မန်ယူအသင်းသည် အသင်းတောင်ပံတိုက်စစ်ကစားသမား အလက်ဆစ်ဆန်းချက်ဇ်ကို အင်တာမီလန်အသင်းသို့ ပြောင်းရွှေ့ကြေးအလွတ်ဖြင့် ထွက်ခွာခွင့်ပြုခြင်းကြောင့် ပေါင် (၅၈) သန်းခန့်သက်သာသွားမည်ဖြစ်ကြောင်း ဗြိတိန်သတင်းစာ Daily Mail က ဖော်ပြခဲ့သည်။
ဩဂုတ်လ (၃)ရက် ညပိုင်းက ထွက်ပေါ်ခဲ့သည့် သတင်းများအရ မန်ယူအသင်းအနေဖြင့် ဆန်းချက်ဇ်၏ တန်ဖိုးမြင့်မားသည့် စာချုပ်ကို ဖျက်သိမ်းရန်အတွက် သူ့ကိုပြောင်းရွှေ့ကြေး အလွတ်ဖြင့် ထွက်ခွာခွင့်ပေးခဲ့ရကြောင်း သိရသည်။
မန်ယူအသင်းနှင့်ချုပ်ဆိုထားသည့် လက်ရှိစာချုပ်အရ ဆန်းချက်ဇ်၏အခြေခံ တစ်ပတ်လစာမှာ ပေါင်(၃)သိန်းခွဲဝန်းကျင်ရှိပြီး Add-ons၊ ဆုကြေး၊ ပုံရိပ်အသုံးပြုခများနှင့်ပေါင်းလျှင် ပေါင် (၅၆ဝဝဝဝ) အထိ အမြင့်ဆုံးရှိသည်။
ဆန်းချက်ဇ်၏အပြောင်းအရွှေ့မှာ သဘောတူညီမှုရရှိခဲ့ပြီးဖြစ်သည်ဟု အီတလီသတင်းများက ဖော်ပြခဲ့သော်လည်း အသေးစိတ်အချက်အလက်များအပြီးသတ်ရန် အပြန်အလှန်ဆွေးနွေးမှုများ ကျန်ရှိနေသေးသည်။
ယင်းအပြောင်းအရွှေ့အပြီးသတ်ခဲ့လျှင် ဆန်းချက်ဇ်၏စာချုပ်လက်ကျန်သက်တမ်း (၂)နှစ်အတွက် ပေးချေရဖွယ်ရှိသည့် ပေါင် (၅၈)သန်းခန့် မန်ယူအသင်း သက်သာသွားဖွယ်ရှိနေသည်။
ဆန်းချက်ဇ်သည် အင်တာမီလန်အသင်းနှင့် (၃)နှစ်သက်တမ်းရှိ စာချုပ်ချုပ်ဆိုသွားမည်ဖြစ်ပြီး လစာငွေကိုလည်း များစွာလျှော့ယူရမည်ဖြစ်ကာ တစ်ပတ်လစာ ပေါင် (၁၂၅ဝဝဝ)သာ ရဖွယ်ရှိကြောင်း သိရသည်။
