၂၀၂၂ ကမ္ဘာ့ဖလားမတိုင်ခင်ကာလမှာ ခြေစွမ်းရော၊ ရလဒ်ပါကျဆင်းခဲ့တဲ့ ဥရောပထိပ်တန်းကလပ်အသင်းတွေအများအပြားရှိခဲ့တယ်ဆိုပေမဲ့ ဒီအထဲမှာ ပရိသတ်တွေ သတိအထားမိဆုံးနဲ့ စိတ်ပျက်စရာကောင်းအောင်ကျဆင်းခဲ့ရတဲ့အသင်းဆိုရင်တော့ ပရီးမီးယားလိဂ်ကလပ်ချယ်လ်ဆီးအသင်းပဲဖြစ်ပါလိမ့်မယ်။ ၂၀၂၁ ခုနှစ်မှာ နည်းပြဟောင်း တူဟယ်လ်ရဲ့ဦးဆောင်မှုနဲ့အတူ ချန်ပီယံလိဂ်၊ ဥရောပစူပါဖလားနဲ့ ကလပ်ကမ္ဘာ့ဖလားတွေကိုရယူပြီး ဘောလုံးကမ္ဘာကို မော်ကြွားစွာ လွှမ်းမိုးနိုင်ခဲ့တဲ့ချယ်လ်ဆီးအသင်းဟာ လက်ရှိအချိန်မှာတော့ ရှုထောင့်ပေါင်းစုံက အနုတ်လက္ခဏာပြမှုတွေနဲ့အတူ အံ့အားသင့်စရာကောင်း လောက်အောင်ပဲ ပြိုပျက်ကြေမွသွားခဲ့ရတာပါ။
