တစ်ရာသီ အကောင်းဆုံးကစားသမားဆုအတွက် ပရိသတ်များ၏ မဲပေးမှုတွင် အူဘာမီယန်းက ၇၄ ရာခိုင်နှုန်းအထိ ရရှိခဲ့ခြင်းဖြစ်သည်။ ဂိုးသမား လေနိုက ၁၆ ရာခိုင်နှုန်းဖြင့် ဒုတိယ၊ အသက် ၁၈ နှစ်သာရှိသေးသော်လည်း ၃၈ ပွဲကစား လေးဂိုးသွင်းယူကာ ဂိုးဖန်တီးမှု ၁၂ ကြိမ်ပြုလုပ်ပေးခဲ့သည့် တောင်ပံကစားသမား ဆာကာက ၁၀ ရာခိုင်နှုန်းဖြင့် တတိယနေရာ ရပ်တည်နိုင်ခဲ့သည်။
၂၀၁၉-၂၀၂၀ ရာသီအတွက် အာဆင် နယ်အသင်း၏ အကောင်းဆုံးကစားသမားဆုကို အသင်းခေါင်းဆောင် အူဘာမီယန်းက ဆွတ်ခူးရရှိခဲ့ကြောင်း သိရသည်။
တစ်ရာသီအကောင်းဆုံးကစားသမား ဆုရရှိသူကို မနေ့က ကြေညာခဲ့ခြင်းဖြစ်ပြီး အူဘာမီယန်းက ဂိုးသမား လေနိုနှင့် လူငယ်ကစားသမား ဆာကာတို့ကိုကျော်ဖြတ်၍ ဆွတ်ခူးရယူနိုင်ခဲ့သည်။ အူဘာမီယန်းသည် ယခုရာသီ ပရီးမီးယားလိဂ်ပြိုင်ပွဲတွင် ၃၆ ပွဲကစား ၂၂ ဂိုးသွင်းယူကာ ဂိုးဖန်တီးမှု သုံးကြိမ်ပြုလုပ်ပေးခဲ့ပြီး ဂိုးအများဆုံးရွှေဖိနပ်ဆုအတွက် တစ်ဂိုးအကွာဖြင့် ဒုတိယနေရာ၌ ရပ်တည်နိုင်ခဲ့သည်။
ထို့ပြင် ၎င်းသည် FA ဖလားချန်ပီယံဆုကို ၁၄ ကြိမ်မြောက်ရရှိရာတွင် အရေးပါသည့် မန်စီးတီး၊ ချယ်လ်ဆီး အသင်းတို့နှင့် ဆီမီးဖိုင်နယ်၊ ဗိုလ်လုပွဲနှစ်ပွဲ၌ အာဆင်နယ်အသင်းရရှိသည့် လေးဂိုးစလုံး သွင်းယူပေးခဲ့သည်။ ၎င်းသည် ယူရိုပါလိဂ်ပြိုင်ပွဲတွင်လည်း ခြောက်ပွဲကစား သုံးဂိုးသွင်းယူကာ ပြိုင်ပွဲစုံတွင် ၄၄ ပွဲကစား သွင်းဂိုး ၂၉ ဂိုးဖြင့် အာဆင်နယ်အတွက် ဂိုးအများဆုံး ကစားသမားအဖြစ် နှစ်ရာသီဆက်တိုက် ရပ်တည်နိုင်ခဲ့သည်။
ထို့ကြောင့် တစ်ရာသီ အကောင်းဆုံးကစားသမားဆုအတွက် ပရိသတ်များ၏ မဲပေးမှုတွင် အူဘာမီယန်းက ၇၄ ရာခိုင်နှုန်းအထိ ရရှိခဲ့ခြင်းဖြစ်သည်။ ဂိုးသမား လေနိုက ၁၆ ရာခိုင်နှုန်းဖြင့် ဒုတိယ၊ အသက် ၁၈ နှစ်သာရှိသေးသော်လည်း ၃၈ ပွဲကစား လေးဂိုးသွင်းယူကာ ဂိုးဖန်တီးမှု ၁၂ ကြိမ်ပြုလုပ်ပေးခဲ့သည့် တောင်ပံကစားသမား ဆာကာက ၁၀ ရာခိုင်နှုန်းဖြင့် တတိယနေရာ ရပ်တည်နိုင်ခဲ့သည်။
အူဘာမီယန်း၏ စာချုပ်သက်တမ်းမှာ တစ်နှစ်သာကျန်ရှိတော့ပြီး FA ဖလားချန်ပီယံဆုမှာ ၎င်းအား အသင်းတွင်ဆက်ရှိစေရန်အတွက် ဆွဲဆောင်နိုင်မည်ဟု မျှော်လင့်ကြောင်း နည်းပြ အာတီတာက ပြောကြားထားသည်။
