ဘာစီလိုနာအသင်းသည် Official Store တွင် ဆီဗီလာအသင်းမှ ပြင်သစ်နောက်ခံလူ ခွန်ဒဲအမည်ပါဂျာစီကို အရောင်းစာရင်းတင်ပြီးမှ ပြန်ဖျက်ခဲ့ကြောင်း သိရသည်။ ခွန်ဒဲသည် ဘာစီလိုနာအသင်းသို့သာ ပြောင်းရွှေ့ရန် ဆန္ဒပြင်းပြနေပြီး ချယ်လ်ဆီး နှင့် အပြိုင်ကြိုးပမ်းခဲ့ရသော်လည်း ဘာစီလိုနာက လက်ဦးမှုရယူနိုင်ခဲ့ခြင်းဖြစ်သည်။
အစောပိုင်းကလည်း ချယ်လ်ဆီးအသင်းသည် လိဒ်စ်အသင်းမှ ဘရာဇီးလ်တောင်ပံကစားသမား ရာဖင်ညာအား ဘာစီလိုနာနှင့် အပြိုင်ကြိုးပမ်းရာ၌ အရေးနိမ့်ခဲ့သဖြင့် အပြောင်း အရွှေ့ကာလတစ်ခုအတွင်း ပစ်မှတ်ကစားသမား နှစ်ဦးအထိ ဆုံးရှုံးခဲ့ရခြင်းဖြစ်သည်။
ချယ်လ်ဆီးအနေဖြင့် ခွန်ဒဲကို ပြောင်းရွှေ့ ကြေး ပေါင် ၅၅ သန်းဖြင့် ခေါ်ယူရန် ကြိုးပမ်းခဲ့ခြင်းဖြစ်ကြောင်း Daily Mail က ဖော်ပြခဲ့သည်။ ခွန်ဒဲသည် ပြီးခဲ့သည့်နှစ်နှင့် ယခုနွေ ရာသီ အစောပိုင်းကာလများက ချယ်လ်ဆီး၏ ပစ်မှတ်ဖြစ်ခဲ့ပြီး နောက်ပိုင်းတွင် ကူလီဘလီ၊ ဘိုင်ယန်ပြောင်းသွားသည့် ဒီလစ်နှင့် မန်စီးတီးနောက်ခံလူ နာသန်အကီတို့ကို ကြိုးပမ်းခဲ့ခြင်းဖြစ်သည်။ ယင်းကစားသမားများအနက် ကူလီဘလီတစ်ဦးကိုသာ ခေါ်ယူနိုင်ခဲ့သဖြင့် နောက်ဆုံးတွင် ခွန်ဒဲကို ပြန်လည်စိတ်ဝင်စားလာခဲ့ကြောင်း သိရသည်။
ဘာစီလိုနာအသင်းနည်းပြ ဇာဗီက ခွန်ဒဲ၏အပြောင်းအရွှေ့နှင့်ပတ်သက်ပြီး “အသင်းလူစာရင်းကို တိုးတက်အောင် ကျွန်တော်တို့ လုပ်ဆောင်နေပါတယ်။ ဘုတ်အဖွဲ့လည်း အလုပ်လုပ်နေပါတယ်။ (ခွန်ဒဲအကြောင်း) ဒီထက်တော့ ပိုမပြောနိုင်ပါဘူး။ ကျွန်တော်တို့ ကြေညာဖို့ ရှိလာရင်တော့ သတင်းထုတ်ပြန်မှာပါ”ဟု ပြောကြားခဲ့သည်။
