PSG အသင်းတိုက်စစ်ကစားသမား နေမာသည် အသင်းမှ ထွက်ခွာတော့မည့် မက်ဆီအား Instagram မှတစ်ဆင့် နှုတ်ဆက်စကားဆိုခဲ့ကြောင်း သိရသည်။
နေမာသည် မက်ဆီနှင့် PSG အဝတ်အစားလဲခန်းအတွင်း ရိုက်ကူးထားသည့် ဓာတ်ပုံနှစ်ပုံကို Instagram တွင် တင်ရှိကာ မက်ဆီ၏အနာဂတ်အတွက် တောင်းဆုပြုခဲ့ခြင်းဖြစ်သည်။
“ညီအစ်ကို… ကျွန်တော်တို့ တွေးထားသလိုပဲ မပြောင်းလဲခဲ့ပါဘူး။ ဒါပေမဲ့ ကျွန်တော်တို့ အရာရာတိုင်းအတွက် ကြိုးစားခဲ့တယ်။ ခင်ဗျားနဲ့အတူ (၂)နှစ်ကြာ ရှိခဲ့တာဟာ ပျော်ရွှင်မှုတစ်ခုပါပဲ။ ခင်ဗျားရဲ့နောက်စင်မြင့်သစ်မှာ ကံကောင်းနိုင်ပါစေ။ ခင်ဗျားကို ကျွန်တော် ချစ်ပါတယ်” ဟု နေမာက Instagram တွင် ရေးသားခဲ့သည်။
မက်ဆီနှင့် နေမာသည် ဘာစီလိုနာအသင်းတွင် ၂၀၁၃ မှ ၂၀၁၇ ခုနှစ်အထိ (၄)ရာသီကြာ အတူတကွကစားခဲ့ခြင်းဖြစ်ပြီး PSG အသင်း၌ (၂)နှစ်ကြာ ပြန်လည်လက်တွဲခဲ့ရခြင်းဖြစ်သည်။
၎င်းတို့နှစ်ဦးသည် ကွင်းပြင်ပ၌ ရင်းနှီးသည့်မိတ်ဆွေများလည်းဖြစ်ကြောင်း သိရသည်။
