၂၀၀၉ နှင့် ၂၀၁၁ ချန်ပီယံလိဂ် ဗိုလ်လုပွဲများတွင် မိမိတို့မန်ယူအသင်းအနေဖြင့် နည်းစနစ်ပိုင်းအမှားအယွင်းများရှိခဲ့သည်ဟု မန်ယူတိုက်စစ်မှူးဟောင်း ရွန်နီက ဝန်ခံခဲ့သည်။
ရွန်နီသည် (ထိုစဉ်က) မန်ယူအသင်းနည်းပြ ဖာဂူဆန်၏ နည်းစနစ်၊ နည်းဗျူဟာများကို အတိအလင်းဝေဖန်ခဲ့ခြင်းဖြစ်ပြီး တနင်္ဂနွေနေ့ထုတ် Sunday Times သတင်းစာတွင် ယင်းကဲ့သို့ ရေးသားခဲ့ခြင်းဖြစ်သည်။
ရှေ့လာမည့် သြဂုတ်(၇)ရက်နေ့တွင်ကစားမည့် ချန်ပီယံလိဂ် ရှုံးထွက်(၁၆) သင်းအဆင့်ပွဲစဉ် မန်စီးတီး – ရီးယဲလ်မက်ဒရစ်ပွဲ ပွဲကြိုသုံးသပ်ချက်ကို ရေးသားရာ၌ ရွန်နီက ယင်းကဲ့သို့ ထည့်သွင်းရေးသားခဲ့ခြင်းဖြစ်သည်။
”ကျွန်တော်တို့ ဂွါဒီယိုလာရဲ့ဘာစီလိုနာကို ရှုံးနိမ့်ခဲ့တဲ့ ချန်ပီယံလိဂ် ဗိုလ်လုပွဲ(၂) ပွဲမှာ သူတို့ကို ဖိအားပေးပြီး ရင်ဆိုင်ကစားဖို့ ကြိုးစားခဲ့ပါတယ်။ ဒါဟာ ကိုယ့်ကိုယ်ကိုယ် သတ်သေသလိုပါပဲ။ အဲဒီတုန်းက ဖာဂူဆန်ပြောတာ ကျွန်တော် မှတ်မိနေပါတယ်။ ဒါက မန်ယူအသင်း။ ငါတို့ တိုက်စစ်ကစားမယ်။ ဒါက ငါတို့အသင်းရဲ့ဓလေ့ထုံးစံတစ်ခုဖြစ်တယ်လို့ ဖာဂူဆန်က ပြောခဲ့တာပါ။ အဲဒီတုန်းက ကစားသမားအားလုံးကတော့ ပွဲအပေါ် မှားယွင်းစွာချဉ်းကပ်တယ်လို့ သိနားလည်ခဲ့ပါတယ်”စသည်ဖြင့် ရွန်နီက ရေးသားခဲ့ခြင်းဖြစ်သည်။
ယင်းကဲ့သို့ရေးသားမှုမှာ ဖာဂူဆန်၏နည်းစနစ်များကို မှားယွင်းကြောင်းဝေဖန်ခြင်းဖြစ်၍ ၎င်းတို့နှစ်ဦးအကြားဆက်ဆံရေးမှာ အက်ကြောင်းပိုထင်လာနိုင်ကြောင်း ဗြိတိန်မီဒီယာများက ဖော်ပြခဲ့ကြသည်။
