မေဆင်ဂရင်းဝုဒ်ကို မန်ယူစီနီယာအသင်းကြီးတွင် ပြန်သုံးရေးနှင့် ပတ်သက်၍ မန်ယူအသင်းသားများ အကြားတွင် အမြင်မတူ သဘောထားကွဲလွဲမှုများဖြစ်ပေါ်နေသည်။ ဂရင်းဝုဒ်သည် ပြစ်ဒဏ်ချမှတ် ခံရခြင်းမရှိသော်လည်း ၎င်းကို အသင်းတွင် ပြန်သုံးရေးနှင့်ပတ်သက်၍ မန်ယူ အသင်းက ဌာနတွင်း စုံစမ်းစစ်ဆေးမှုများကို ပြလုပ်နေသည်။
အသက် ၂၁ နှစ်အရွယ်ရှိ ဂရင်းဝုဒ်သည် မန်ယူအသင်းစာရင်းတွင် ယခုအချိန်အထိ စာရင်းဝင်ဆဲ ဖြစ်နေသော်လည်း အချို့ကစားသမားများက ၎င်းကို အသင်းတွက်ပြန်ကစားစေလိုပြီး အချို့ကလည်း အဆိုပါ အိုင်ဒီယာကို သဘောမကျဖြစ်နေကြောင်း ဗြိတိန်မီဒီယာတစ်ခုက ဖော်ပြသည်။
မန်ယူအမျိုးသမီး အသင်းသားအချို့ကလည်း ဂရင်းဝုဒ်ကို အသင်းတွင်ပြန်သုံးရေးနှင့်ပတ်သက်ပြီး သဘောမတူမှုများရှိကြောင်း သတင်းများထွက်ပေါ်နေသည်။ မန်ယူအသင်းမန်နေဂျာ တန်းဟက်ကလည်း ဂရင်းဝုဒ်နှင့်ပတ်သက်သော မေးခွန်းများကို မည်သို့မျှ ဖြေကြားခြင်းမရှိသေးချေ။
ဂရင်းဝုဒ်သည် အသက် ၆ နှစ်အရွယ်ကတည်းက မန်ယူအသင်းသို့ ရောက်ရှိလာခြင်းဖြစ်ပြီး ၂၀၁၉ တွင်အသင်းအတွက်ပထမဆုံးအကြိမ် စီနီယာအသင်းကြီးတွင်ပါဝင်ကစားခဲ့သည်။ အင်္ဂလန်လက်ရွေးစင်အဖြစ်လည်း တစ်ကြိမ်ရွေးချယ်ခံခဲ့ရသည်။
