အာဆင်နယ်တိုက်စစ်ကစားသမား မာတင်နယ်လီက ချန်ပီယံလိဂ်ပြိုင်ပွဲတွင် ဥရောပအကောင်းဆုံးအသင်းများနှင့် ယှဉ်ပြိုင်ရန်အတွက် မိမိတို့အသင်း ပြင်ဆင်နေကြောင်း ပြောကြားခဲ့သည်။
အသက် ၂၂ နှစ်အရွယ်ရှိ ဘရာဇီးလ် တိုက်စစ်ကစားသမား မာတင်နယ်လီသည် ပြီးခဲ့သည့်ရာသီက အာဆင်နယ်အသင်းအတွက် ခြေစွမ်းပြကစားခဲ့ပြီး ပရီးမီးယားလိဂ် ၃၆ ပွဲတွင် ၁၅ ဂိုးသွင်းယူကာ ဂိုးဖန်တီးမှု ငါးကြိမ် ပြုလုပ်ပေးခဲ့သည်။ အာဆင်နယ်အ သင်းသည် ပြီးခဲ့သည့်ရာသီက ပရီးမီးယားလိဂ်ပြိုင်ပွဲတွင် အမှတ်ပေးဇယားကို တောက်လျှောက်ဦးဆောင်နိုင်ခဲ့သော်လည်း ရာသီကုန်ခါနီးတွင် ခြေချော်သဖြင့် ချန်ပီယံဆုကို လက်လွှတ်ခဲ့ရပြီး ဒုတိယနေရာသာ ရရှိခဲ့သည်။
သို့သော် အာဆင်နယ်အသင်းအနေဖြင့် ၂၀၁၆-၁၇ ရာသီနောက်ပိုင်းတွင် ပထမ ဆုံးအကြိမ် ချန်ပီယံလိဂ်ယှဉ်ပြိုင်ခွင့် ရရှိခဲ့သည်။ ထို့ကြောင့် မာတင်နယ်လီက ချန်ပီယံလိဂ်တွင် ဥရောပအကောင်းဆုံးအသင်းများနှင့် ယှဉ်ပြိုင်ရန်အတွက် ပြင်ဆင်နေကြောင်း ပြောကြားခဲ့ခြင်းဖြစ်သည်။
မာတင်နယ်လီက “ကျွန်တော်တို့အနေနဲ့ ဥရောပအကောင်းဆုံးအသင်းတွေနဲ့ ယှဉ်ပြိုင်ဖို့အတွက် အဆိုးဆုံးအခြေအနေကိုရော၊ အကောင်းဆုံးအခြေအနေကိုပါ ပြင်ဆင်ထားဖို့ လိုပါတယ်။ အဲဒီအတွက်လည်း ကျွန်တော်တို့ တစ်သင်းလုံး ပြင်ဆင်နေကြပါတယ်။ ကျွန်တော်တို့အနေနဲ့ စိန်ခေါ်မှုသစ်တွေအတွက် အသင့်ဖြစ်နေပြီလို့ ထင်ပါတယ်”ဟု ပြောကြားခဲ့သည်။
အာဆင်နယ်အသင်းသည် ယခုနွေတွင် ချယ်လ်ဆီးအသင်းမှ ဂျာမန်ကွင်းလယ်တိုက်စစ်ကစားသမား ဟာဗက်ဇ်၊ အေဂျက်စ်အသင်းမှ နယ်သာလန်နောက်ခံကစားသမား တင်ဘာစ်နှင့် ဝက်စ်ဟမ်းအသင်းမှ အင်္ဂလန်ကွင်းလယ်ကစားသမား ဒက်ကလန်ရိုက်စ်တို့ကို ပေါင်သန်း ၂၀၀ ကျော် အသုံး ပြုကာ ခေါ်ယူထားသည်။ သို့သော် အာဆင်နယ်အသင်းသည် ကစားသမားသစ်များထပ်မံခေါ်ယူရန် စီစဉ်လျက်ရှိကြောင်း အသင်းနည်းပြ အာတီတာက ပြောကြားထားသည်။
အာဆင်နယ်အသင်းအနေဖြင့် လာမည့်ရာသီသစ်တွင် ချန်ပီယံလိဂ်ပြိုင်ပွဲ ကစားရမည်ဖြစ်သည့်အတွက် အသင်းတွင် လူအင်အားများရန်လိုအပ်ကြောင်း မာတင်နယ်လီက ပြောကြားခဲ့သည်။ “ကျွန်တော်တို့အနေနဲ့ ရာသီသစ်မှာ ပွဲပေါင်းများစွာကို ကစားရမှာ ဖြစ်ပြီး အဲဒါက ကျွန်တော်တို့အတွက် ခက်ခဲပါတယ်။ အဲဒီအခက်အခဲတွေကို ရင်ဆိုင်ဖို့အတွက် အသင်းရဲ့လူစာရင်း တောင့်တင်းနေဖို့ လိုပါတယ်။ ကျွန်တော်တို့အနေနဲ့ ရာသီသစ်အတွက် အသင့်ဖြစ်နေပြီး အသင်းမှာ ရွေးချယ်စရာတွေလည်း အများကြီး ရှိနေပါတယ်”ဟု ၎င်းက ပြောကြားခဲ့သည်။
