ချဲလ်ဆီး နှင့် မန်ချက်စတာစီးတီး အသင်းတို့ဟာ အာဆင်နယ် အသင်း ရဲ့ လူငယ် ကြယ်ပွင့် အီသန် နွမ်နယ်ရီ ကို ခေါ်ယူဖို့ စိတ်ဝင်စား နေကြပြီး အပြိုင်အဆိုင် ကြိုးပမ်း နေကြပါတယ် ။ နွမ်နယ်ရီ ဟာ ပြီးခဲ့တဲ့နှစ် စက်တင်ဘာလမှာ အာဆင်နယ် အသင်းကြီးအတွက် လူစားဝင် ကစားပြီး ပရီးမီးယားလိဂ် သမိုင်းတစ်လျှောက် အသက် အငယ်ဆုံး ကစားသမား အဖြစ် စံချိန်သစ် တင်ခဲ့သူ ဖြစ်ပါတယ် ။
အဲ့ အချိန်တုန်း က နွမ်နယ်ရီ ဟာ အသက် ၁၅ နှစ် နှင့် ၁၈၁ ရက်သာ ရှိသေးပြီး အနာဂတ်မှာ တောက်ပလာမယ့် ကြယ်ပွင့် ကစားသမား တစ်ဦး အဖြစ် သတ်မှတ် ခံထားရသူပါ ။ အာဆင်နယ် အသင်းကလည်း နွမ်နယ်ရီ ကို အသင်းမှာ ဆက်လက် ထိန်းသိမ်းထားချင်နေပြီး စကောလားရှစ် စာချုပ်မှာ လက်မှတ်ထိုးဖို့ မက်လုံးပေး ဆွဲဆောင် စည်းရုံး နေပါတယ် ။
နွမ်နယ်ရီ ကို ဆက်လက် စာချုပ် ချုပ်ဆိုနိုင်ဖို့ရာ အကယ်ဒမီ မန်နေဂျာ မာတီဆက်ကာ နှင့် အားကစား ဒါရိုက်တာ အီဒူး တို့ နှစ်ဦးစလုံး ပါဝင် ဆွေးနွေး ပြောဆိုနေကြတယ်လို့လည်း သိရပါတယ် ။ အာဆင်နယ် အသင်းဟာ နွမ်နယ်ရီ ကို အသင်းကြီးမှာ ကစားခွင့် ရအောင် ဘယ်လို စီမံ ဆောင်ရွက်ပေးမလဲ ဆိုတာပါ ပြောပြပြီး ဆွဲဆောင် စည်းရုံးနေတာ ဖြစ်ပါတယ် ။
နွမ်နယ်ရီ ဟာ အာဆင်နယ် အသင်းကြီးနဲ့ အတူ မကြာခဏ လေ့ကျင့်ခန်း ဆင်းနေသူ ဖြစ်ပြီး ၊ ဒီဇင်ဘာလတုန်းက ဒူဘိုင်း မှာ သွားလေ့ကျင်တဲ့ လေ့ကျင့်ရေး အစီအစဉ်မှာလည်း ပါဝင်ခွင့် ရခဲ့ပါတယ် ။ ချဲလ်ဆီး နှင့် မန်စီးတီး နှစ်သင်းစလုံးကတော့ အကယ်ဒမီ ကစားသမားတွေကို လစာ များများပေးတတ်တဲ့ အသင်းတွေ ဖြစ်တာကြောင့် နွမ်နယ်ရီ တစ်ယောက် ဘယ်အသင်းကို ရွေးချယ်မလဲ ဆိုတာ ဆက်လက် စောင့်ကြည့်ရမှာပါ ။ ချဲလ်ဆီး အသင်းဟာ မနှစ်ကလည်း ဂန်းနား ကြယ်ပွင့် ဟက်ချင်ဆန် ကို ခေါ်ယူ ခဲ့ပါသေးတယ် ။
