အသားအရောင်၊ လူမျိုးရေးခွဲခြားမှုတိုက်ဖျက်ရေးအဖွဲ့ တစ်ခုဖြစ်သော Kick It Out အဖွဲ့သည် နယူးကာဆယ်ပရိသတ်များ၏ ဝတ်စားဆင်ယင်မှုနှင့်ပတ်သက်၍ မကျေမနပ်ဖြစ်နေပြီး နယူးကာဆယ်အသင်းတာဝန်ရှိသူများနှင့် ဆွေးနွေးရန် စီစဉ်လျက်ရှိနေကြောင်း သိရသည်။
နယူးကာဆယ်အသင်းကို ယခုလအစောပိုင်းက ဆော်ဒီအိမ်ရှေ့မင်းသား မိုဟာမက်ဘင်ဆယ်လ်မန် ဥက္ကဋ္ဌအဖြစ်ဆောင်ရွက်နေသော Public Investment Funds(PIF) အပါအဝင် အကျိုးတူပူးပေါင်းဆောင်ရွက်ရေးအဖွဲ့က ပေါင်(၃၀၅)သန်းဖြင့် ဝယ်ယူခဲ့သည်။
နယူးကာဆယ်အသင်းမှာ ဆော်ဒီစော်ဘွားများထံမှ စီးဆင်းလာမည့်ငွေကြေးများဖြင့် လာမည့်နှစ်ပိုင်းအတွင်း ဥရောပအသင်းကြီး စာရင်းဝင်လာနိုင်သည်ဟု သုံးသပ်ယူဆချက်များရှိခဲ့ပြီး နယူးကာဆယ်ပရိသတ်များမှာ အသင်းပိုင်ရှင်အပြောင်းအလဲကို ဝမ်းသာအားရကြိုဆိုခဲ့ကြသည်။
နယူးကာဆယ်အသင်းအား ပိုင်ရှင်သစ်များက ဝယ်ယူအပြီး ပထမဆုံးပွဲအဖြစ် ပြီးခဲ့သည့် အောက်တိုဘာ(၁၇)ရက်နေ့က အိမ်ကွင်းတွင် လန်ဒန်ကလပ် စပါးအသင်းနှင့်ကစားခဲ့ရာ နယူးကာဆယ်ပရိသတ်အများစုသည် ဆော်ဒီအသင်းပိုင်ရှင်များအား ကြိုဆိုသည့်သဘောဖြင့် အာရပ်စော်ဘွားများကဲ့သို့ဝတ်စားဆင်ယင်မှုများ ပြုလုပ်ခဲ့ကြသည်။
နယူးကာဆယ်ပရိသတ်အချို့က ၎င်းတို့၏ ဦးခေါင်းပေါ်တွင် စားပွဲခင်း၊ လက်သုတ်ပဝါကဲ့သို့ အဝတ်စများဖြင့် အာရပ်စော်ဘွားများဝတ်ဆင်သည့်ပုံစံမျိုး ပြုလုပ်ခဲ့ကြသည်။
ယင်းကဲ့သို့ အင်္ဂလန်ကလပ်အသင်းတစ်သင်း၏ ပရိသတ်များက အာရပ်စော်ဘွားများကဲ့သို့ လိုက်လံဝတ်ဆင်နေခြင်းကို အင်္ဂလန်ဘောလုံးအဖွဲ့ချုပ်(FA)မှ ထိပ်တန်းပုဂ္ဂိုလ်အချို့က စိတ်မချမ်းမသာဖြစ်နေကြောင်းလည်း ဗြိတိန်မီဒီယာများက ဖော်ပြခဲ့ကြသည်။
Kick It Out အဖွဲ့တာဝန်ရှိသူများကမူ ယင်းကဲ့သို့ တစ်ပါးသူ၏ ယဉ်ကျေးမှုပိုင်းဆိုင်ရာအပြုအမူများကို အပျော်အပျက် လိုက်လံပြုလုပ်ခြင်းမှာ ယဉ်ကျေးမှုဆိုင်ရာစော်ကားမှုမြောက်သည်ဟု ယူဆနေကြပြီး နယူးကာဆယ်ပရိသတ်များအနေဖြင့် ယင်းကဲ့သို့ မပြုလုပ်သင့်သည်ကို သိရှိရန်လိုအပ်ကြောင်း ပြောကြားခဲ့ကြသည်။
သို့ဖြစ်ရာ Kick It Out အဖွဲ့မှတာဝန်ရှိသူများသည် နယူးကာဆယ်အသင်းတာဝန်ရှိသူများနှင့်တွေ့ဆုံပြီး ပရိသတ်များကို ယင်းကိစ္စအတွက် အသင်းက ပညာပေးရန် တိုက်တွန်းသွားမည်ဖြစ်ကြောင်း သိရသည်။
ထို့ပြင် ပရိသတ်များအနေဖြင့် ယင်းကဲ့သို့မပြုလုပ်စေရန် ကလပ်အသင်းက တားမြစ်ပိတ်ပင်ရန်အတွက်လည်း တိုက်တွန်းသွားမည်ဖြစ်ကြောင်း သိရသည်။
နယူးကာဆယ်အသင်းသည် အသင်းပိုင်ရှင်သစ်များလက်ထက် ပထမဆုံးပွဲတွင်လည်း နိုင်ပွဲမရခဲ့ဘဲ စပါးအသင်းအား အိမ်ကွင်း၌ (၂-၃)ဂိုးဖြင့် အရေးနိမ့်ခဲ့သည်။
နယူးကာဆယ်အသင်းသည် ရာသီအစ ပရီးမီးယားလိဂ်ပွဲစဉ် (၈)အပြီး နိုင်ပွဲတစ်ပွဲမှ မရသေးဘဲ (၃)ပွဲသရေ၊ (၅)ပွဲရှုံး ရမှတ် (၃)မှတ်ဖြင့် အမှတ်ပေးဇယား အဆင့်(၁၉)နေရာတွင် ဆက်လက်ရပ်တည်လျက်ရှိနေသည်။
