မန်စီးတီးအသင်းသည် ချယ်လ်ဆီးအသင်းမှ ခရိုအေးရှားကွင်းလယ်လူ ကိုဗာချစ်အား ပေါင်သန်း(၃၀) ဖြင့် ခေါ်ယူရန်သဘောတူညီမှုရခဲ့ပြီဖြစ်ပြီး ၎င်း၏လက်ရွေးစင်အသင်းဖော် လိုက်ပ်ဇစ်နောက်ခံလူ ဂီဗာဒီယိုလ်ကို ပေါင်(၈၈)သန်းဖြင့် ခေါ်ယူရန်ပစ်မှတ်ထားနေကြောင်း သိရသည်။
ပြီးခဲ့သည့် ၂၀၂၂-၂၃ ရာသီ ဖလား(၃)လုံးချန်ပီယံ မန်စီးတီးအသင်းသည် ချယ်လ်ဆီးအသင်းမှ ခရိုအေးရှား လက်ရွေးစင်ကွင်းလယ်လူ ကိုဗာချစ်အား နိုင်ငံတကာရက် သတ္တပတ်မတိုင်မီကတည်းက ခေါ်ယူရန် ပုဂ္ဂိုလ်ရေးသဘောတူညီမှု ရရှိထားပြီးဖြစ်သည်။
ယခုအခါ မန်စီးတီးအသင်းသည် ကိုဗာချစ်အား ကနဦးပေါင် (၂၅)သန်း + Add-ons ကြေး ပေါင် (၅)သန်းဖြင့် ခေါ်ယူရန် သဘောတူညီမှုရခဲ့ခြင်းဖြစ်ပြီး ယခုရက်သတ္တပတ်အတွင်း အပြောင်းအရွှေ့အဆုံးသတ်ဖွယ်ရှိနေကြောင်း သိရှိရသည်။
ကိုဗာချစ်သည် ၂၀၁၈ ခုနှစ်တွင် ရီးယဲလ်အသင်းမှ ချယ်လ်ဆီးအသင်းသို့ ကနဦးအငှားဖြင့် ရောက်ရှိလာခဲ့ပြီး ၂၀၁၉ ခုနှစ်တွင် ပေါင် (၃၈)သန်းဖြင့် အပြီးသတ်ပြောင်းရွှေ့ခဲ့သည်။
၎င်းသည် ချယ်လ်ဆီးအသင်းတွင် (၅)ရာသီအတွင်း ပြိုင်ပွဲစုံ (၂၂၁) ပွဲတွင် (၆)ဂိုး သွင်းယူခဲ့ပြီး အသင်းနှင့်အတူ ချန်ပီယံလိဂ်၊ ယူရိုပါလိဂ်၊ ဥရောပစူပါဖလားနှင့် ဖီဖာကလပ်ကမ္ဘာ့ဖလားများကို ရယူနိုင်ခဲ့သည်။ မန်စီးတီးအသင်းသည် ကိုဗာချစ်အား အသင်းမှထွက်ခွာဖွယ်ရှိသည့် ဂွန်ဒိုဂန်၏ နေရာတွင် အစားထိုးရန်ခေါ်ယူခြင်းဖြစ်သည်။
မန်စီးတီးအသင်းသည် ကိုဗာချစ်ကို ခေါ်ယူရန် နီးစပ်နေပြီးနောက် ၎င်း၏လက်ရွေးစင်အသင်းဖော်ဖြစ်သည့် လိုက်ပ်ဇစ်နောက်ခံလူ ဂီဗာဒီယိုလ်ကို ခေါ်ယူရန်ပစ်မှတ်ထားလာခြင်းဖြစ်သည်။
မန်စီးတီးအသင်းသည် ယခုနွေတွင် အသင်းနောက်ခံ အစွန်လူများဖြစ်သည့် ကန်ဆယ်လိုနှင့် ဝေါ်လ်ကာတို့ကို ရောင်းထုတ်ဖွယ်ရှိနေပြီး ဂီဗာဒီယိုလ်ကို အစားထိုးခေါ်လိုနေခြင်းဖြစ်ကြောင်း သိရှိရသည်။ လိုက်ပ်ဇစ်အသင်းသည် ၎င်းကို လက်မလွှတ်လိုသော်လည်း မန်စီးတီးက စာချုပ်လျော်ကြေးဖြစ်သည့် ပေါင် (၈၈)သန်းဖြင့် ပေးချေကာ ခေါ်ယူရန် မျှော်လင့်နေကြောင်း သိရှိရသည်။
