ဆွစ်ဇာလန်နိုင်ငံအခြေစိုက် CIES Football Observatory မှ ထုတ်ပြန်ခဲ့သည့် ခန့်မှန်းပြောင်းရွှေ့ ကြေးတန်ဖိုးအမြင့်ဆုံး ဘောလုံးသမားစာရင်းတွင် ရီးယဲလ်မက်ဒရစ်အသင်း၏ အင်္ဂလန်ကြယ်ပွင့်ကွင်းလယ်လူ ဘယ်လင်ဟမ်က ထိပ်ဆုံးတွင်ရပ်တည်ခဲ့ပြီး ထိပ်ဆုံး (၅)ဦး စာရင်းတွင် ရီးယဲလ်မက်ဒရစ်အသင်းမှ (၃)ဦးဖြင့်အများ ဆုံးပါဝင်ခဲ့ကြောင်းသိရသည်။
CIES Football Observatory သည် ကမ္ဘာတစ်ဝန်းရှိ ခန့်မှန်းပြောင်းရွှေ့ကြေးတန်ဖိုး အမြင့်ဆုံး ဘောလုံးသမား (၁၀၀) စာရင်းကို (၆)လတစ်ကြိမ် ထုတ်ပြန်လျက်ရှိပြီး ယခုနောက်ဆုံးထုတ်ပြန်မှုတွင် ဘယ်လင်ဟမ်မှာ ခန့်မှန်းပြောင်းရွှေ့ကြေး ယူရို (၂၆၈)သန်းဖြင့် ထိပ်ဆုံးနေရာတွင် ရပ်တည်နိုင်ခဲ့ခြင်းဖြစ်သည်။
အသက် (၂၀)နှစ် အရွယ်သာရှိသေးသည့် ဘယ်လင်ဟမ်သည် ပြီးခဲ့သည့် ၂၀၂၃ နွေရာသီအပြောင်းအရွှေ့က ဒေါ့မွန်အသင်းမှ ရီးယဲလ်အသင်းသို့ ယူရို (၁၀၃)သန်းဖြင့် ပြောင်းရွှေ့လာခဲ့သူဖြစ်ပြီး အသင်းနှင့် ပထမဆုံးရာသီမှာပင် အံ့အားသင့်ဖွယ်ကောင်းအောင် ခြေစွမ်းပြသနိုင်ခဲ့သူဖြစ်သည်။ ဘယ်လင်ဟမ်သည် ရီးယဲလ်မက်ဒရစ်အသင်းအတွက် ပြိုင်ပွဲစုံ (၂၂)ပွဲကစားရာတွင် ဂိုးပါဝင်ပတ်သက်မှု (၂၂) ကြိမ် (၁၇ ဂိုးသွင်း၊ ၅ ဂိုးဖန်တီး)အထိရှိခဲ့ပြီး လာလီဂါပြိုင်ပွဲတွင်လည်း သွင်းဂိုး (၁၃)ဂိုးဖြင့် တိုက်စစ်မှူးများကိုကျော်ဖြတ်ကာ ဂိုးသွင်းအများဆုံးကစားသမားစာရင်း၏ ထိပ်ဆုံးနေရာတွင် ရပ်တည်နေသူဖြစ်သည်။ ထို့ပြင် ဘယ်လင်ဟမ်အနေဖြင့် ပြီးခဲ့သည့် ၂၀၂၃ ခုနှစ်အတွင်း Golden Boy နှင့် Kopa Trophy ကဲ့သို့ ကမ္ဘာ့အကောင်းဆုံးလူငယ်ကစားသမား ဆုများကို ရယူနိုင်ခဲ့ပြီး အင်္ဂလန်လက်ရွေးစင်အသင်း၏ အဓိကကြယ်ပွင့်ကစားသမားတစ်ဦးဖြစ်နေခြင်းမှာလည်း ၎င်း၏တန်ကြေးကို များစွာမြင့်တက်စေခဲ့သည်။
ယခုကဲ့သို့စွမ်းဆောင်ရည်မှတ်တမ်းများကြောင့် ဘယ်လင်ဟမ်အနေဖြင့် မန်စီးတီးအသင်းမှနော်ဝေကြယ်ပွင့်တိုက်စစ်မှူးဟော်လန်း (ယူရို၂၅၁ သန်း)ကို ကျော်ဖြတ်ကာ ခန့်မှန်းပြောင်းရွှေ့ကြေးအမြင့်ဆုံးကစားသမားစာရင်း၏ ထိပ်ဆုံးနေရာသို့ ရောက်ရှိလာခဲ့ခြင်းဖြစ်ပြီး အနာဂတ်တွင်လည်း ၎င်း၏တန်ကြေးမှာ များစွာမြင့်တက်လာဖွယ်ရှိနေကြောင်းသိရသည်။
ဘယ်လင်ဟမ်သည် ရီးယဲလ်အသင်းသို့ မပြောင်းရွှေ့မီ CIES ၏ ပြီးခဲ့သည့်၂၀၂၃ ဇွန်လအတွင်းထုတ်ပြန်မှု၌ ခန့်မှန်းပြောင်းရွှေ့ကြေးယူရိုသန်း (၁၉၀) ဖြင့်အဆင့် (၄)နေရာတွင်ရပ်တည်ခဲ့ပြီး (၆)လကျော်အတွင်း ယူရိုသန်း (၈၀)ကျော်တန်ကြေးမြင့်တက်လာခဲ့ခြင်းဖြစ်သည်။
ယခုစာရင်း၏ ထိပ်ဆုံး (၅)ဦးရပ်တည်မှုတွင် ရီးယဲလ်အသင်းမှ ဘယ်လင်ဟမ်အပါအဝင် ဘရာဇီးလ်ကြယ်ပွင့်တိုက်စစ်ကစားသမားများဖြစ်သည့် ဗင်နီစီယပ်စ် (၂၅၀ သန်း)၊ ရိုဒရီဂို (၂၄၈ သန်း) တို့ (၃)ဦးအထိပါဝင်ခဲ့ပြီးအများဆုံးဖြစ်ခဲ့ကြောင်းသိရသည်။
CIES သည် ကစားသမားများ၏ အသက်အရွယ်၊ စွမ်းဆောင်ရည်မှတ်တမ်း၊ အောင်မြင်မှု၊ ပုံရိပ်ကျော်ကြားမှုနှင့် စာချုပ်သက်တမ်းတို့ကိုချိန်ထိုးကာ ယခုကဲ့သို့ ခန့်မှန်းပြောင်းရွှေ့ကြေးများကို တွက်ချက်ခဲ့ခြင်းဖြစ်ပြီး ထိပ်ဆုံး (၁၀)ဦးတွင် လာလီဂါမှ (၄) ဦးဖြင့် ဒုတိယအများဆုံးပါဝင်ခဲ့ကြောင်းသိရသည်။
