ယခုနှစ် ဘောလုံး ရာသီ အတွက် ပရီးမီးယားလိဂ် ပွဲစဉ် ၈ ပြီးဆုံးထားတဲ့ အချိန် အထိ ၊ ဘယ် အသင်း တသင်း ကမှ ရာနှုန်းပြည့် ပြည့်ဝတဲ့ စွမ်းဆောင်ရည်မျိုး မပြထားရသေးပါဘူး ။ လက်ရှိ ချန်ပီယံ လီဗာပူး အသင်း ဟာလည်း မနှစ်က ရာသီ တဝက်လောက် အထိ ပြသခဲ့တဲ့ အတည်ငြိမ်ဆုံး စွမ်းဆောင်ရည် ကို ပြန်ရဖို့ ရုန်းကန်နေရပါတယ် ။
အနီးကပ် ပြိုင်ဖက် ဖြစ်တဲ့ မန်စီးတီး ဟာလည်း ဒီရာသီမှာ ထင်သလောက် မဟုတ်နေပြန်ပါဘူး ။ လောလောဆယ် အမှတ်ပေး ဇယား ကို ဦးဆောင်နေသူ က လက်စတာ အသင်း ဖြစ်ပြီး ၊ ထိပ်ဆုံး ၄သင်း စာရင်းမှာ ဆောက်သမ်တန် အသင်း ကလည်း အံ့အားသင့်စွာ ရပ်တည်နေပါတယ် ။
နောက်ဆုံး ကစားခဲ့တဲ့ ပွဲအနည်းငယ် အနေအထား ကို ကြည့်ရင်တော့ ရလဒ်ပိုင်း အရရော ၊ ခြေစွမ်းပိုင်း အရပါ အထူး တိုးတက်လာတဲ့ အသင်း ၂သင်း ရှိနေပြီး ၊ သူတို့ ကတော့ လန်ဒန် မြို့ခံ ပြိုင်ဖက် ၂သင်း ဖြစ်တဲ့ တော့တင်ဟမ် နဲ့ ချဲလ်ဆီး အသင်းတို့ ဖြစ်ကြပါတယ် ။
တော့တင်ဟမ် အသင်း ဟာ ရာသီ အဖွင့်ပွဲမှာ အဲဗာတန် ကို ရှုံးနိမ့်ခဲ့ပြီး နောက်ပိုင်း ပရီးမီးယားလိဂ် ၇ပွဲဆက် ရှုံးပွဲ မရှိထားတဲ့ အသင်း ဖြစ်ပြီး ၊ ချဲလ်ဆီး အသင်း ကတော့ ပရီးမီးယားလိဂ် အပါအဝင် ပြိုင်ပွဲစုံ နောက်ဆုံး ၁၁ပွဲဆက် ရှုံးပွဲ လုံးဝ မရှိထားပါဘူး ။
လက်တွေ့ကျကျ သုံးသပ်ရရင်တော့ လီဗာပူး ၊ မန်စီးတီး တို့က ဒီရာသီ ပရီးမီးယားလိဂ် ချန်ပီယံဆု ကို အဓိက စိန်ခေါ်မယ့် ၂သင်း ဖြစ်တယ် ဆိုရင် ၊ တော့တင်ဟမ် နဲ့ ချဲလ်ဆီး တို့က ဒီ ၂သင်း ကို အနီးကပ် ဖိအားပေးမယ့် အသင်းတွေ ဖြစ်လာနိုင်ပါတယ် ။
တော့တင်ဟမ် ကွင်းလယ်လူဟောင်း ဂျေမီ အိုဟားရား ကတော့ လတ်တလော ရလဒ် နဲ့ ခြေစွမ်းပိုင်း အရ တော့တင်ဟမ် ၊ လက်စတာ ၊ ချဲလ်ဆီး တို့ ချန်ပီယံလောင်း စာရင်းထဲမှာ ထည့်ထားလို့ ရပေမယ့် ၊ ဟယ်ရီကိန်း ၊ ဆွန်ဟောင်မင် ၊ ဂါရတ်ဘေးလ် တိုက်စစ် အတွဲကို ပိုင်ဆိုင်ထားတဲ့ တော့တင်ဟမ် ကသာ လီဗာပူး ၊ မန်စီးတီး တို့ကို ချန်ပီယံဆု အတွက် ပိုမို ဖိအားပေးနိုင်မယ် လို့ ထင်မြင်ကြောင်း ဖွင့်ဟလာပါတယ် ။
Talksport ရဲ့ အစီအစဉ် တခုမှာ အိုဟားရား က ” လတ်တလော သတင်းတွေက လီဗာပူး အတွက် တကယ့် အိပ်မက်ဆိုးတွေပါပဲ ။ ခင်ဗျား အနေနဲ့ သူတို့ အတွက် စိတ်မကောင်း ဖြစ်သင့်ပါတယ် ။ သူတို့ဟာ ကလပ် ရဲ့ အကောင်းဆုံး ဗဟို ခံစစ်မှူး ကို ရေရှည် အတိုင်းအတာ တရပ် နဲ့ လက်လွှတ်ထားရပါပြီ ။ ”
” ဂျိုးဂိုမက်ဇ် ဆိုရင် အင်္ဂလန် လက်ရွေးစင် အသင်း အတွက်ပါ နစ်နာစရာ ဖြစ်ပါတယ် ။ လီဗာပူး အတွက် ကတော့ တပူပေါ် ၂ပူဆင့် သဘော ဖြစ်သွားတာပေါ့ဗျာ ။ ဗန်ဒိုက် ကို လက်လွှတ်ထားရတဲ့ အခြေအနေ မှာတောင် ဖာဘင်ဟို နဲ့ ဂိုမက်ဇ် အတွဲသာ ရှိသေးရင် ဘာပဲပြောပြော လီဗာပူး ခံစစ် က တောင့်တင်းမှု အတိုင်းအတာ တခုအထိ ရှိပါသေးတယ် ။ ”
” ဒါပေမယ့် အခုအချိန်မှာ ဂိုမက်ဇ် ကို ကာလရှည် လက်လွှတ်ရတော့မယ် ဆိုတော့ ဒါဟာ သူတို့ ခံစစ်ပိုင်း အတွက် အခြေအနေဆိုး တရပ်ပါပဲ ။ ဒါဟာ ပရီးမီးယားလိဂ် ချန်ပီယံဆု အတွက် ပြိုင်ဆိုင်မှု ကို ပိုပြီး အခွင့်အလမ်း များစေတယ် လို့ ပြောရမှာပါ ။ ဘယ်အသင်း ကပဲ ဖြစ်ဖြစ် ၊ ချန်ပီယံဆု ကို သိမ်းပိုက်ချင်တယ် ဆိုရင် အခုကတည်းက ယုံကြည်မှု ပြည့်ဝနေတော့မှာပါ ။ ”
” ပရီးမီးယားလိဂ် ဖလား ကို အလိုရှိတယ် ဆိုရင် အဲ့ဒီ အသင်း တွေရဲ့ အတွေးမှာ ‘ အကယ်၍ လီဗာပူး ကို အမှီလိုက်ဖို့ ငါတို့ ကြိုးစားနေတယ် ဆိုရင် ၊ ဒီနှစ် ဘောလုံး ရာသီ က အကောင်းဆုံး အခွင့်အရေးပဲ ‘ လို့ တွေးကြမှာပါ ။ ဒီရာသီ ချန်ပီယံလုပွဲ က ၂ကောင်တည်း ပြေးတဲ့ မြင်းပြိုင်ပွဲ မဟုတ်တော့တာ သေချာနေပါတယ် ။ ”
” လောလောဆယ် မှာ တော့တင်ဟမ် က ဒီ စာရင်းမှာ ပါဝင်နေပါပြီ ။ နောက်ပြီး ခင်ဗျား အနေနဲ့ ချဲလ်ဆီး ၊ လက်စတာ တို့ကိုလည်း ချန်ပီယံလောင်း စာရင်းမှာ ထည့်ထားရပါမယ် ။ ဒီ အသင်း တွေကို ခင်ဗျား မရွေးချယ်လို့ မဖြစ်ပါဘူး ။ သူတို့တွေဟာ နောက်ပိုင်း ပွဲစဉ်တွေမှာ ကစားပုံ အလွန်အမင်း ကောင်းခဲ့ကြတာပါ ။ ”
” လက်စတာ ဆိုရင် ဂျေမီ ဗာဒီ နဲ့ အခြား ပွဲထွက် ကစားသမား တွေကို ကြံ့ခိုင်မှု ပြည့်နေအောင် ထိန်းထားနိုင်ရင် ၊ ပရီးမီးယားလိဂ် ချန်ပီယံဆု ကို စိန်ခေါ်ဖို့ သူတို့မှာ လုံလောက်မှု ရှိပါတယ် ။ တော့တင်ဟမ် ကတော့ တိုက်စစ် အတွဲမှာ လက်စတာ ၊ ချဲလ်ဆီး ထက် ပိုကောင်းတဲ့ အတွဲ ကို ပိုင်ဆိုင်ထားပါတယ် ။ လောလောဆယ် မှာ ဂါရတ်ဘေးလ် – ဟယ်ရီကိန်း – ဆွန်ဟောင်မင် အတွဲဟာ မယုံနိုင်ဖွယ် စွမ်းဆောင်ရည် မြင်မားနေပါတယ် ။ ” လို့ ပြောကြားခဲ့ပါတယ် ။
