စပါးအသင်းမန်နေဂျာကွန်တီ၏နေရာကို အစားထိုးဝင်ရောက်ရန်အတွက် ဖူလ်ဟမ်အသင်းမန်နေဂျာ မာကိုဆေးဗားက ရေပန်းစားနေသည်။
စပါးအသင်းနှင့် ကွန်တီတို့ချုပ်ဆိုထားသော စာချုပ်သည် လက်ရှိဘောလုံးရာသီအကုန်တွင် သက်တမ်းကုန်ဆုံးမည်ဖြစ်ပြီး ကွန်တီသည် အသင်းမှထွက်ခွာရန် နီးစပ်နေသည်။ ကွန်တီသည် တစ်ဘက်ဘက်မှသဘောတူလျှင် ၁၂ လအလိုအလျောက်သက်တမ်းတိုးခွင့်ရှိသော်လည်း လက်ရှိ အနေအထားအရ မည်သည့်ဘက်ကမျှ သက်တမ်းတိုးလိုခြင်းမရှိဘဲ စပါးအသင်းမှ စွန့်ခွာရန်သာအလားအလား များနေခြင်းဖြစ်သည်။
စပါးသည် ချန်ပီယံလိဂ်မှ ထွက်ခဲ့ရပြီးနောက် ယခုနှစ်တွင်လည်း ဆုဖလားလက်မဲ့ရာသီတစ်ခုနှင့် ထပ်မံရင်ဆိုင်ရရန်အလားအလာများနေသည်။ စပါးသည် နယူးကာဆယ် လီဗာပူး ဘရိုက်တန်အသင်းများနှင့် ရင်ဆိုင်ယှဉ်ပြိုင်ပြီး ပရီးမီးယားလိဂ်အဆင့် ၄ အတွင်းဝင်နိုင်ရန် အပြင်းအထန် ကြိုးစားရဖွယ်ရှိနေသည်။
ကွန်တီအသင်းကို စွန့်ခွာခဲ့ပါက အသက် ၄၅ နှစ်အရွယ်ရှိဆေးဗားသည် စပါးအသင်း မန်နေဂျာဖြစ်လာဖွယ်ရှိနေကြောင်း ဆန်းသတင်းစာက ဖော်ပြသည်။ ဆေးဗားသည် ၂၀၂၁ တွင်ဖူလ်ဟမ်ကို စတင်ကိုင်တွယ်ပြီးနောက်တွင် အသင်းကို ဦးမော့လာအောင် စွမ်းဆောင်ပေးထားနိုင်သည်။
ဖူလ်ဟမ်သည် ပြီးခဲ့သည့်နှစ်တွင် ချန်ပီယံရှစ်ဖလားကို ရရှိခဲ့သလို လက်ရှိဘောလုံးရာသီတွင်လည်း ပရီးမီးယားလိဂ်အဆင့် ၈ နေရာတွင်ရပ်တည်နေသည်။ တန်းတက်အသင်းအနေဖြင့် တန်းဆင်းဇုန်နှင့် ၁၅ မှတ်ကွာသော နေရာတွင် ရပ်တည်နေနိုင်ခြင်းသည် အောင်မြင်မှုတစ်ခုဖြစ်ကြောင်းလည်း သတင်းများက သုံးသပ်ဖော်ပြသည်။
