သြဂုတ်လ(၆)ရက်က ယှဉ်ပြိုင်ကစားခဲ့သော ကလယ်မွန့်(၀-၅) PSG ပွဲစဉ်တွင် နောက်ပြန်ကန်ချက် (Bicycle Kick) ဖြင့် တိုက်စစ်မှူး မက်ဆီ ဂိုးသွင်းယူပြီးနောက် ပြိုင်ဘက်အသင်းပရိသတ်များပင် သူ၏အမည်ကို သံပြိုင်အော်ဟစ်ကာ အားပေးခဲ့ကြကြောင်း သိရသည်။
မက်ဆီသည် ယင်းပွဲတွင် အသင်းအတွက် အနိုင်ဂိုး(၂)ဂိုး သွင်းယူပေးခဲ့ပြီး အသင်းဖော် နေမာအတွက်လည်း တစ်ဂိုး ဖန်တီးပေးသွားခဲ့သည်။
ပရိသတ်တစ်ဦးက ”မယုံနိုင်လောက်စရာကောင်းပြီး သေးငယ်သည့် ဒီလူသားကို ခင်ဗျား စောင့်မကြည့်မိလျှင် GOAT ဟု ထင်မြင်မိမှာ မဟုတ်ဘူး” ဟု ချီးကျူးခဲ့ပြီး အခြားသူတစ်ဦးကလည်း ”မက်ဆီထံက မယုံနိုင်လောက်စရာကောင်းတဲ့ သွင်းဂိုးတစ်ဂိုးပါ။ အံ့ဖွယ်သရဲပေါ့။ လုံးဝမဖြစ်နိုင်လောက်စရာပါပဲ။ နောက်ကွယ်က လှုပ်ရှားမှုတွေဟာ လက်ဖျားခါလောက်ပါတယ်။ လီယန်ဒရိုပါရေဒက်စ်ထံက ပေးပို့မှုကလည်း အရည်အသွေးရှိပါတယ်။ ဒါပေမဲ့ မက်ဆီရဲ့ဘောလုံးထိချက်နဲ့ ပေါ့ပါးဖျတ်လတ်စွာ အဆုံးသတ်မှုစွမ်းရည်က ပြင်ပကမ္ဘာ ရောက်သွားသလိုပါပဲ”ဟု ရေးသားခဲ့သည်။
မက်ဆီသည် ပြီးခဲ့သည့်ရာသီက ပြင်သစ်အမှတ်ပေးပြိုင်ပွဲတွင် (၆)ဂိုးသာ သွင်းယူနိုင်ခဲ့သော်လည်း ယခုအခါ ရာသီအဖွင့်ပွဲစဉ်မှာပင် (၂)ဂိုးအထိ သွင်းယူနိုင်ခဲ့သည်။
မက်ဆီ၏အသင်းဖော် နေမာမှာ အဆိုပါပွဲတွင် တစ်ဂိုးသာ သွင်းယူနိုင်ခဲ့သော်လည်း ဂိုးဖန်တီးမှုမှာ ဟက်ထရစ် ရရှိခဲ့သည်။
ပြင်သစ်စူပါဖလားပွဲနှင့် ယခုရာသီအဖွင့်ပွဲစဉ်(၂)ပွဲတွင် PSG အသင်းက (၉)ဂိုးအထိသွင်းယူထားပြီး နေမာနှင့် မက်ဆီ နှစ်ဦးပေါင်းက (၆)ဂိုးအထိရှိခဲ့သည်။
ဘာပေ ဒဏ်ရာကြောင့် နားနေရချိန်တွင် ၎င်းတို့နှစ်ဦး ခြေစွမ်းပြနိုင်မှုမှာလည်း အံ့အားသင့်စရာဖြစ်ခဲ့သည်။
