ဂန်းနားတို့ အိမ်ကွင်းမှာ ဂိုးပြတ်အနိုင်ရပြီး အုပ်စု ပထမနေရာကို သိမ်းပိုက်ခဲ့တဲ့ (အာဆင်နယ် ၄-၁ ရက်ပစ်ဝီယန် ) ပွဲမှ ထူးထူးခြားခြား ပြောစရာ ဖြစ်ခဲ့တဲ့ အချက် ၁၀ ချက်

ယနေနံနက်အစောပိုင်းမှာ ကစားခဲ့တဲ့ ယူရိုပါလိဂ် အုပ်စု ပွဲစဉ် (၅) မှာတော့ အိမ်ရှင် အာဆင်နယ် အသင်းဟာ ဩစတီးယား ကလပ် ရက်ပစ် ဗီယင်နာ အသင်းကို လေးဂိုးတစ်ဂိုး နဲ့ ဂိုးပြတ် အနိုင်ရသွားခဲ့ပါတယ် ။

အာဆင်နယ် အသင်း အတွက် ဂိုးတွေကိုတော့ ပွဲချိန် ၁၀ မိနစ်မှာ လာကာဇက် ၊ ပွဲချိန် ၁၈ မိနစ်မှာ ပါဘလို မာရီ ၊ ပွဲချိန် ၄၄ မိနစ်မှာ အန်ခီတီးယား နဲ့ ပွဲချိန် ၆၆ မိနစ်မှာ စမစ်ရို တို့က သွင်းယူ ပေးခဲ့တာပါ ။ ရက်ပစ်ဗီယင်နာ အသင်း အတွက် ဂိုးကိုတော့ ကီတာဂါဝါ က သွင်းယူ ခဲ့တာ ဖြစ်ပါတယ် ။

အာဆင်နယ် ၄-၁ ရက်ပစ် ဝီယန် ပွဲမှ ထူးထူးခြားခြား ပြောစရာ ဖြစ်ခဲ့တဲ့ အချက် ၁၀ ချက်ကို ဖော်ပြ ပေးလိုက်ပါတယ် ။

၁ ။ ပရိသတ် ၂၀၀၀ ၊ ဂန်းနားဆောရက်စ် နဲ့ Bring back Mesut

ကိုဗစ်-၁၉ ကြောင့် အင်္ဂလန်မှာ ပရိသတ်မပါတဲ့ ဘောလုံးပွဲတွေ ကြည့်ရတာ အတော်လေး ကြာနေခဲ့ပါပြီ ။ ဒီကနေ့မှာတော့ အာဆင်နယ် ပရိသတ် ၂၀၀၀ ဟာ အမ်းမရိတ်ကွင်းထဲမှာ ဝင်ရောက် ကြည့်ရှုခွင့် ရခဲ့ပါတယ် ။ ပရိသတ်တွေ ပြန်ရောက်လာတာနဲ့ အ​တူ အာဆင်နယ် အသင်း လာဘ်ကောင် ဂန်းနား ဆောရက်စ်ကိုလည်း ပြန်မြင်တွေ့ ခဲ့ရပါတယ် ။

ထူးထူးခြားခြား အနေနဲ့ အာဆင်နယ် ပရိသတ် တစ်ဦး ဟာ မီဆွတ် အိုဇေးလ် ကို အသင်း လူစာရင်း မှာ ပြန်လည် ထည့်သွင်းဖို့ ‘ Bring back Mesut ‘ ဆိုတဲ့ ဆိုင်းဘုတ် ကို ကိုင်ဆောင်ကာ အားပေး ခဲ့တာကိုလည်း တွေ့ရပါတယ် ။ ဂိုးသွင်းအပြီး အာဆင်နယ် ကစားသမားတွေဟာ ပရိသတ်တွေ ရှေ့မှောက်မှာ ပြန်လည် အောင်ပွဲ ခံခွင့် ရခဲ့ပြီ ဖြစ်ပါတယ် ။

၂ ။ ဂိုးပေါက်ပြန်တွေ့တဲ့ လာကာဇက်

ဒီနေ့ပွဲမှာ အာဆင်နယ် အသင်း ခေါင်းဆောင် အဖြစ် ပွဲထွက် လာခဲ့တဲ့ လာကာဇက် ဟာ လှပတဲ့ အဝေးကန်ချက် နဲ့ အတူ စက်တင်ဘာလ နောက်ပိုင်း ပထမဆုံး သွင်းဂိုးကို ပြန်လည် ရရှိ ခဲ့ပါတယ် ။ လာကာဇက် ဟာ ၆၇ ရက် အကြာမှာမှ ဂိုးပေါက် ပြန်တွေ့ တာလည်း ဖြစ်ပါတယ် ။

လာကာဇက် ဟာ ဒီနေ့ပွဲမှာ no 10 role နေရာမှာ လုပ်အားနှုန်း ကောင်းကောင်း နဲ့ ကစားသွားခဲ့ပြီး ကွင်းလယ် ၊ နောက်တန်း အထိ ဘောလုံး ဆင်းယူတာမျိုးတွေ့ရသလို တိုက်စစ်ကိုလည်း အကောင်းဆုံး ဦးဆောင် ခဲ့ပါတယ် ။ လာကာဇက် တစ်ယောက် လူစားလဲ ခံရချိန်မှာ ပရိသတ်တွေ မတ်တပ်ရပ် ဂုဏ်ပြု အားပေးခဲ့ကြတာကလည်း ကြည်နူးစရာ မြင်ကွင်း တစ်ခုပါပဲ ။

၃ ။ သွင်းဂိုး နဲ့ အတူ ပြန်လာတဲ့ ပါဘလိုမာရီ

စပိန်သားကြီး ပါဘလိုမာရီ ဟာ ဒဏ်ရာကြောင့် ခြောက်လကျော် အနားယူ နေရာကနေ ဒီနေ့ပွဲမှာ အာဆင်နယ် အသင်းကြီး အတွက် ပြန်လည် ပွဲထွက် ကစားခွင့် ရခဲ့ပါတယ် ။ မာရီ အတွက် ဒီရာသီ ပထမဆုံးပွဲ ဖြစ်ပြီး ၊ ပွဲစပြီး ၁၈ မိနစ်အကြာမှာတင် နယ်လ်ဆင် ရဲ့ ထောင့်ကန်ဘောကနေ ပေးပို့မှုကို ခေါင်းတိုက်ကာ သူ့ရဲ့ အာဆင်နယ် ကစားသမား ဘဝ ပထမဆုံး သွင်းဂိုး ရရှိ သွားခဲ့ပါတယ် ။

၄ ။ ရက်ပေါင်း ၇၃၅ ရက် အကြာမှာ အာဆင်နယ် အတွက် ဂိုးပြန်သွင်းတဲ့ စမစ်ရို

လာကာဇက် နေရာမှာ လူစားဝင် ကစားတဲ့ စမစ်ရို ဟာ လူစားဝင်ပြီး ၃ မိနစ် အကြာမှာပဲ မိတ်လန်နိုင်းလ်စ် ရဲ့ ပေးပို့မှုကနေ အာဆင်နယ် အတွက် စတုတ္တမြောက် ဦးဆောင်ဂိုး သွင်းယူ ပေးခဲ့ပါတယ် ။ စမစ်ရို အတွက်တော့ ဗော့ဆကာ အသင်း နဲ့ ယူရိုပါလိဂ် ပွဲမှာ ဂိုးသွင်း နိုင်ခဲ့တဲ့ ပြီးနောက် ရက်ပေါင်း ၇၃၅ အကြာမှာ အာဆင်နယ် အသင်းကြီးအတွက် ဂိုးပြန်သွင်း နိုင်ခဲ့တာပါ ။

၅ ။ တစ်နှစ်နီးပါးအကြာမှာ အာဆင်နယ် အတွက် ပြန်ကစားပေးနိုင်ခဲ့ပြီ ဖြစ်တဲ့ ချိန်ဘာ

မနှစ်က ဒီဇင်ဘာလတုန်းက ချဲလ်ဆီး နဲ့ ပွဲမှာ ရရှိခဲ့တဲ့ ဒဏ်ရာကြောင့် ချိန်ဘာ ဟာ ကာလ အတန်ကြာ အနားယူ နေခဲ့ရသူပါ ။ ဒီကနေ့ပွဲမှာတော့ ချိန်ဘာ ဟာ မူစတာဖီ နေရာမှာ လူစားဝင် ကစားခဲ့ပြီး ၂၀၂၀ ခုနှစ် အတွင်းမှာ အာဆင်နယ် အသင်းကြီး အတွက် ပထမဆုံး ကစားတဲ့ ပွဲလည်း ဖြစ်ပါတယ် ။ Welcome Back Chamber !!!

၆ ။ နယ်လ်ဆင် ကို ပရီးမီးယားလိဂ်မှာ ပွဲထွက် ကစားခွင့် ပေးသင့်ပြီလား

နယ်လ်ဆင် ဟာ ပြီးခဲ့တဲ့ တစ်ပတ် က မိုလ်ဒီ နဲ့ ပွဲမှာ ခြေစွမ်းပြ ကစား ခဲ့သလို ဒီနေ့ပွဲမှာ အထင်ကြီးလောက် စရာ စွမ်းဆောင်ရည်မျိုး ပြသ နိုင်ခဲ့ပါတယ် ။ နယ်လ်ဆင် ဟာ ရက်ပစ် ဝီယန် နဲ့ ပွဲမှာ ဘောလုံးပေးပို့မှု တိကျမှု ၁၀၀ % ၊ ဘောလုံး ထိချက် အကြိမ် ၄၀ ၊ ဖြတ်တင်ဘော ၆ ကြိမ် ၊ ဂိုးသွင်းခွင့် ဖန်တီးနိုင်မှု ၅ ကြိမ် ၊ ဂိုးကန်သွင်းချက် ၁ ကြိမ် ၊ ဂိုးဖန်တီးမှု တစ်ကြိမ် ပြုလုပ် နိုင်ခဲ့ပါတယ် ။

၇ ။ ပွဲချိန်အတွင်း ကပ္ပတိန် သုံးယောက် အထိ ပြောင်းလဲ ခဲ့တဲ့ အာဆင်နယ်

ရက်ပစ်ဗီယင်နာ နဲ့ ပွဲမှာ အာဆင်နယ် အသင်းရဲ့ အသင်း ခေါင်းဆောင် အဖြစ် ပွဲထွက်လာခဲ့သူက တိုက်စစ်မှူး လာကာဇက် ပါ ။ လာကာဇက် လူစားလဲ ခံရချိန်မှာတော့ နောက်ခံလူ မူစတာဖီ ဟာ အသင်း ခေါင်းဆောင် လက်ပတ် ကို လွှဲပြောင်း ရယူ ခဲ့ပါတယ် ။ မူစတာဖီ လည်း လူစားလဲ ခံလိုက်ရတာကြောင့် အသင်းခေါင်းဆောင် လက်ပတ်ကို ပါဘလို မာရီ က ထပ်မံ လက်ခံ ရယူ ခဲ့ပါတယ် ။

၈ ။ ယူရိုပါလိဂ် ပြိုင်ပွဲမှာ ရာနှုန်းပြည့် နိုင်ပွဲ ရယူထားတဲ့ အာဆင်နယ်

အာဆင်နယ် အသင်းဟာ ဒီနေ့ နိုင်ပွဲကြောင့် ယူရိုပါလိဂ် ၅ ပွဲ ကစားအပြီးမှာ ငါးပွဲနိုင် ၊ သွင်းဂိုး ၁၆ ဂိုး ၊ ပေးဂိုး ၃ ဂိုး နဲ့ အုပ်စု ပထမ နေရာကနေ နောက်တစ်ဆင့်ကို တက်လှမ်း သွားခဲ့ပြီ ဖြစ်ပါတယ် ။ အာဆင်နယ် အသင်းအတွက် ၂၀၀၅-၀၆ ခုနှစ် နောက်ပိုင်း ပထမဆုံး အကြိမ်ဥရောပ ပြိုင်ပွဲမှာ အုပ်စု အဆင့် အဖွင့် ပွဲစဉ် ငါးပွဲဆက် အနိုင်ရတာလည်း ဖြစ်ပါတယ် ။ ၂၀၀၅-၀၆ ခုနှစ်တုန်းက အာဆင်နယ် အသင်းဟာ ချန်ပီယံလိဂ် ဖိုင်နယ် အထိ တက်လှမ်းခဲ့ပါတယ် ။

၉ ။ အာဆင်ဝင်းဂါး ခေတ်လွန် အာဆင်နယ် အသင်းရဲ့ ဂိုးပေါက်တည့်ကန်ချက် အများဆုံးပွဲ

အာဆင်နယ် အသင်းဟာ ရက်ပစ်ဝီယန် အသင်း နဲ့ ပွဲမှာ ဂိုးပေါက်တန့် ကန်ချက် ၁၁ ကြိမ် အထိ ရှိခဲ့ပြီး ၊ ဒါဟာ အာဆင်ဝင်းဂါး ထွက်ခွာ သွားပြီး နောက်ပိုင်း အများဆုံး စံချိန်လည်း ဖြစ်ပါတယ် ။

အာဆင်နယ် အသင်းဟာ ယူရိုပါလိဂ် ငါးပွဲ အပြီးမှာ ဂိုးပေါက်တည့် ကန်ချက် ၃၄ ကြိမ် အထိ ရှိပြီ ဖြစ်ပြီး ပရီးမီးယားလိဂ် မှာတော့ ၁၀ ပွဲ ကစားအပြီးမှာ ဂိုးပေါက်တည့် ကန်ချက် ၃၂ ကြိမ်သာ ရှိပါသေးတယ် ။

၁၀ ။ ယူရိုပါလိဂ် အိမ်ကွင်း နှစ်ပွဲဆက် ၄ ဂိုး သွင်းတဲ့ အာဆင်နယ်

အာဆင်နယ် အသင်း ဟာ နောက်ဆုံး ကစားခဲ့တဲ့ ယူရိုပါလိဂ် အိမ်ကွင်း နှစ်ပွဲဆက် ၄-၁ ဆိုတဲ့ တူညီရလဒ် နဲ့ ဂိုးပြတ် အနိုင် ရခဲ့ပြီး အသင်း သမိုင်းတစ်လျှောက် ပထမဆုံး အကြိမ် ယူရိုပါလိဂ် ပြိုင်ပွဲမှာ အိမ်ကွင်း နှစ်ပွဲဆက် ၄ ဂိုး သွင်းယူ နိုင်ခဲ့တာ ဖြစ်ပါတယ် ။