လီဗာပူးလ်နည်းပြ ယာဂန်ကလော့ပ်က မိမိတို့အသင်းအနေဖြင့် လာမည့်ရာသီတွင် ချန်ပီယံလိဂ်ဝင်ခွင့်ရရန် အစွမ်းကုန်ကြိုးစားသွားမည်ဖြစ်ကြောင်း ပြောကြားခဲ့သည်။
ပရီးမီးယားလိဂ်လက်ရှိချန်ပီယံ လီဗာပူးလ်အသင်းသည် ယခုရာသီတွင် ဒဏ်ရာပြဿနာများဖြင့် ရုန်းကန်နေရပြီး ပရီးမီးယားလိဂ်ပွဲစဉ် (၃၄)အပြီးတွင် ရမှတ် (၅၄)မှတ်ဖြင့် အဆင့် (၇)နေရာ၌ ရပ်တည်နေသည်။
ပွဲကျန်တစ်ပွဲကစားရန် ကျန်ရှိနေသည့် လီဗာပူးလ်အသင်းသည် အမှတ်ပေးဇယား အဆင့်(၄)နေရာမှ ချယ်လ်ဆီးအသင်း (၆၁ မှတ်)နှင့် (၇)မှတ်အထိ ကွာဟနေသည်။
သို့သော် ယာဂန်ကလော့ပ်က “ကျွန်တော်တို့အနေနဲ့ အဆင့်(၄)အတွင်း ဝင်ဖို့ အခွင့်အရေးရှိသေးလားဆိုတာကို မသေချာပါဘူး။ တကယ်လို့ အခွင့်အရေးရှိခဲ့မယ်ဆိုရင် အဲဒီအတွက် အစွမ်းကုန်ကြိုးစားသွားမှာပါ။ ဒဏ်ရာပြဿနာတွေကြောင့် ချန်ပီယံလိဂ်ဝင်ခွင့်ရဖို့ ကြိုးစားတာဟာ ခက်ခဲနိုင်ပေမဲ့ ကျွန်တော်တို့အနေနဲ့ အကောင်းဆုံးစွမ်းဆောင်နိုင်ဖို့ လိုပါတယ်”ဟု ပြောကြားခဲ့သည်။
ထို့ပြင် ယာဂန်ကလော့ပ်က ယခုရာသီတွင် လီဗာပူးလ်အသင်း ရုန်းကန်နေရခြင်းမှာ အဓိကကစားသမားများ ဒဏ်ရာပြဿနာများနှင့်ရင်ဆိုင်နေရခြင်းဖြစ်သည်ဟုလည်း ဆိုခဲ့သည်။
