ချယ်လ်ဆီးအသင်းသည် လက်စတာအသင်းမှ ပြင်သစ်နောက်ခံလူ ဖိုဖာနာကို ခုနစ်နှစ်သက်တမ်းရှိစာချုပ်ဖြင့် ခေါ်ယူခဲ့ကြောင်း အတည်ပြုကြေညာခဲ့သည်။ အသက် ၂၁ နှစ်အရွယ်ရှိ ဖိုဖာနာ၏ပြောင်းရွှေ့ကြေး မှာ ယူရို ၈၂ ဒသမ ၅ သန်း(ပေါင် သန်း ၇၀ ဝန်းကျင်)ကုန်ကျခဲ့သည်ဟု BBC သတင်း ဌာနက ဖော်ပြခဲ့သည်။
ဖိုဖာနာသည် ၂၀၂၀ ခုနှစ်တွင် စိန့်အက်တီယန်အသင်းမှ လက်စတာအသင်းသို့ Add-ons ကြေးအပါအဝင် ယူရို သန်း ၄၀ ဖြင့် ရောက်ရှိခဲ့ပြီး အသင်းအတွက် ပြိုင်ပွဲစုံ ၅၂ ပွဲကစားကာ တစ်ဂိုးသွင်းယူခဲ့သည်။ သို့သော် ပြီးခဲ့သည့်ရာသီက ရာသီကြိုကာလတွင် ခြေထောက်ကျိုးသွားသောကြောင့် ကာလရှည်အနားယူခဲ့ရပြီး ပရီးမီးယားလိဂ်ပွဲ ခုနစ်ပွဲသာ ကစားခဲ့ရသည်။
“ပြီးခဲ့တဲ့နှစ်ရက်ကတော့ ကျွန်တော့်အတွက် နေ့ထူးနေ့မြတ်ဖြစ်ခဲ့ပါတယ်။ ကျွန်တော် အရမ်းပျော်ပါတယ်။ ဒီမနက်မှာ အသင်းနဲ့အတူ လေ့ကျင့်ခန်းဆင်းခဲ့ပါတယ်။ ဒါဟာ ကျွန်တော့်အတွက် အိပ်မက်တစ်ခုပါပဲ။ အသင်းနဲ့ ပရိသတ်တွေအတွက် ပွဲစတင်ကစားဖို့ ကျွန်တော် အရမ်းပဲ စိတ်လှုပ်ရှားခဲ့ပါတယ်။ ဆုဖလားတွေ ဆွတ်ခူးဖို့ ကျွန်တော် ဒီမှာရှိနေပါပြီ။ ချန်ပီယံလိဂ်၊ ပရီးမီးယားလိဂ်၊ FA ဖလား၊ လိဂ်ဖလားအစ ရှိတဲ့ အရာရာတိုင်းပေါ့။ ကျွန်တော် အောင်မြင်မှုရဖို့ ဒီကိုလာခဲ့ပါတယ်။ ကလပ်ကလည်း ဆုဖလားတွေအတွက် တည်ဆောက်ခဲ့တာပါ။ ဒါကြောင့် ကျွန်တော့်အနေနဲ့ ဒီအရာကို ဆက်လက်ရှိနေဖို့ ရောက်လာတာပါ” ဟု ဖိုဖာနာက ပြောကြားခဲ့သည်။
