ချယ်လ်ဆီးသို့ ပြောင်းရွှေ့ရန်အတွက် အင်တာမီလန်တိုက်စစ်မှူး လူကာကူ ယမန်နေ့က မီလန်မှ ထွက်ခွာသွားပြီဖြစ်ကြောင်း မီဒီယာများ ဖော်ပြ

အင်တာမီလန်အသင်း၏တိုက်စစ်မှူး လူကာကူသည် ချယ်လ်ဆီးအသင်းနှင့် အပြောင်းအရွှေ့ကိစ္စဆောင်ရွက်ရန်အတွက် ပြီးခဲ့သည့်တနင်္လာနေ့က မီလန်မြို့မှ ထွက်ခွာသွားပြီဖြစ်ကြောင်း မီဒီယာများက ဖော်ပြခဲ့သည်။

ချယ်လ်ဆီးအသင်းသည် တိုက်စစ်မှူးဟောင်း လူကာကူကို ပြောင်းရွှေ့ကြေးပေါင် (၉၇.၅)သန်းဖြင့် သဘောတူညီမှုရရှိခဲ့ခြင်းဖြစ်ကြောင်း သိရသည်။

ထို့ပြင် တနင်္လာနေ့နံနက်ပိုင်းက မီလန်မြို့တွင် ဆေးစစ်မှုလုပ်ဆောင်ရာတွင်လည်း အောင်မြင်ခဲ့သည့်အတွက် ယင်းအပြောင်းအရွှေ့မှာ သေချာပေါက်ဖြစ်မြောက်တော့မည်ဟုလည်း သိရသည်။

လူကာကူ(၂၈ နှစ်)သည် ချယ်လ်ဆီးအသင်းတွင် အခွန်ဆောင်ပြီးလစာ တစ်ပတ် ပေါင် (၂၀၀၀၀၀) ဝန်းကျင် ရရှိမည်ဖြစ်ပြီး (၅)နှစ်စာချုပ် ချုပ်ဆိုသွားမည်ဟုလည်း ဖော်ပြခဲ့ကြသည်။

မီဒီယာအချို့က လူကာကူအနေဖြင့် ဆေးစစ်ဆေးမှုပြုလုပ်ပြီး ပြန်လည်ထွက်ခွာလာရာတွင် ချယ်လ်ဆီးအသင်း၏အကျႌကို ယူဆောင်လာခြင်းကြောင့် အပြောင်းအရွှေ့ဖြစ်မြောက်ပြီဟူသည့်အဓိပ္ပာယ်ဖြစ်ကြောင်း သုံးသပ်ဖော်ပြခဲ့ကြသည်။

အပြောင်းအရွှေ့ကျွမ်းကျင်သူ ဖာဘရီဇီယိုရိုမာနိုကလည်း လူကာကူသည် ဆေးစစ်ပြီး မိနစ် (၃၀)အကြာတွင် မီလန်လေဆိပ်မှ ထွက်ခွာသွားကြောင်း၊ အပြောင်းအရွှေ့အတည်ပြုမှုကို ယခုရက်သတ္တပတ်အတွင်း ကြေညာဖွယ်ရှိကြောင်း Twitter တွင် ရေးသားခဲ့သည်။

အင် တာမီလန်အသင်း၏ အမာခံပရိသတ်အချို့ကမူ လူကာကူကို ဒေါသထွက်နေပြီး ငွေမက်သူဟု စွပ်စွဲခဲ့ကြောင်း သိရသည်။