မန်ယူအသင်း၏ နည်းပြဖြစ်သူ ရဲ့လ်ဖ်ရန်းနစ်သည် လာမည့်ရာသီ၌ နည်းပြရာထူးမှ ၎င်းစွန့်ခွာခဲ့ပါက သူ၏ နေရာတွင် အစားထိုးရန်အတွက် အေဂျက်စ်အသင်း၏ နည်းပြဖြစ်သူ အဲရစ်တန်ဟက်ဂ်အား စိတ်ဝင်စားနေသော်လည်း အသင်းသားများကမူ လက်ရှိ PSG အသင်းနည်းပြ ပိုချက်တီနိုကို ပိုမိုလိုလားနေကြကြောင်း သိရှိရသည်။
ရန်းနစ်သည် နည်းပြရာထူးမှ စွန့်ခွာပြီးပါက မန်ယူအသင်း၏ နည်းစနစ်ဒါရိုက်တာရာထူးကို ဆက်လက်ရယူဆောင်ရွက်သွားမည်ဖြစ်ရာ နည်းပြသစ်ခန့်အပ်မှုတွင် ဆက်လက်အရေးပါနေဦးမည်ဖြစ်သည်။
သူက အသင်း၏ အနာဂတ်စီမံကိန်းများအတွက် သင့်တော်သည့် နည်းပြအဖြစ် အေဂျက်စ်အသင်းနည်းပြ အဲရစ်တန်ဟက်ဂ်ကို စိတ်ဝင်စားနေခြင်းဖြစ်ပြီး မန်ယူအသင်းကစားသမားများထဲမှ အများစုကမူ ပိုချက်တီနိုကိုသာ နည်းပြအဖြစ် မြင်တွေ့လို ခြင်းဖြစ်သည်။
ပိုချက်တီနိုသည် စပါးအသင်းကို နည်းပြအဖြစ် ကိုင်တွယ်ခဲ့စဉ်က အဲရစ်တန်ဟက်ဂ်၏ အေဂျက်စ်အသင်းကို ချန်ပီယံလိဂ်ဆီမီးဖိုင်နယ်အဆင့်တွင် ကျော်ဖြတ်ခဲ့ဖူးသူဖြစ်ပြီး ပရီးမီးယားလိဂ်တွင်လည်း စပါးအသင်းကို ရလဒ်ကောင်းများရရှိအောင် စွမ်းဆောင်ပေးနိုင်ခဲ့သူဖြစ်သည်။
မန်ယူအသင်းတွင်းရှိ သတင်းရင်းမြစ်တစ်ဦးက ”အသင်းသားတော်တော်များများက ပိုချက်တီနိုကို အနာဂတ်နည်းပြအဖြစ် မြင်ချင်နေကြတယ်။ ပိုချက်တီနိုက ပရီးမီးယားလိဂ်အတွေ့အကြုံ ကောင်းကောင်းရှိသလို၊ ကစားသမားတွေနဲ့ ဆက်ဆံရေးကောင်း တည်ဆောက်နိုင်တာကိုလည်း သူတို့ သဘောကျကြတယ်”ဟု ပြောကြားခဲ့သည်။
ပိုချက်တီနိုသည် ဆိုးလ်ရှား နည်းပြရာထူးမှ ထွက်ခွာချိန်တွင် မန်ယူအသင်းနည်းပြဖြစ်လာရန် ရေပန်းစားခဲ့သော်လည်း PSG အသင်းတွင်သာ ဆက်နေရန် ဆုံးဖြတ်ခဲ့သူလည်းဖြစ်သည်။
