ပြီးခဲ့သည့် အင်္ဂါနေ့က ကစားခဲ့သော ပရီးမီးယားလိဂ်ပွဲစဉ်တွင် လက်စတာအသင်းအား (ဝ-၁)ဂိုးဖြင့် ရှုူံးနိမ့်ခဲ့ပြီးနောက် လီဗာပူးလ်အသင်းပရိသတ်များသည် ၎င်းတို့အသင်းအား အလွန်စိတ်ပျက်ခဲ့ကြပြီး ယခုရာသီ ပရီးမီးယားလိဂ်ချန်ပီယံဆုကို လက်ရှိချန်ပီယံ မန်စီးတီးအသင်းကသာ ပြန်လည်ရယူတော့မည်ဖြစ်ကြောင်း၊ မိမိတို့ လီဗာပူးလ်အသင်းအနေဖြင့် ယခုရာသီတွင် ဖလားလက်မဲ့မဖြစ်ရန် လိဂ်ဖလားနှင့် FA ဖလားတို့ကိုသာရယူရန် ကြိုးစားရမည်ဖြစ်ကြောင်း လူမှုကွန်ရက်စာမျက်နှာများတွင် ရေးသားခဲ့ကြသည်။
ယင်းပွဲတွင် လီဗာပူးလ်အသင်း ရှုံးနိမ့်ခဲ့ခြင်းကြောင့် ပရီးမီးယားလိဂ်ရာသီဝက် (၁၉)ပွဲစီကစားပြီးသည့်အနေအထားတွင် (ဘရန့်ဖို့ဒ်-မန်စီးတီးပွဲမတိုင်မီ) မန်စီးတီးအသင်းနှင့် လီဗာပူးလ်အသင်းမှာ ရမှတ်(၆)မှတ်အထိ ကွာဟသွားခဲ့ပြီဖြစ်သည်။
လီဗာပူးလ်ပရိသတ်တစ်ဦးက “အမှတ်ပေးချန်ပီယံဆုကို မရယူနိုင်တော့ပါဘူး။ မန်စီးတီးအသင်းကို ဂုဏ်ပြုပါတယ်။ ကျွန်တော်တို့အနေနဲ့ Carabao (လိဂ်ဖလား)နဲ့ FA ဖလားတို့ကိုပဲ အာရုံစိုက်ရမှာပါ။ ဒါမှ ကျွန်တော်တို့ ဒီရာသီမှာ ဖလားလက်မဲ့ မဖြစ်မှာပေါ့” ဟု Twitter တွင် ရေးသားခဲ့သည်။ အခြားသောပရိသတ်များကလည်း အမှတ်ပေးပြိုင်ပွဲယှဉ်ပြိုင်မှုမှာ ပြီးဆုံးသွားခဲ့ပြီဖြစ်ကြောင်း၊ လက်စတာအသင်းထက် နားချိန်ပိုရသော်လည်း အနိုင်မရသည့်အပြင် ရှုံးနိမ့်ခဲ့ခြင်းမှာ မဖြစ်သင့်ကြောင်း ဝေဖန်ရေးသားခဲ့ကြသည်။
လက်စတာအသင်းမှာ Boxing Day ပွဲစဉ်တွင် မန်စီးတီးအသင်းနှင့် ကစားခဲ့ရပြီး လီဗာပူးလ်အသင်းမှာ ယင်းနေ့က ပွဲရွှေ့ဆိုင်းသဖြင့် လက်စတာအသင်းထက် နားချိန်(၄)ရက်ခန့်ပိုမိုရရှိခဲ့သည်။
လီဗာပူးလ်အသင်းနည်းပြ ယာဂန်ကလော့ပ်က မိမိအသင်းမှာ လုံလောက်သော အရည်အသွေးမရှိခဲ့ကြောင်း ပွဲအပြီးတွင် ဝန်ခံပြောကြားခဲ့သည်။ “ကျွန်တော်တို့အသင်းဟာ လုံလောက်တဲ့အရည်အသွေးမရှိခဲ့ပါဘူး။ လက်စတာအသင်းအတွက် နိုင်ပွဲက ထိုက်တန်ပါတယ်။ ကျွန်တော်တို့ တကယ်ကို ဆိုးဆိုးရွားရွားကစားခဲ့တာပါ” ဟု ကလော့ပ်က ဆိုခဲ့သည်။
