မန်ယူအသင်းတိုက်စစ်မှူး ဝက်ဂ်ဟော့စ်က ယနေ့ည ကစားမည့် ကာရာဘောင်ဖလားဗိုလ်လုပွဲတွင် အသင်း၌ ပါဝင်ခွင့်ရရန် မျှော်လင့်နေပြီး မန်ယူတွင် ယခုထက်ပို၍ ဂိုးများသွင်းနိုင်ရန်လည်း မျှော်လင့်ကြောင်း ထုတ်ဖော်ပြောဆိုလိုက်သည်။
ရော်နယ်ဒိုနေရာတွင် အစားထိုးရန်အတွက် မန်ယူသို့ ရောက်ရှိလာသော ဝက်ဂ်ဟော့စ်သည် အသင်းအတွက် ၁၁ ပွဲကစားပြီးချိန်တွင် တစ်ဂိုးသာ သွင်းယူထားနိုင်သည်။ ကြာသပတေးနေ့က ဘာစီလိုနာနှင့် ကစားသည့်ပွဲတွင် ဝက်ဂ်ဟော့စ်သည် ပွဲထွက်ကစားသမားအဖြစ်ပါဝင်ခွင့်ရသော်လည်း ပထမပိုင်းအပြီးတွင် အန်ထော်နီနှင့် လူစားလဲခံခဲ့ရသည်။
“ကျွန်တော်အောင်မြင်မှုရချင်သလို ဂိုးလည်း သွင်းချင်ပါတယ်။ နှစ်ခုစလုံးကို လိုချင်တာပါ”ဟု ဝက်ဂ်ဟော့စ်က ပြောဆိုလိုက်ခြင်းဖြစ်သည်။ ဝက်ဂ်ဟော့စ်သည် ပြီးခဲ့သည့်ဘောလုံးရာသီတွင် ဘန်လေနှင့်အတူ တန်းဆင်းခဲ့ရပြီးနောက် တူရကီကလပ် ဘက်ရှီးတက်စ်သို့ အငှားဖြင့်သွားရောက် ကစားခဲ့သည်။ ထို့နောက်တွင်မှ မန်ယူက အငှားဖြင့် ပြီးခဲ့သည့်ဇန်နဝါရီတွင် ထပ်မံခေါ်ယူခဲ့ခြင်း ဖြစ်သည်။
“ဂိုးသွင်းဖို့ဆိုတာ အရေးကြီးပါတယ်။ ကျွန်တော်က ဂိုးတွေသွင်းနိုင်တယ်ဆိုတာလည်း သိပါတယ်။ ကစားသမားဘဝသက်တမ်းတစ်လျှောက်လုံးလည်း ဂိုးသွင်းလာတာပဲလေ။ နောက်ထပ်လည်း ဂိုးသွင်းခွင့်တွေရလာပြီး ကျွန်တော်လည်းဂိုးတွေရမယ်လို့ ယူဆပါတယ်။ ဒါ့အပြင်အသင်းတွက် အနိုင်ပွဲတွေ ယူပေးနိုင်ဖို့လည်း အရေးကြီးတာပေါ့။ မန်ယူက အခြေအနေကောင်းတစ်ခုမှာ ရှိနေပြီး ဗိုလ်လုပွဲအတွက်လည်း မျှော်လင့်ထားပါတယ်။ နယူးကာဆယ်နဲ့ပွဲက အရေးပါတဲ့ ပွဲတစ်ပွဲဖြစ်သလို နောက်ထပ်ပွဲကြီးပွဲကောင်းတွေ ကစားခွင့်ရဖို့လည်း မျှော်လင့်ပါတယ်”ဟု ဝက်ဂ်ဟော့စ်က ပြောဆိုလိုက်သည်။
“ကျွန်တော် ဝင်ဘလေကွင်းမှာ ကစားဖူးသေးပါဘူး။ ဝင်ဘလေကွင်းထက်ပိုပြီး မန်ယူအတွက် ဂိုးတွေသွင်းပေးဖို့ ပိုကောင်းတဲ့နေရာဆိုတာ မရှိနိုင်ပါဘူး။ မန်ယူရော နယူးကာဆယ်ရော နိုင်ပွဲလိုချင်နေကြပါတယ်။ ကျွန်တော့်ကစားသမားဘဝမှာ ဆုဖလားမရဖူးသေးပါဘူး။ ဒီကာရာဘောင်ဖလားကို ပထမဆုံးအဖြစ် ဆွတ်ခူးနိုင်မယ်လို့ မျှော်လင့်ပါတယ်”ဟု ဝက်ဂ်ဟော့စ်က ဆက်လက်ပြောဆိုလိုက်သည်။
