အိုလံပစ်အားကစားရွာအတွင်း ကစားသမားများ အရက်သောက်သုံးမှုတွေ့ရှိသဖြင့် စုံစမ်းစစ်ဆေးနေကြောင်း တိုကျို ၂၀၂၀ ပြိုင်ပွဲကျင်းပရေး အထွေထွေဒါရိုက်တာ တိုရှီရိုမူတိုက အတည်ပြုပြောကြားခဲ့သည်။
စနေနေ့ညပိုင်းက အားကစားရွာအတွင်းရှိ ပန်းခြံ၌ ကစားသမားများနှင့် အခြားအဖွဲ့ဝင်များ အရက်သောက်နေသည်ကို တွေ့ရှိခဲ့ခြင်းဖြစ်သည်။
ပြိုင်ပွဲကျင်းပရေးကော်မတီက ၎င်းတို့ကို အရေးယူသွားမည် ဖြစ်ကြောင်း သိရသည်။
တိုကျိုအိုလံပစ်ပြိုင်ပွဲ၌ အရက်သောက်သုံးမှုကို တားမြစ်ပိတ်ပင်ထားခြင်းမရှိသော်လည်း ကိုရိုနာဗိုင်းရပ်စ် ကူးစက်ပြန့်ပွားမှု မရှိစေရန်အတွက် မိမိ၏အခန်းအတွင်း တစ်ဦးတည်းသောက်သုံးရန် ညွှန်ကြားထားကြောင်း သိရသည်။
အိုလံပစ်အားကစားရွာများ၌ အရက်သောက်ခြင်း၊ ပါတီပေးခြင်းများမှာ အမြဲရှိတတ်သည့်အစဉ်အလာဖြစ်သည်။
အားကစားသမားများက ပြိုင်ပွဲပြီးဆုံးသွားလျှင် ယင်းသို့ အပန်းဖြေလေ့ရှိကြောင်းလည်း သိရသည်။
