အိုးလ်ထရက်ဖို့ဒ်ကွင်းကို ထပ်မံတိုးချဲ့ရန်စီစဉ်နေပြီး ပရိသတ် (၈၀၀၀၀)ကျော်ဆံ့သည့် ကွင်းတစ်ကွင်းဖြစ်လာမည်

မန်ယူအသင်းတာဝန်ရှိသူများသည် အိမ်ကွင်းအိုးလ်ထရက်ဖို့ဒ်အား ထပ်မံတိုးချဲ့ရန်စီစဉ်နေပြီး ကွင်း၏ ပွဲကြည့်စင်တစ်ခုဖြစ်သော Sir Bobby Charlton ပွဲကြည့်စင်တွင် ခုံအရေအတွက် ဦးစားပေးဖြည့်တင်းသွားမည်ဖြစ်ကြောင်း သိရှိရသည်။

ခုံအရေအတွက် တိုးမြှင့်ပြီးပါက အိုးလ်ထရက်ဖို့ဒ်ကွင်းမှာ ပရိသတ် (၈၀၀၀၀)ကျော်ဆံ့သည့် ကွင်းတစ်ကွင်းဖြစ်လာမည်ဖြစ်ကြောင်း သိရှိရသည်။

အိုးလ်ထရက်ဖို့ဒ်ကွင်းသည် လက်ရှိတွင် ပရိသတ် (၇၄၁၄၀)ဦးဆံ့ ပြီး အင်္ဂလန်ကလပ်အသင်းများ၏ ကွင်းများထဲတွင် ပရိသတ်အများဆုံး ဝင်ဆံ့သော ကွင်းတစ်ကွင်းအဖြစ် ရပ်တည်နေသည်။

ယခုနောက်ပိုင်းနှစ်များတွင် အာဆင်နယ်၊ စပါး၊ မန်စီးတီး အစရှိသော အသင်းများက ကွင်းသစ်များကို တည်ဆောက်လာကြပြီး ပရိသတ် (၆၀၀၀၀)ဝန်းကျင်ဆံ့ကွင်းများကို ပိုင်ဆိုင်လာကြရာ အိုးလ်ထရက်ဖို့ဒ်ကွင်းကိုလည်း ပိုမိုတိုးချဲ့ရန် မန်ယူပရိသတ်များထံမှ တောင်းဆိုမှုများ ရှိခဲ့သည်။

မန်ယူအသင်းအနေဖြင့် ၂၀၀၆ ခုနှစ်နောက်ပိုင်းမှစတင်၍ အိမ်ကွင်းအိုးလ်ထရက်ဖို့ဒ်အား သိသာထင်ရှားသည့်ပြုပြင်ပြောင်းလဲမှုများ ပြုလုပ်ခြင်းမရှိရာ မန်ယူပရိသတ်များထံမှ ဝေဖန်ပြစ်တင်မှုများရှိခဲ့သည်။

မန်ယူအသင်း၏ ပြိုင်ဘက်အသင်းတစ်သင်းဖြစ်သော လီဗာပူးလ်အသင်းမှာလည်း အိမ်ကွင်းအန်ဖီးလ်အား ပြင်ဆင်ရန် စီစဉ်နေပြီး ၂၀၂၃-၂၄ ရာသီတွင် ပရိသတ် (၆၁၀၀၀)ဆံ့ ကွင်းဖြစ်လာမည်ဖြစ်ကြောင်း သိရသည်။