ကာဆီမီရို၏ အနီကတ်ပြစ်ဒဏ်ကို အယူခံမဝင်ရန် မန်ယူအသင်းက ဆုံးဖြတ်ခဲ့ပြီး ကာဆီမီရို ၄ ပွဲပယ်ခံရသော်လည်း အသင်းသည် ခြေစွမ်းနှင့် ရလဒ်မထိခိုက်အောင် ကစားသွားနိုင်ဖွယ်ရှိကြောင်း ခံစစ်မှူး ဗာရန်းက ပြောဆိုလိုက်သည်။
တနင်္ဂနွေနေ့က အိုးထရက်ဖို့တွင် ဆောက်သမ်တန်နှင့် သရေကျသည့်ပွဲတွင် ပြိုင်ဘက်ကစားသမား အယ်လ်ကာရက်ဇ်ကို လျောထိုးဖျက်ထုတ်ရာမှ ကာဆီမီရိုသည် တိုက်ရိုက်အနီကတ်ဖြင့် ထွက်ခဲ့ရခြင်း ဖြစ်သည်။ ၂၀၁၃-၁၄ ဗီဒစ်နောက်ပိုင်းတွင် ဘောလုံးတစ်ရာသီအတွင်းတွင် အနီကတ် နှစ်ကြိမ်ထိသည့် ပထမဆုံး မန်ယူကစားသမားအဖြစ် ကာဆီမီရိုက မှတ်တမ်းဝင်သွားသည်။
ကာဆီမီရိုသည် ထိုအနီကတ်ကြောင့် ၄ ပွဲပယ်ပြစ်ဒဏ်ကျခံရမည်ဖြစ်ပြီး တနင်္ဂနွေနေ့တွင် ဖူလ်ဟမ်နှင့် ကစားမည့် အက်ဖ်အေဖလားကွာတားဖိုင်နယ်အပါအဝင် လိဂ်ပွဲများဖြစ်သော နယူးကာဆယ်၊ ဘရန့်ဖို့နှင့် အဲဗာတန်အသင်းတို့၏ ပွဲစဉ်များကိုပါ လွဲချော်မည်ဖြစ်သည်။
ကာဆီမီရို၏ အနီကတ်ပြစ်ဒဏ်နှင့် ပတ်သက်၍ အယူခံဝင်လျှင်လည်း အပြောင်းအလဲဖြစ်ရန် အခွင့်အလန်းနည်းပါးခြင်းကြောင့် အယူခံမဝင်ရန် ဆုံးဖြတ်ခဲ့ခြင်းဖြစ်ကြောင်း မန်ယူအသင်းက တနင်္လာနေ့တွင် ထုတ်ပြန်ကြေညာသည်။
ကာဆီမီရိုမပါနိုင်သော်လည်း အသင်း၏ ခြေစွမ်းကို များစွာမထိခိုက်နိုင်သည့် အရန် အင်အားမျိုး မန်ယူတွင် ရှိကြောင်းဗာရန်းက ပြောဆိုလိုက်သည်။ “ကာဆီမီရိုက အသင်းအတွက် အရမ်းကို အရေးပါတဲ့ကစားသမားပါ။ အသင်းရဲ့ဟန်ချက်ညီအောင် ကာဆီမီရိုက ထိန်းပေးနိုင်တယ်။ ဒါပေမယ့် အခြားဟန်ချက်ထိန်းပေးမယ့်ကစားသမားမျိုး အသင်းမှာ ရှိနေနိုင်ပါတယ်။ မန်ယူမှာ နေရာတိုင်းအတွက် ကစားသမားကောင်းတွေရှိနေပြီး နောက်တစ်ပွဲအတွက် အဆင်သင့်ဖြစ်မယ်လို့ ယုံကြည်ပါတယ်။ ကွင်းလယ်ဒိုင်ရဲ့ ဆုံးဖြတ်ချက်ကို ဘယ်လို့မှ မပျော်ရွှင်နိုင်ခဲ့ပါဘူး”ဟု ဗာရန်းက ပြောဆိုလိုက်သည်။
