ကမ္ဘာ့ဖလားပြိုင်ပွဲတွင် ခြေစွမ်းပြနိုင်မှုကြောင့် ဥရောပထိပ်တန်းကလပ်များ၏ အဓိကပစ်မှတ်ဖြစ်လာသည့် PSV တိုက်စစ်ကစားသမား ဂက်ပိုကို ယခုရာသီကုန်အထိ အသင်းတွင် ဆက်ထိန်းနိုင်ရန် နည်းပြ နစ္စတယ်ရွိုင်းက မျှော်လင့်လျက်ရှိသည်။
အသက် (၂၃)နှစ်အရွယ်ရှိ ဂက်ပိုသည် ပြီးခဲ့သည့်နွေရာသီကတည်းက မန်ယူ၊ လိဒ်စ်၊ ဆောက်သမ်တန်စသည့် ပရီးမီးယားလိဂ်ကလပ်များနှင့် သတင်းထွက်ခဲ့ပြီး ယခုအခါ ၎င်းအားချိန်ရွယ်နေသည့် ကလပ်အသင်းမှာ ပိုမိုများပြားလာခဲ့သည်။
လက်ရှိတွင် စီရော်နယ်လ်ဒိုနှင့် လမ်းခွဲပြီးနောက် အသင်းတိုက်စစ်ပိုင်းကို အားဖြည့်ပြင်ဆင်မှုများပြုလုပ်မည့် မန်ယူအသင်းက ဂက်ပိုအား ခေါ်ယူရန် ရေပန်းအစားဆုံးဖြစ်နေပြီး PSV အသင်းက ဂက်ပို၏ ပြောင်းရွှေ့ကြေးအတွက် ပေါင်သန်း (၅၀)ဝန်းကျင်အထိ အလိုရှိနေသည်။
ဂက်ပိုသည် ကမ္ဘာ့ဖလားပြိုင်ပွဲတွင် (၃)ဂိုး သွင်းယူခဲ့ပြီး PSV အသင်းအတွက်လည်း ပြိုင်ပွဲစုံ (၁၂)ဂိုးနှင့် ဂိုးဖန်တီးမှု (၁၄)ကြိမ် ပြုလုပ်ပေးထားသည်။
