အာဆင်နယ် အသင်း ရဲ့ ဂန္တဝင် နည်းပြကြီး အာဆင်ဝင်းဂါးက ခုလက်တစ်လောမှာ ရေးသား ပြောဆို နေကြသလိုမျိုး အိုဇေးလ် ဟာ ကိုင်တွယ်ရ ခက်ခဲတဲ့ ကစားသမား တစ်ဦး မဟုတ်ကြောင်း ပြောကြား လိုက်ပြီး ဂျာမန်သားရဲ့ အကောင်းဆုံး ပုံစံ ရရှိဖို့ဆို ထောက်ပံ့အားပေးဖို့ လိုအပ်ကြောင်း ဆိုပါတယ် ။
အသက် ၃၂ နှစ် အရွယ် ရှိပြီ ဖြစ်တဲ့ အိုဇေးလ် ဟာ အာတီတာ နည်းပြ ဖြစ်ခါစမှ အာဆင်နယ် အတွက် ပွဲထွက် ကစားခွင့် ရခဲ့ပေမယ့် ဘောလုံးပွဲတွေ ပြန်စတဲ့ ဇွန်လ ကတည်းက အသင်းလူစာရင်းကနေ ချန်လှန် ခံထားရတာပါ ။
ဂျာမနီ ကွင်းလယ်လူဟောင်း မီဆွတ် အိုဇေးလ် ဟာ ဒီရာသီ အာဆင်နယ် အသင်း ရဲ့ ယူရိုပါလိဂ်အုပ်စု အဆင့်ပွဲစဉ်တွေအတွက် အပြီးသတ် လူစာရင်း မှာ ပါဝင် ခဲ့ခြင်း မရှိသလို ပရီးမီးယားလိဂ် လူစာရင်း ကနေလည်း ထပ်မံ ချန်လှပ် ခံခဲ့ရပြန် ပါတယ် ။
အိုဇေးလ် ကတော့ ပရီးမီးယားလိဂ် လူစာရင်း ကနေ ချန်လှပ် ခံရပြီးနောက် အင်စတာဂရမ် မှာ ပရိသတ်တွေထံ အိတ်ဖွင့် ပေးစာ ရေးသား ခဲ့ပြီး အသင်းမှာ ပြန်လည် ပါဝင်ခွင့်ရဖို့ အစွမ်းကုန် ကြိုးစားသွားမယ်လို့ ကတိပြု ခဲ့ပါတယ် ။ ဒါ့အပြင် အိုဇေးလ် ဟာ အာဆင်နယ် အသင်းရဲ့ ပွဲစဉ်တွေကို တွစ်တာကနေ အားပေးကာ အသင်းကို ချစ်ခင် နေသေးကြောင်း ပြသ နေပါတယ် ။
အာတီတာ ကတော့ အိုဇေးလ် ကို ပရီးမီးယားလိဂ် လူစာရင်း ကနေ ချန်လှပ် ခဲ့တာဟာ ဘောလုံး နဲ့ သက်ဆိုင်တဲ့ ကိစ္စကြောင့်ပဲ ဖြစ်ပြီး လစာလျော့မယူတာနဲ့ လုံးဝ မသက်ဆိုင်ကြောင်း ဖြေရှင်း ထားခဲ့ပါတယ် ။
အာဆင်နယ် အသင်းဟာ ဒီရာသီ ၁၁ ပွဲ ကစားအပြီးမှာ ၁၀ ဂိုးသာ သွင်းယူ ထားနိုင်ပြီး တိုက်စစ် စွမ်းဆောင်ရည် ကျဆင်း နေပါတယ် ။ဒါကြောင့်လည်း အာဆင်နယ် ပရိသတ်တွေဟာ အသင်းဖော်တွေ အတွက် ဂိုးသွင်းခွင့်တွေ ဖန်တီး ပေးနိုင်မယ့် အိုဇေးလ် ကို ပြန်လည် အသုံးပြုစေချင် နေကြပါတယ် ။
အိုဇေးလ် ကို ရီးရဲလ်မက်ဒရစ် အသင်းကနေ ခေါ်ယူ ခဲ့တဲ့ နည်းပြ အာဆင်ဝင်းဂါး က ဂျာမန်သားနဲ့ ပတ်သက်ပြီး အာတီတာ ထံ အခုလို အကြံဉာဏ် ပေးသွားခဲ့ပါတယ် ။ ” သူက ကိုင်တွယ်ရ ခက်ခဲတဲ့ ကစားသမားတော့ မဟုတ်ခဲ့ပါဘူး ။ “
” သူက ကွင်းလယ် ဖန်တီးရှင် တစ်ဦး ဖြစ်ပြီး တစ်မူ ထူးခြားတဲ့ အရည်အသွေးတွေကို ပိုင်ဆိုင် ထားသူပါ ။ သူ အသင်းမှာ ပျော်ပျော်ရွှင်ရွှင် နေနိုင်ဖို့ လိုအပ်ပါတယ် ၊ သူက အနုပညာသည် တစ်ဦးပါ ၊ သူ့လို လူမျိုးက တခြားသူတွေထက် ထိလွယ် ရှလွယ် ဖြစ်တတ်ပါတယ် ။ “
” သူတို့ရဲ့ အကောင်းဆုံး စွမ်းဆောင်ရည်တွေ ပေါ် ထွက်လာဖို့ရာ အားပေးဖို့ လိုအပ်သလို ၊ တွန်းအားပေးမယ့် ပတ်ဝန်းကျင် တစ်ခုလည်း လိုအပ်ပါတယ် ။ ဘောလုံး အသင်း တစ်သင်းကို နည်းလမ်း နှစ်သွယ် နဲ့ မြင်ကြည့်လို့ ရပါတယ် ။ “
” ပထမ တစ်နည်းက တစ်သင်းလုံး တူညီတဲ့ စိတ်ဓတ် ပြင်းပြမှု ၊ လုပ်အားနှုန်း နဲ့ ခံစစ် တာဝန်တွေကို ထမ်းဆောင်စေမလား ။ ဒါမှမဟုတ် ညှိနှိုင်း လုပ်ဆောင်မလားပေါ့ ၊ အသင်းမှာ ခံစစ်ကို သိပ်ဆင်းမကူနိုင်တဲ့ ဖန်တီးရှင် ကစားသမားတွေ များနေရင် သူတို့ကို ခံစစ် တာဝန် ပိုထမ်းဆောင်နိုင်တဲ့သူတွေနဲ့ ဝန်းရံ ကစားခိုင်းရပါမယ် ။ ” လို့ အကြံဉာဏ် ပေးသွားခဲ့ပါတယ် ။
