ချန်ပီယံလိဂ်နှင့် ယူရိုပါလိဂ်ပြိုင်ပွဲ၏ ရှုံးထွက်(၁၆)သင်း အဆင့် ဒုတိယအကျော့လက်ကျန်ပွဲများကို သက်ဆိုင်ရာအ သင်းများ၏ အိမ်ကွင်းများတွင်သာ ယှဉ်ပြိုင်ကစားခွင့်ရရှိ မည်ဖြစ်ကြောင်း ဥရောပဘောလုံးအဖွဲ့ချုပ်(UEFA)က ကြာသပတေးနေ့တွင် အတည်ပြုကြေညာခဲ့သည်။
မူလက ကိုရိုနာဗိုင်းရပ်စ်အန္တရာယ်ကြောင့် အဆိုပါပွဲများကို နောက်ဆုံးအဆင့်ပြိုင်ပွဲများကျင်းပမည့် နိုင်ငံများတွင်သာ ယှဉ်ပြိုင်သွားစေရန် ရည်ရွယ်ခဲ့သော်လည်း ပြိုင်ပွဲဝင်အသင်းအချို့၏ ကန့်ကွက်မှုကြောင့် သက်ဆိုင်ရာအသင်းများ၏ အိမ်ကွင်းတွင်သာ ယှဉ်ပြိုင်ကစားခွင့်ပြုရန် ဆုံးဖြတ်လိုက်ခြင်း ဖြစ်သည်။
ချန်ပီယံလိဂ်ရှုံးထွက်(၁၆)သင်းအဆင့်တွင် ဒုတိယအကျော့အဖြစ် ယှဉ်ပြိုင်ကစားရမည့် ပွဲစဉ်(၄)ပွဲ ကျန်ရှိနေပြီး မန်စီးတီး-ရီးယဲလ်၊ ဂျူဗင်တပ်စ်-လိုင်ယွန်၊ ဘိုင်ယန်မြူးနစ်-ချယ်လ်ဆီး၊ ဘာစီလိုနာ-နာပိုလီတို့ဖြစ်သည်။
ယင်းပွဲများထဲ၌ ပထမအကျော့တွင် ချယ်လ်ဆီးကို ဂိုးပြတ်အနိုင်ရထားသည့် ဘိုင်ယန်မြူးနစ်အသင်း နောက်တစ်ဆင့်တက်ရန် နီးစပ်နေသည်မှလွဲ၍ ကျန်အသင်းများမှာ အကြိတ်အနယ်အားပြိုင်ရဖွယ်ရှိနေပြီး ယင်းပွဲများကို ဩဂုတ်(၇၊ ၈)တွင် ယှဉ်ပြိုင်ကစားရမည်ဖြစ်သည်။
ယူရိုပါလိဂ်ရှုံးထွက်(၁၆)သင်းအဆင့်တွင်မူ ဒုတိယအကျော့ပွဲစဉ်အားလုံး ယှဉ်ပြိုင်ရန် ကျန်ရှိနေရုံသာမက ဂီတာဖေး-အဲဗာတန်၊ ရိုးမား-ဆီဗီလာပွဲများမှာ ပထမအကျော့ပင် ယှဉ်ပြိုင်ကစားရခြင်းမရှိသေးပေ။
ထို့ကြောင့် ယင်းနှစ်ပွဲကိုမူ ခြွင်းချက်အနေဖြင့် ဂျာမနီနိုင်ငံတွင်သာ တစ်ကျော့တည်းယှဉ်ပြိုင်ကစားသွားရန် ဆုံးဖြတ်လိုက်ကြောင်း သိရသည်။ ကျန်(၆)ပွဲမှာမူ ချန်ပီယံလိဂ်နည်းတူ သက်ဆိုင်ရာအသင်းများ၏ အိမ်ကွင်းများတွင် ဩဂုတ်(၅၊ ၆)၌ ယှဉ်ပြိုင်ကစား ရမည်ဖြစ်သည်။
ထို့ကြောင့် အင်္ဂလန်တွင် ချန်ပီယံလိဂ်ပွဲစဉ် (၁)ပွဲနှင့် ယူရိုပါလိဂ်ပွဲစဉ်(၂)ပွဲ ကျင်းပသွားရမည့်အခြေအနေဖြစ်ပြီး ယူရိုပါလိဂ်ပွဲစဉ်(၂)ပွဲမှာ မန်ယူ-LASK နှင့် ဝုလ်ဗ်- အိုလံပီယာကော့စ်တို့ဖြစ်သည်။ ပွဲစဉ်များအားလုံးကို ကွင်းပိတ်ကစားရမည်ဟုလည်း UEFA က အတည်ပြုခဲ့သည်။
