်နေရတဲ့ ခက်ခဲတဲ့ အခိုက်အတန့် ဆိုတာ တိုတောင်းတဲ့ ကာလ တခုသာ ဖြစ်ပါတယ် ။ ဒီ အချိန် အပိုင်းအခြားလေးကပဲ သူ့ကို ချဲလ်ဆီး အသင်း မှာ အံ့သြဖွယ် အနာဂတ် ကစားသမား ဘဝ တခု အဖြစ် ဖန်တီးပေးနိုင်မယ် လို့ ကျွန်တော် ယုံကြည်ပါတယ် ။ ဒီအတွက် ကျွန်တော် လုံးဝ သံသယမဝင်မိပါဘူး ။ လူတွေလည်း ကျွန်တော် မြင်သလို ၊ တီမို အပေါ် မြင်ကြဖို့ မျှော်လင့်ပါတယ် ။ ” လို့ ပြောကြားခဲ့ပါတယ် ။
