ချန်ပီယံလိဂ် ရှုံးထွက် ၁၆ သင်းအဆင့် ပွဲစဉ် ရေးဆွဲပွဲတွင် ဘာစီလိုနာနှင့် PSG အသင်း ထိပ်တိုက်တွေ့ဆုံပြီးနောက် PSG တိုက်စစ်မှူး နေမာက အသင်းဖော်ဟောင်းဖြစ်သူ ဘာစီလိုနာအသင်းခေါင်းဆောင် မက်ဆီထံ မက်ဆေ့ချ်ပေးပို့ခဲ့ကြောင်းသိရသည်။
နေမာသည် သူ၏ Twitter စာမျက်နှာတွင် ပေါ်တူဂီဘာသာစကားဖြင့် Nos vemos em breve meu amigo (မကြာမီပြန်ဆုံတွေ့ကြမယ် သူငယ်ချင်း)ဟု ရေးသားကာ Ballon d’Or ဆုပေးပွဲတွင် ၎င်းတို့နှစ်ဦး ပွေ့ဖက်နေသည့်ပုံဖြင့် တင်ရှိခဲ့ခြင်းဖြစ်သည်။
Nos vemos em breve meu amigo ❤️😍🥺 pic.twitter.com/VIwjyacBlx
— Neymar Jr (@neymarjr) December 14, 2020
နေမာသည် လက်ရှိ၌ လိုင်ယွန်အသင်း နှင့် လီဂူးပွဲစဉ်တွင် ခြေချင်းဝတ်ဒဏ်ရာရရှိခဲ့သည့်အတွက် ရက်သတ္တပတ်အနည်းငယ်ကြာ အနားယူရမည်ဖြစ်ပြီး ဆေးစစ်ဆေးမှုများအရ ဒဏ်ရာပြင်းထန်ခြင်းမရှိကြောင်း သိရသည်။ နေမာသည် ဒဏ်ရာရရှိချိန်တွင် မျက်ရည်ကျ သည်အထိ နာကျင်ခံစားခဲ့ရခြင်းကြောင့် စိုးရိမ်ဖွယ်ရှိသည်ဟု ယူဆခဲ့ကြသော်လည်း ယင်းအခြေအနေကို ရှောင်လွှဲနိုင်ခဲ့ကြောင်း PSG အသင်းက အတည်ပြုထုတ်ပြန်ခဲ့သည်။
နေမာသည် ခြေချင်းဝတ်အရိုး ကျိုးသွားခြင်းမရှိသောကြောင့် ခွဲစိတ်ကုသရန်လည်း လိုအပ်မည်မဟုတ်ဘဲ ရက်သတ္တပတ်အနည်းငယ်သာ အနားယူရမည်ဟု သိရသည်။
