လာဇီယိုအသင်း၏ အီတလီတိုက်စစ်မှူး အီမိုဘီလီသည် တနင်္ဂနွေနေ့က ယှဉ်ပြိုင်ကစားခဲ့သော ဗီရိုနာနှင့်ပွဲတွင် ဟက်ထရစ်သွင်းယူခဲ့ပြီးနောက် ယခုရာသီ စီးရီးအေဂိုးသွင်းဘုရင်ဆုကို ရရှိရန် အလားအလာပိုကောင်းသွားခဲ့သလို၊ ဥရောပဂိုးသွင်းဘုရင်ဆုအ တွက် ထိပ်ဆုံးမှဦးဆောင်နေသော ဘိုင်ယန်မြူးနစ်တိုက်စစ်မှူး လီဝန်ဒေါစကီးကိုလည်း လိုက်မီသွားခဲ့သည်။
အီမိုဘီလီသည် ယခုရာသီ၌ လာဇီယိုအသင်းအတွက် စီးရီးအေပွဲစဉ် (၃၆)ပွဲ ကစားခဲ့ရာတွင် (၃၄)ဂိုးသွင်းယူနိုင်ခဲ့ခြင်းဖြစ်ပြီး ဒုတိယနေရာမှ ဂျူဗင်တပ်စ်တိုက်စစ်မှူး စီရော်နယ်လ်ဒိုကို (၃)ဂိုးအထိ ဖြတ်ထားနိုင်ခဲ့သည်။
ထို့ကြောင့် အီမိုဘီလီသည် စီးရီးအေဂိုးသွင်းဘုရင်ဆုကို တတိယအကြိမ်မြောက်အဖြစ် ရယူနိုင်ရန် အလားအလာပိုကောင်းလာခဲ့ခြင်းဖြစ်သည်။
အီမိုဘီလီသည် တိုရီနိုအသင်းတွင်ရှိစဉ် ၂၀၁၃-၁၄ ရာသီက သွင်းဂိုး(၂၂)ဂိုးဖြင့် စီးရီးအေဂိုးသွင်းဘုရင်ဆု ရရှိခဲ့သလို၊ လာဇီယိုအသင်းသို့ ပြောင်းရွှေ့လာပြီးနောက် ၂၀၁၇-၁၈ ရာသီတွင်လည်း (၂၉)ဂိုးသွင်းယူကာ အင် တာမီလန်တိုက်စစ်မှူး အီကာဒီ(ယခု PSG)နှင့်အတူ စီးရီးအေဂိုးသွင်းဘုရင်ဆုကို ပူးတွဲရယူနိုင်ခဲ့သည်။
စီးရီးအေပြိုင်ပွဲမှာ နောက်ထပ်(၂)ပွဲယှဉ်ပြိုင်ကစားရန် ကျန်ရှိနေသေးသောကြောင့် အီမိုဘီလီအနေဖြင့် ပြိုင်ပွဲ၏သမိုင်း၌ တစ်ရာသီအတွင်း ဂိုးအများဆုံးသွင်းယူနိုင်သူအဖြစ် စံချိန်တင်ထားသော ရိုဆက်တီ(တိုရီနို)နှင့် ဟီဂွါအင်(နာပိုလီ) တို့၏ (၃၆)ဂိုးစံချိန်ကိုလည်း လိုက်မီဖွယ်ရှိနေကြောင်း သိရသည်။
ထို့ပြင် အီမိုဘီလီသည် လာဇီယိုအသင်းအတွက် ပြိုင်ပွဲစုံသွင်း ဂိုး (၁၂၃)ဂိုး ရှိသွားခဲ့ပြီဖြစ်သည့်အတွက် အသင်း၏သမိုင်းတစ်လျှောက် ဂိုးသွင်းအများဆုံးကစားသမားစာရင်း၌ တတိယနေရာ သို့ ရောက်ရှိလာခဲ့ကြောင်းလည်း သိရသည်။
အီမိုဘီလီသည် လက်ရှိ အနေအထားအရ ဥရောပဂိုးသွင်းဘုရင်ဆုအတွက် ဂျူဗင်တပ်စ်တိုက်စစ်မှူး စီရော်နယ်လ်ဒိုနှင့် အဓိကပြိုင်ဆိုင်ရဖွယ်ရှိနေပြီး ၂၀၀၆-၀၇ ရာသီက ရိုးမားတိုက်စစ်မှူး တော့တီ ရရှိပြီနောက်ပိုင်း စီးရီးအေကစားသမားများနှင့် ဝေးကွာ နေမှုကို အဆုံးသတ်နိုင်ရန် နီးစပ်နေပြီဖြစ်သည်။
အီမိုဘီလီသည် ယခုရာသီ စီးရီးအေအကောင်းဆုံးဘောလုံးသမားဆုရရှိရန် ရေပန်းစားနေကြောင်းလည်း သိရသည်။
