ပရီးမီးယားလိဂ်အဖွဲ့ချုပ်တာဝန်ရှိသူများနှင့် အင်္ဂလန်ကလပ်အသင်း ကြီး (၆)သင်းဖြစ်သော မန်ယူ၊ မန်စီးတီး၊ ချယ်လ်ဆီး၊ အာဆင်နယ်၊ စပါး၊ လီဗာပူးလ်အသင်းတို့မှ တာဝန်ရှိသူများသည် ဥရောပစူပါလိဂ်ပြိုင်ပွဲတွင် ယင်းအသင်းများ ပါဝင်ခဲ့သည့် လုပ်ရပ်အတွက် ပြစ်ဒဏ်ချမှတ်ရန် နှစ်ဦးနှစ်ဖက်ဆွေးနွေးနေပြီး သဘောတူညီမှုရရှိရန် နီးစပ်နေပြီဖြစ်ကြောင်း သိရှိရသည်။
ပရီးမီးယားလိဂ်အဖွဲ့ချုပ်အနေဖြင့် ယင်းအသင်း (၆)သင်းအား ဒဏ်ငွေပြစ်ဒဏ်သာ ချမှတ်ဖွယ်ရှိနေကြောင်း သိရှိရသည်။
Daily Mail သတင်းစာ၏ဖော်ပြချက်အရ ချမှတ်မည့် ဒဏ်ငွေပမာဏနှင့်ပတ်သက်၍ နှစ်ဦးနှစ်ဖက်အကြား အကြိတ်အနယ် ဆွေးနွေးနေကြဆဲဖြစ်ကြောင်း သိရှိရသည်။
ဥရောပဘောလုံးအဖွဲ့ချုပ် (UEFA)ကမူ ယင်းအသင်း (၆)သင်း နှင့် အေစီမီလန်၊ အင်တာမီလန်၊ အက်သလက်တီကိုမက်ဒရစ်အသင်းတို့အား ဥရောပပြိုင်ပွဲတစ်ခုမှ ရရှိသော ဝင်ငွေ၏ ၅%ကို ဒဏ်ကြေးပေးဆောင်ရန်နှင့် UEFA က စီစဉ်ဆောင်ရွက်နေသော ကလေးသူငယ်များဘောလုံးဖွံ့ဖြိုးတိုးတက်မှုအစီအစဉ်သို့ စုစုပေါင်း ယူရို (၁၅)သန်း ပေးဆောင်ရန် ပြစ်ဒဏ်ချမှတ်ခဲ့သည်။
Daily Mail ၏ ဖော်ပြချက်အရ ပရီးမီးယားလိဂ်အဖွဲ့ချုပ်အနေဖြင့် ယင်းအသင်း (၆)သင်းကို ဒဏ်ငွေပေါင်(၇)သန်းဝန်းကျင်ချမှတ်ဖွယ်ရှိကြောင်း သိရသည်။
