ဟယ်ရီကိန်းနှင့် ဘိုင်ယန်မြူးနစ်အသင်းတို့သည် အပြောင်းအရွှေ့နှင့်ပတ်သက်၍ မူအားဖြင့် အကြမ်းဖျဉ်းသဘောတူညီမှု ရရှိသွားပြီဖြစ်သည်။ ဘိုင်ယန်သည် ကိန်းကို ခေါ်ယူရေးအတွက် အင်္ဂါနေ့ညတွင် စတင်လှုပ်ရှားလာပြီး ကနဦးပြောင်းရွှေ့ကြေးပေါင် သန်း ၆၀ ဖြင့်ကမ်းလှမ်းခဲ့သော်လည်း စပါးအသင်းဘက်မှ ပယ်ချခဲ့သည်။
စပါးနှင့် အသင်းဥက္ကဌဖြစ်သူလဗ်ဗီတို့က အပြောင်းအရွှေ့ကို ငြင်းပယ်နေသော်လည်း ကိန်းသည် တူချယ်နှင့်အတူ လက်တွဲ၍ ဂျာမန်ကလပ်အသင်းတွင် ကစားရန်ဆန္ဒရှိနေကြောင်း ဗြိတိန်မီဒီယာများက ဖော်ပြလာသည်။ ကိန်း၏ အပြောင်းအရွှေ့နှင့်ပတ်သက်၍ ၎င်း၏ဖခင်နှင့် အစ်ကိုဖြစ်သူတို့က ဘိုင်ယန်အသင်းနှင့် ဆွေးနွေးနေကြောင်း အကြမ်းဖျဉ်းအားဖြင့် သဘောတူညီမှုရရှိနေပြီဖြစ်ကြောင်းကို ဂျာမန်မီဒီယာဘိုင်းက ဖော်ပြခဲ့ခြင်းဖြစ်သည်။
အပြောင်းအရွှေ့နှင့်ပတ်သက်၍ နောက်ဆုံးကျန်နေသော အတားအဆီးမှာ လဗ်ဗီနှင့်စပါးအသင်းက ပြောင်းရွှေ့ကြေးကို သဘောတူညီမှုပေးရန်ဖြစ်သည်။ စပါးအသင်းက အသက် ၂၉ နှစ်အရွယ်ရှိကိန်းသည် ရောင်းရန်မဟုတ်ဟု ထုတ်ပြန်ကြေညာထားသည်။ ကိန်းကို ခေါ်ယူချင်သော အခြားတစ်သင်းဖြစ်သည့် မန်ယူအသင်းမှာလည်း ပြောင်းရွှေ့ကြေးကို ညှိနှိုင်းရန် ခက်ခဲ့သည့် လဗ်ဗီကြောင့် အခြားအပြောင်းအရွှေ့ပစ်မှတ်များကို ပြောင်းလဲဦးတည်ချက်ထားနေကြောင်း သတင်းထွက်ပေါ်လာသည်။ ကိန်းသည် စာချုပ်သက်တမ်းတစ်နှစ်သာ ကျန်ရှိတော့ခြင်းကြောင့် လာမည့်နွေရာသီတွင် အလွတ်ပြောင်းရွှေ့ကြေးဖြင့် အသင်းပြောင်းခွင့်ရမည်ဖြစ်သည်။ ထို့ကြောင့်စပါးအနေဖြင့် ပြောင်းရွှေ့ကြေတစ်စုံတစ်ရာ ရယူနိုင်ရန် ၎င်းကို လက်ရှိနွေရာသီ အပြောင်းအရွှေ့တွင် ရောင်းထုတ်ရန်လိုအပ်နေပြီး စပါးသည် အများကြီး ခေါင်းမာနေ၍ ရမည့်အခြေအနေတွင် မရှိတော့ကြောင်း မီဒီယာများက ဖော်ပြသည်။
