နည်းပြ ဒန်နီယဲလ်ဖာကယ်ကို ရာထူးမှ ထုတ်ပယ်ပြီးနောက် နည်းပြလက်မဲ့ဖြစ်နေသည့် နောဝစ်ချ်အသင်းသည် ချယ်လ်ဆီးနည်းပြ ဟောင်း လမ်းပတ်ကို နည်းပြသစ်အဖြစ် ခန့်အပ် နိုင်ရန် နီးစပ်နေပြီဖြစ်ကြောင်း သိရသည်။
နောဝစ်ချ်အသင်းသည် ပရီးမီးယားလိဂ်ပြိုင်ပွဲတွင် အမှတ်ပေးဇယားအောက်ဆုံးနေရာသို့ ရောက်ရှိနေသည့်အတွက် ယခုရာသီအတွက် ပထမဆုံးနိုင်ပွဲ ရယူပေးပြီး နာရီပိုင်းအတွင်းမှာပင် နည်းပြ ဒန်နီယဲလ်ဖာကယ်ကို ရာထူးမှ ထုတ်ပယ်ခဲ့ခြင်းဖြစ်သည်။
ထို့နောက် နည်းပြသစ်ခန့်အပ်ရန် ရှာဖွေခဲ့ရာ ဒေါ့မွန်နည်းပြဟောင်း လူစီယန်ဖာ၊ အက်စတွန်ဗီလာနည်းပြဟောင်း ဒင်းန်စမစ်၊ နယူးကာဆယ်နည်းပြဟောင်း စတိဗ်ဘရုစ်၊ အက်စတွန်ဗီလာလက်ထောက်နည်းပြဟောင်း ဂျွန်တယ်ရီတို့နှင့်အတူ လမ်းပတ်ကိုလည်း လျာထားခဲ့ပြီး ယခုနောက်ဆုံးအခြေအနေ၌ လမ်းပတ်နှင့် သဘောတူညီမှုရရှိရန် နီးစပ်နေခြင်းဖြစ်ကြောင်း ဗြိတိန်မီဒီယာများစွာက ဖော်ပြလျက်ရှိသည်။
နောဝစ်ချ်အသင်းသည် လမ်းပတ်နှင့် ဒင်းန်စမစ်တို့ထဲမှ တစ်ဦီးဦးကို ခန့်အပ်ရန် နောက်ဆုံးအဆင့်အဖြစ် ဆွေးနွေးညှိနှိုင်းမှုများ ပြုလုပ်ခဲ့ပြီးနောက် လမ်းပတ်နှင့် သဘောတူညီမှု ရရှိတော့မည်ဖြစ်ကြောင်း သတင်းများ ထွက်ပေါ်လာခြင်း ဖြစ်သည်။
ထို့ပြင် လမ်းပတ်သည် ပေါင်(၆၆)သန်းပိုင်ဆိုင်ပြီး နောဝစ်ချ်အသင်းပိုင်ရှင် ဒယ်လီယာစမစ်မှာ ပေါင်(၂၃)သန်းသာ ပိုင်ဆိုင်သည့်အတွက် ပိုင်ရှင်ထက် ပိုချမ်းသာသည့်နည်းပြ ဖြစ် လာတော့မည်ဟုလည်း မီဒီယာအချို့က ဖော်ပြခဲ့ကြသည်။
