၂၀၂၀-၂၁ ရာသီ ပရီးမီးယားလိဂ်ပွဲစဉ်ဇယားကို သြဂုတ်လ(၂၁)ရက်ထက် နောက်မကျဘဲ ထုတ်ပြန်သွားမည်ဟု premierleague.com တွင် ဖော်ပြထားသည်။
ပရီးမီးယားလိဂ်ပွဲစဉ်ဇယားကို တရားဝင်ထုတ်ပြန်ရခြင်းမရှိသေးသော်လည်း စက်တင်ဘာ(၁၂)ရက်တွင် စတင်မည့်အဖွင့်ပွဲစဉ်မှာ ကြိုတင်ပေါက်ကြားမှုဖြစ်ပေါ်ခဲ့ကြောင်း ဗြိတိန်မီဒီယာများက ဖော်ပြခဲ့ကြသည်။
ပရီးမီးယားလိဂ်သည် ပရိသတ်အားပေးမှုများပြားနေသည့် Premier League Fantasy Game ကို ရာသီသစ်အတွက် ပြန်လည်စတင်ခွင့် ပြုခဲ့ရာ၌ ရာသီသစ်အဖွင့်ပွဲစဉ်ကိုပါ ဖော်ပြမိခဲ့ခြင်းဖြစ်ကြောင်း သိရ သည်။
အဆိုပါ Premier League Fantasy Game မှာ ပရီးမီးယားလိဂ်ပြိုင်ပွဲနှင့် ချိတ်ဆက်ကစားရခြင်းဖြစ်ပြီး စနေနေ့က ရာသီသစ်အတွက် ပြန်လည်တင်ဆက်ခဲ့ခြင်းဖြစ်သည်။
ကြိုတင်ပေါက်ကြားခဲ့သည့် ရာသီသစ် ပရီးမီးယားလိဂ်အဖွင့်ပွဲစဉ်(၁)တွင် ပွဲကြီးပွဲကောင်းအဖြစ် မန်ယူ-အာဆင်နယ်ပွဲ ပါဝင်နေပြီး လက်ရှိချန်ပီယံ လီဗာပူးလ်အသင်းမှာ ဝက်စ်ဟမ်းနှင့် အဝေးကွင်းပွဲ ယှဉ်ပြိုင်ကစားရမည်ဟု သိရသည်။
မန်စီးတီးက အိမ် ကွင်းတွင် ပဲလေ့စ်၊ ချယ်လ်ဆီးက အိမ်ကွင်းတွင် ဆောက်သမ်တန်၊ စပါးက အိမ်ကွင်းတွင် ဗီလာအသင်းတို့နှင့် ယှဉ်ပြိုင်ကစားရမည်ဖြစ်ကြောင်း သတင်းထွက်ခဲ့ခြင်းဖြစ်သည်။
သို့သော် မန်ချက်စတာမြို့ခံနှစ်သင်းဖြစ်သည့် မန်ယူနှင့် မန်စီးတီးတို့ ပွဲစဉ်တစ်ခုတည်းတွင် အိမ်ကွင်း၌ ပြိုင်တူကစားရမည့်အခြေအနေမှာ ဖြစ်နိုင်ခြေမရှိကြောင်း ထောက်ပြသူအချို့လည်း ရှိခဲ့သည်။
