ကိုပါအမေရိကချန်ပီယံ အာဂျင်တီးနား အသင်းနှင့် ယူရိုချန်ပီယံ စပိန်အသင်း ယှဉ်ပြိုင်ကစားမည့် CONMEBOL – UEFA Cup of Champions (Finalissima) ပွဲစဉ်ကို ၂၀၂၅ ခုနှစ် ဇွန်လတွင် ကျင်းပမည်ဖြစ်ကြောင်း သိရသည်။
အီတလီဘာသာစကားဖြင့် Finalissima ဟုခေါ်ဆိုသည့် ယင်းပွဲစဉ်မှာ အင်္ဂလိပ်ဘာသာဖြင့် Grand Final ဟု အဓိပ္ပာယ်ရ ခြင်းဖြစ်သည်။ ၂၀၁၅ Finalissima ပွဲစဉ်အတွက် ကျင်းပမည့်နေရာနှင့် ကစားမည့်ရက်ကို သတ်မှတ်ရခြင်းမရှိသေးကြောင်း သိရသည်။
ယင်းတောင်အမေရိကချန်ပီယံနှင့် ဥရောပချန်ပီယံ အသင်းနှစ်သင်း ယှဉ်ပြိုင်ကစားသည့်ပွဲစဉ်များကို ယခင်ကကျင်းပခဲ့ဖူးသော်လည်း တစ်ကြိမ်သာပြုလုပ်နိုင်ပြီး ရှေ့ဆက်နိုင်ခြင်းမရှိ ဖြစ်ခဲ့သည်။ UEFA ဥက္ကဋ္ဌ အတ်မေယိုဖရန်ခီက European – South America Nations Cup ပြိုင်ပွဲ ပေါ်ပေါက်လာရန် ဦးဆောင်ကြိုးပမ်းခဲ့ပြီး ၎င်းမှာ ၁၉၈၃ ခုနှစ်အတွင်း ယာဉ်မတော် တဆမှုကြောင့် ကွယ်လွန်ခဲ့သော်လည်း ပြိုင် ပွဲမှာ ၁၉၈၅ ခုနှစ်တွင် စတင်ကျင်းပခဲ့သည်။
၁၉၈၅ ခုနှစ်တွင် ပြင်သစ်အသင်းက ဥရုဂွေး အသင်းကို ၂-၀ ဂိုးဖြင့် အနိုင်ရဗိုလ်စွဲခဲ့ပြီး ၎င်းအား ဂုဏ်ပြုသောအားဖြင့် Artemio Franchi Trophy ဟုလည်း ခေါ်ဝေါ်ခဲ့ကြသည်။ ယင်းပြိုင်ပွဲကို လေးနှစ်အကြာ ၁၉၈၉ ခုနှစ်တွင် ယူရို-၁၉၈၈ ချန်ပီယံ နယ်သာလန် အသင်းနှင့် ၁၉၈၇ ကိုပါအမေရိကချန်ပီယံ ဥရုဂွေးအသင်းအကြား ကစားမည့်ရက်အား သဘောတူညီမှု မရခဲ့ခြင်းကြောင့် မကစားနိုင်ဘဲ ဖြစ်ခဲ့ရသည်။
၁၉၉၃ ခုနှစ်တွင် ၁၉၉၁ ကိုပါအမေရိကချန်ပီယံ အာဂျင်တီးနားနှင့် ယူရို-၁၉၉၂ ချန်ပီယံ ဒိန်းမတ်အသင်း ယှဉ်ပြိုင်ကစားခဲ့ပြီး တစ်ဂိုးစီ သရေကျနေသောကြောင့် ပယ်နယ်တီအဆုံးအဖြတ်တွင် အာဂျင်တီးနားအသင်းက ၅-၄ ဂိုးဖြင့် အနိုင်ရခဲ့သည်။ ၂၀၂၀ ပြည့်နှစ်တွင် ယင်းပြိုင်ပွဲအား ပြန်လည်အသက်သွင်းရန် သဘောတူခဲ့ကြ ပြီး ၂၀၂၂ ခုနှစ်တွင် တတိယအကြိမ်မြောက်အဖြစ် ပြုလုပ်နိုင်ခဲ့သည်။
လန်ဒန်မြို့ရှိ ဝင်ဘလေကွင်း၌ ကစားခဲ့သည့်ပွဲစဉ်တွင် အာဂျင်တီးနားအသင်းက အီတလီအသင်းကို ၃-၀ ဂိုးဖြင့် အနိုင်ယူကာ ဒုတိယအကြိမ်မြောက် ဗိုလ်စွဲခဲ့သည်။
