ဂျာမနီအသင်း ကမ္ဘာ့ဖလားပြိုင်ပွဲ နှစ်ကြိမ်ဆက်တိုက် အုပ်စုအဆင့်မှထွက်ခဲ့ရပြီးနောက် လာမည့် ၁၀ နှစ်အတွင်း မျိုးဆက်သစ်များအပေါ် အာရုံစိုက်ရန် အလွန်အရေးကြီးကြောင်း နည်းပြဖြစ်သူ ဟန်ဆီဖလစ်ခ်က သုံးသပ်ပြောကြားခဲ့သည်။
ဂျာမနီအသင်းသည် ကမ္ဘာ့ဖလားပြိုင်ပွဲ (E) တွင် ကျရောက်ခဲ့ပြီး အဖွင့်ပွဲ၌ ဂျပန် အသင်းကို (၁-၂) ဂိုးဖြင့် ရှုံးနိမ့်ကာ ဒုတိယပွဲ ၌ စပိန်အသင်းနှင့် တစ်ဂိုးစီသရေ၊ နောက်ဆုံး ပွဲ၌ ကော်စတာရီကာအသင်းကို (၄-၂) ဂိုးဖြင့် အနိုင်ရခဲ့သည်။ သို့သော် အုပ်စုပွဲစဉ်များအပြီး တွင် စပိန်အသင်းနှင့် ရမှတ်လေးမှတ်စီတူညီသော်လည်း ဂိုးကွာခြားချက်အရ တတိယ နေရာသာရရှိကာ အုပ်စုအဆင့်မှ ထွက်ခဲ့ရသည်။ ကမ္ဘာ့ဖလားချန်ပီယံဆု လေးကြိမ်ရရှိထားပြီး အအောင်မြင်ဆုံး အသင်းများစာရင်းတွင် တစ်သင်းအပါအဝင်ဖြစ်သည့် ဂျာမနီအသင်းအနေဖြင့် ၂၀၁၈၊ ၂၀၂၂ ပြိုင်ပွဲနှစ်ကြိမ်ဆက်တိုက် အုပ်စုအဆင့်မှ ထွက်ခဲ့ရခြင်းဖြစ်သည်။
“ဂျာမန်ဘောလုံးရဲ့ အနာဂတ်ကို ကျွန်တော်ယုံကြည်မှုရှိပါတယ်။ ကျွန်တော်တို့အနေနဲ့ လေ့ကျင့်မှုအစီအစဉ်တွေမှာလည်း ကွဲပြားခြားနားတဲ့ပုံစံတွေလုပ်ဖို့ လိုအပ်ပါတယ်။ ကျွန်တော်တို့က ဂိုးသမားသစ်တွေ၊ Wingback ကစားသမားသစ်တွေအကြောင်း ပြောနေကြတာ နှစ်ပေါင်းများစွာ ကြာနေပါပြီ။ ဂျာမန်ဘောလုံးမှာ အမြဲတမ်းကောင်းခဲ့တဲ့အရာက ကျွန်တော်တို့က ခံစစ်ကို ကောင်းကောင်းကစားနိုင်တာပါ။ ကျွန်တော်တို့အနေနဲ့ အခြေခံကျဖို့ လိုပါတယ်။ စပိန်က ခံစစ်ကစားတာ အရမ်းကောင်းပါတယ်။ သူတို့က လူငယ်ကစားသမားတွေရဲ့ လေ့ကျင့်ရေးအစီ အစဉ်တွေကို အာရုံစိုက်ပါတယ်။ အနာဂတ်အကြောင်း စဉ်းစားကြည့်တဲ့အခါ နောက်လာမယ့် ၁၀ နှစ်မှာ မျိုးဆက်သစ်ဘောလုံးသမားတွေအပေါ် အာရုံစိုက်ဖို့က အရမ်းအရေးကြီး ပါတယ်” ဟု ဟန်ဆီဖလစ်ခ်က ပြောကြားခဲ့သည်။
ဂျာမနီအသင်းသည် ၂၀၁၄ ကမ္ဘာ့ဖလား ချန်ပီယံဆုရရှိပြီးနောက်ပိုင်း အဓိကပြိုင်ပွဲ များတွင် အောင်မြင်မှုဝေးကွာနေပြီး ယူရို- ၂၀၁၆ ပြိုင်ပွဲ၌ ဆီမီးဖိုင်နယ်၊ ၂၀၁၈ ကမ္ဘာ့ဖလားပြိုင်ပွဲ၌ အုပ်စုအဆင့်၊ ယူရို-၂၀၂၀ ပြိုင်ပွဲ၌ ၁၆ သင်းအဆင့်နှင့် ၂၀၂၂ ကမ္ဘာ့ ဖလားပြိုင်ပွဲ၌ အုပ်စုအဆင့်မှ ထွက်ခဲ့ရသည်။
၂၀၂၂ ကမ္ဘာ့ဖလားပြိုင်ပွဲ ယှဉ်ပြိုင်ခဲ့သည့် ဂျာမနီအသင်း၏ ပျမ်းမျှအသက်မှာ ၂၆ ဒသမ ၇ နှစ်ဖြစ်ပြီး ပြိုင်ပွဲဝင် ၃၂ သင်းအနက် ပျမ်းမျှအသက်အငယ်ဆုံးစာရင်းတွင် အဆင့် ၁၂ နေရာ ရပ်တည်ခဲ့သည်။ ယခုကမ္ဘာ့ဖလားတွင် ဂါနာအသင်းက ၂၄ ဒသမ ၇ နှစ်ဖြင့် ပျမ်းမျှအငယ်ဆုံးအဖြစ် ရပ်တည်နေသည်။
