လာဇီယိုအသင်းသည် အသင်း၏ဥရောပရွှေဖိနပ်ဆုရှင် အဓိကတိုက်စစ်မှူး အီမိုဘီလီကို စာချုပ်သစ်ချုပ်ဆိုရန် ကြိုးစားနေပြီး ၂၀၂၅ ခုနှစ်အထိ ချုပ်ဆိုသွားဖွယ်ရှိသည်ဟု အီတလီမီဒီယာများက ဖော်ပြနေကြသည်။
လာဇီယိုအသင်းသည် ၎င်းတို့၏အဓိကတိုက်စစ်မှူး အီမိုဘီလီကို စာချုပ်သစ်ချုပ်ဆိုလိုနေပြီး အသက်(၃၀)နှစ်ရှိပြီဖြစ်သည့် အီမိုဘီလီက နှစ်ရှည်စာချုပ်တစ်ရပ် အလိုရှိနေသည်။
သို့ဖြစ်ရာ လာဇီယိုအသင်းသည် ၂၀၂၅ ခုနှစ်အထိ စာချုပ်အပြင် တစ်နှစ်သက်တမ်းတိုးခွင့်ရှိမည့်အချက်ကိုပါ ထည့်သွင်းကာ ၎င်းအား ကမ်းလှမ်းသွားမည်ဟု သိရသည်။
စာချုပ်သစ်အရ အီမိုဘီလီအနေဖြင့် တစ်နှစ် ယူရို(၃.၅)သန်းနှင့် (၄)သန်းဝန်းကျင်အကြား ရရှိမည်ဖြစ်သည်။
အီမိုဘီလီသည် ၂၀၁၉-၂၀ ရာသီတွင် လာဇီယိုအသင်းအတွက် အထူးခြေစွမ်းပြခဲ့ပြီး စီးရီးအေသွင်းဂိုး (၃၆)ဂိုးသွင်းယူကာ ဥရောပရွှေဖိနပ်ဆုကို ရရှိခဲ့သည်။
၎င်းမှာ ပြီးခဲ့သည့်ရာသီတွင် ပြိုင်ပွဲစုံဂိုးပါဝင်ပတ်သက်မှု (၄၇)ဂိုးအထိ ရှိခဲ့ပြီး (၃၉)ဂိုးသွင်းကာ (၈)ဂိုး ဖန်တီးပေးခဲ့သည်။
အီမိုဘီလီသည် ဂျူဗင်တပ်စ်၊ ဂျီနိုအာ၊ တိုရီနို၊ ဒေါ့မွန်နှင့် ဆီဗီလာအသင်းများတွင် ကစားခဲ့ဖူးပြီး ၂၀၁၆ ခုနှစ်က လာဇီယိုအသင်းသို့ ရောက်ရှိခဲ့သည်။
